ប្រកាសនេះក៏មានវិសាលភាពអនុវត្តចំពោះនីតិបុគ្គលមានបំណងផ្តល់សេវាទ្រព្យសកម្មគ្រីបតូផងដែរ។
បើតាមការគូសបញ្ជាក់ក្នុងសេចក្តីប្រកាស ដែលចុះហត្ថលេខាដោយលោកជំទាវ ជា សិរី ទេសាភិបាលធនាគារជាតិនៃកម្ពុជាកាលពីថ្ងៃទី២៦ ខែធ្នូ គ្រឹះស្ថានផ្តល់សេវាទ្រព្យសកម្មគ្រីបតូអាចផ្តល់សេវាមួយ ឬច្រើន ដូចជាការប្តូរទ្រព្យសកម្មគ្រីបតូទៅជារូបិយវត្ថុ ឬរូបិយប័ណ្ណ ឬពីរូបិយវត្ថុរូបិយប័ណ្ណទៅជាទ្រព្យសកម្មគ្រីបតូ ឬការប្តូរទ្រព្យសកម្មគ្រីបតូមួយទៅជាទ្រព្យសកម្មត្រីបតូមួយផ្សេងទៀត។
គួរបញ្ជាក់ថា ការផ្ទេរទ្រព្យសកម្មគ្រីបតូ ជាប្រតិបត្តិការផ្ទេរទ្រព្យសកម្មគ្រីបតូពីអាសយដ្ឋាន ឬគណនីគ្រីបតូមួយទៅអាសយដ្ឋាន ឬគណនីគ្រីបតូមួយផ្សេងទៀត និងការរក្សាទុក ឬគ្រប់គ្រងទ្រព្យសកម្មគ្រីបតូ ឬឧបករណ៍ផ្សេងៗពាក់ព័ន្ធនឹងទ្រព្យសកម្មគ្រីបតូ។ បន្ថែមលើនេះ វាជាសេវាក្នុងការការពារកាបូបទ្រព្យសកម្មគ្រីបតូរបស់អតិថិជន និង/ឬ គ្រប់គ្រង កាបូបទ្រព្យសកម្មគ្រីបតូរបស់អតិថិជន។
បើតាមការពន្យល់របស់ធនាគារជាតិ ទ្រព្យសកម្មគ្រីបតូសំដៅដល់ឯកតាតម្លៃជាឌីជីថល ដោយប្រើប្រាស់គ្រីបតូ ក្រាហ្វី និងបច្ចេកវិទ្យាឌីអិលធី ឬបច្ចេកវិទ្យាប្រហាក់ប្រហែល។ ទ្រព្យសកម្មគ្រីបតូ អាចត្រូវបានជួញដូរ ផ្ទេរ និងប្រើប្រាស់សម្រាប់ការទូទាត់ ការវិនិយោគ ឬការទទួលបានទំនិញ/សេវាតាមប្រព័ន្ធឌីជីថល។ ទ្រព្យសកម្មគ្រីបតូនេះរាប់បញ្ចូល ថូមិនទ្រព្យសកម្មប្រពៃណី ទ្រព្យសកម្មគ្រីបតូមិនមានការធានា ស្តេបិលខ័ញ ថូកខិនយូធីលីធី និងថូកខិនមូលបត្រ។
ដោយឡែក អ៊ិចស្កូស៊ីទ្រព្យសកម្មគ្រីបតូ គឺសំដៅដល់ចំនួនទ្រព្យសកម្មគ្រីបតូ ក្នុងឬក្រៅតារាងតុល្យការ ដែលអាចបង្កឱ្យមានហានិភ័យឥណទាន ហានិភ័យទីផ្សារ ហានិភ័យ ប្រតិបត្តិការ និង/ឬ ហានិភ័យសន្ទនីយភាព។ ប្រតិបត្តិការមួយចំនួនដែលអាចបង្កឱ្យមានហានិភ័យប្រតិបត្តិការ ដូចជា៖ ការរក្សាទុកឬគ្រប់គ្រងទ្រព្យសកម្មគ្រីបតូរបស់អតិថិជន ក៏រាប់បញ្ចូលនៅក្នុងអិចស្កូស៊ីទ្រព្យសកម្មគ្រីបតូ។ ប៉ុន្តែទ្រព្យសកម្មគ្រីបតូ និងអ៊ុចស្កូស៊ីទ្រព្យសកម្មគ្រីបតូ គឺមិនរាប់បញ្ចូលរូបិយវត្ថុឌីជីថលរបស់ធនាគារកណ្តាលនោះទេ៕
