លោក ប្រាវីត រូចាណារាក់ (Pravit Rojanaphruk) អ្នកសារព័ត៌មានជាន់ខ្ពស់របស់សារព័ត៌មាន Khaosod English កត់សម្គាល់ឃើញថា ចាប់តាំងពីថ្ងៃទី១នៃការឈ្លានពានរបស់យោធាថៃមកលើកម្ពុជា មកដល់ពេលនេះ ប្រព័ន្ធផ្សព្វផ្សាយថៃ ភាគច្រើន បានធ្វើរបាំងការពារទង្វើរបស់យោធាថៃ ដែលធ្វើឱ្យអ្នកអានស្ទើតែមិនអាចបែងចែកដាច់រវាងសារព័ត៌មានវិជ្ជាជីវៈ និង សារព័ត៌មានដែលជាអ្នកនាំពាក្យឲ្យរដ្ឋ និងយោធា។ អ្នកជំនាញរូបនេះបានអះអាងថា ប្រព័ន្ធព័ត៌មាននៅថៃ សឹងតែទាំងអស់ផ្សព្វផ្សាយតែអ្វី ដែលយោធាបានផ្សព្វផ្សាយដោយមិនមានការបញ្ជាក់ ឬការផ្ទៀតផ្ទាត់តាមវិជ្ជាជីវៈឡើយ ដែលផ្ទុយពីវិជ្ជាជីវៈសារព័ត៌មាន ដែលគេប្រដូចទៅនឹងកញ្ចក់ដែលឆ្លុះបញ្ចាំងពីការពិតនៅក្នុងសង្គម។
អ្នកកាសែតថៃ ជើងចាស់រូបនេះ បានបន្តថា នៅពេលយោធាថៃ និយាយថា កម្ពុជា វាយថៃមុនគេផ្សាយតាមនឹងទៅ ហើយពេលកងទ័ពថៃ បាញ់ប្រហារលើហេដ្ឋរចនាសម្ព័ន្ធស៊ីវិល យោធាថៃ និយាយថា គេវាយលើហេដ្ឋារចនាសម្ព័ន្ធយោធា ឬជម្រករបស់ឧក្រិដ្ឋជន នៃឧក្រិដ្ឋកម្មអនឡាញ គេក៏ផ្សាយទៅតាមហ្នឹងដែរទៅដោយមិនបានថ្លឹងថ្លែង ពិនិត្យប្រភពច្បាស់លាស់នោះទេ ។ បញ្ហានេះបានធ្វើឱ្យលោកប្រាវីត មានការសោកស្តាយយ៉ាងខ្លាំងចំពោះអ្វី ដែលប្រព័ន្ធផ្សព្វផ្សាយថៃ បានធ្វើក្នុងរយៈពេលជាង២សប្តាហ៍កន្លងមកនេះ ព្រោះការធ្វើបែបនេះរបស់ប្រព័ន្ធផ្សព្វផ្សាយថៃ គ្មានអ្វីខុសពីការិយាល័យទំនាក់ទំនងសាធារណៈ ឬ ទំព័រហ្វេសប៊ុករបស់កងទ័ពភូមិភាគ២នោះទេ។
អ្វីដែលធ្វើឱ្យអ្នកជំនាញសារព័ត៌មានថៃ រូបនេះ កាន់តែហួសចិត្តទៀតនោះ គឺពលរដ្ឋថៃ ជាច្រើនហាក់ដូចជាពេញចិត្ត ហើយញៀននឹងតួនាទីរបស់ពួកគេជាអ្នកគាំទ្រទង្វើឈ្លានពានរបស់យោធាថៃ មកលើកម្ពុជា ទោះបីជាការពិតបានបង្ហាញពីទុក្ខវេទនារាប់មិនអស់របស់ទាហានមានឋានៈទាប និងជនភៀសសឹកទាំងសងខាងក៏ដោយ។ លោកប្រាវីត អ្នកកាសែតថៃ ល្បីរូបនេះ បានសង្កត់ធ្ងន់ថា ប្រព័ន្ធផ្សព្វផ្សាយថៃ ភាគច្រើនបាន និងកំពុងវង្វេងផ្លូវ ហើយបានបោះបង់ចោលតួនាទីរបស់ពួកគេជាអ្នកឃ្លាំមើល រួចជូនដំណឹងអំពីការពិត និងរំលឹកដល់សាធារណជនទៀតហើយ ដែលកត្តាទាំងអស់នេះធ្វើឱ្យសង្គមថៃ មានមោទនភាពថា ខ្លួនជាតួឯកនៅក្នុងតំបន់៕
ដោយៈ សរ សុជាតិ
