លោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជា នៃរាជបណ្ឌិត្យសភាកម្ពុជា យល់ឃើញថា ប្រសិនបើមើលតែមួយជ្រុងអាចនឹងគិតឃើញពីការដើរថយក្រោយនៅក្នុងកំណែទម្រង់វិស័យអប់រំ ប៉ុន្តែបើពិនិត្យមួយជ្រុងទៀត វាជាកំណែទម្រង់មួយរបស់ក្រសួងអប់រំ យុវជន និងកីឡា។ បើតាមអ្នកជំនាញរូបនេះ ការសម្រេចរបស់ក្រសួងអប់រំ យុវជន និងកីឡាអាចឆ្លុះបញ្ចាំងពីទិដ្ឋភាពមួយចំនួន ក្នុងនោះមានការធ្វើប្រតិភូកម្មទៅថ្នាក់ក្រោមជាតិ និងម្យ៉ាងទៀតត្រូវបានគេមើលឃើញពីការទម្លាក់កម្រិត ឬអាចពាក់ព័ន្ធនឹងការទទួលខុសត្រូវលើការចំណាយរៀបចំជាដើម។
ទោះបីមានការកែប្រែកម្មវិធីលើការប្រឡងក៏ពិតមែន ប៉ុន្តែអ្នកជំនាញរូបនេះលើកឡើងថា វានៅតែមានការលើកទឹកចិត្ត និងជំរុញឱ្យមានការខិតខំរៀន ដើម្បីប្រកួតប្រជែងដដែល ប្រសិនបើការរៀបចំមិនមានការផ្លាស់ប្ដូរទម្រង់ ឬទម្លាក់កម្រិត។
ដោយឡែក លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព យល់ឃើញថា ការផ្លាស់ប្ដូរឱ្យរាជធានី ខេត្ត រៀបចំការប្រឡងជ្រើសរើសសិស្សពូកែប្រចាំរាជធានី ខេត្ត ក្នុងឆ្នាំនេះ គឺជាការត្រឹមត្រូវ ព្រោះវាធ្វើឱ្យបណ្ដារាជធានី-ខេត្ត មានភាពម្ចាស់ការលើខ្លួនឯង។ តែយ៉ាងណាភាពម្ចាស់ការលើការរៀបចំរបស់រាជធានី ខេត្ត អាចទទួលបានលទ្ធផលល្អប្រសើរ លុះណាតែមានការរៀបចំប្រកបដោយតម្លាភាព គុណភាព និងមិនប្រកាន់បក្ខពួក។
នេះបើតាមការលើកឡើងរបស់លោក យង់ គិមអេង ដែលបានបន្ថែមថា ដើម្បីឱ្យដំណើរការនេះប្រព្រឹត្តទៅដោយរលូន គឺកុំឱ្យរឿងនយោបាយចូលជ្រៀតជ្រែកលើបញ្ហាបច្ចេកទេស ប៉ុន្តែប្រសិនបើអ្នកនយោបាយឱ្យអ្នកបច្ចេកទេសដើរតាមផ្លូវវិជ្ជាជីវៈ និងធ្វើកិច្ចការដោយត្រឹមត្រូវនោះកំណែទម្រង់នេះនឹងទទួលបានប្រសិទ្ធភាព។
អត្ថបទគួរអាន
ពាក់ព័ន្ធនឹងកំណែទម្រង់នេះលោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានគូសបញ្ជាក់ថា មូលហេតុដែលជំរុញឱ្យក្រសួងអប់រំសម្រេចផ្អាករៀបចំការប្រឡងជ្រើសរើសសិស្សពូកែក្នុងឆ្នាំសិក្សា២០២៤-២០២៥ គឺដោយសារក្រសួងយកពេលទៅផ្តោតលើការងារអាទិភាពក្នុងការលើកកម្ពស់ និងគាំទ្រសាលារៀនឱ្យក្លាយជាសាលាគំរូ សំដៅលើកកម្ពស់គុណភាពអប់រំ និងអនុវត្តជាបន្តបន្ទាប់នូវកម្មវិធីក្រៅម៉ោងសិក្សា ដើម្បីឱ្យសិស្សានុសិស្សមានវិជ្ជាសម្បទា បំណិនសម្បទា និងចរិយាសម្បទាស្របតាមសតវត្សរ៍ទី២១។
បើតាមអ្នកនាំពាក្យរូបនេះ នាពេលកន្លងមកការប្រឡងសញ្ញាបត្រមធ្យមសិក្សាទុតិយភូមិ មិនមែនគ្រាន់តែជាការវាស់ស្ទង់សមត្ថភាពរបស់សិស្សនោះទេ តែបានក្លាយជាឱកាសសម្រាប់ពួកគេនៅទូទាំងប្រទេសក្នុងការបង្ហាញសមត្ថភាព និងខិតខំប្រឹងប្រែងដើម្បីទទួលបាននិទ្ទេសនានា ជាពិសេសនិទ្ទេស A ព្រមទាំងមានការទទួលស្គាល់ពីគ្រប់មជ្ឈដ្ឋានរួចមកហើយ ហើយក៏ជាឱកាសសម្រាប់សិស្សទាំងអស់ក្នុងការទទួលបានការទទួលស្គាល់ និងឱកាសក្នុងការទទួលបានអាហារូបករណ៍នានា ផងដែរ។ បើតាមលោកជំទាវ ឃួន វិច្ឆិកា ការសម្រេចរបស់ក្រសួងមានបំណងជំរុញអនុវត្តភាពជាម្ចាស់ការរបស់រាជធានីខេត្ត ក៏ដូចជាផ្តល់ឱកាសឱ្យរាជធានី ខេត្ត អាចរៀបចំការប្រកួតប្រជែងស្របតាមបរិបទ និងធនធានរបស់ខ្លួនផងដែរ។
គូសបញ្ជាក់ថា ក្រសួងអប់រំ យុវជន និងកីឡាបានសម្រេចផ្អាករៀបចំការប្រឡងជ្រើសរើសសិស្សពូកែទូទាំងប្រទេសសម្រាប់ឆ្នាំសិក្សា២០២៤-២០២៥ ហើយបានលើកទឹកចិត្តឱ្យរាជធានីខេត្ត ម្ចាស់ការក្នុងការរៀបចំការប្រឡងលើមុខវិជ្ជាអក្សរសិល្ប៍ខ្មែរ គណិតវិទ្យា និងរូបវិទ្យាថ្នាក់ទី៩ និងថ្នាក់ទី១២ ទៅតាមពេលវេលាសមស្របណាមួយ តាមមុខវិជ្ជា តាមកម្រិតថ្នាក់ និងផ្តល់រង្វាន់ដល់ជ័យលាភីសិស្សពូកែប្រចាំរាជធានីខេត្ត តាមលទ្ធភាព និងស្ថានភាពជាក់ស្តែងនៃរាជធានីខេត្តនីមួយៗ៕
អត្ថបទ៖ បូ ដូឡា
