តម្លៃភាគហ៊ុនរបស់ក្រុមហ៊ុន Nvidia បានស្ទុះឡើង៥,២% ដែលនាំឲ្យតម្លៃភាគហ៊ុន របស់ក្រុមហ៊ុននេះឡើងថ្លៃដល់១,២២៤ដុល្លារក្នុង១ហ៊ុន ពោលគឺមានតម្លៃសរុបដល់ទៅ ៣,០១ទ្រីលានដុល្លារ ខណៈក្រុមហ៊ុន Apple មានតម្លៃត្រឹមតែ៣ទ្រីលានដុល្លារ។ បច្ចុប្បន្នក្នុងពិភពទីផ្សាបច្ចេកវិទ្យា ក្រុមហ៊ុន Microsoft ដែលមានមូលដ្ឋាននៅ Washington នៅតែជាក្រុមហ៊ុនដ៏មានតម្លៃបំផុតរបស់ពិភពលោក ជាមួយតម្លៃសរុប៣,១៥ទ្រីលានដុល្លារ ហើយតម្លៃភាគហ៊ុនរបស់ក្រុមហ៊ុននេះបានកើនឡើងជិត២%។
លោក ជេក ដូឡាហាយ ( Jake Dollarhide) នាយកប្រតិបត្តិនៃក្រុមហ៊ុន Longbow Asset Management បាននិយាយថា Nvidia កំពុងជោគជ័យពីការរកលុយតាម AI ស្របពេលដែលក្រុមហ៊ុន Apple និង Meta កំពុងចំណាយលើ AI។ លោកបានវាយតម្លៃថា ប្រសិនបើនិន្នាការគាំទ្រលើបច្ចេកវិទ្យា AI នេះនៅតែរឹងមាំ ក្រុមហ៊ុន Nvidia ទំនងជានឹងអាចផ្តួលទាំង Microsoft ផងដែរ។
គួរបញ្ជាក់ថា តាំងពីក្រុមហ៊ុន Nvidia ដាក់ចេញនូវបច្ចេកវិទ្យា AI តម្លៃភាគហ៊ុនរបស់ក្រុមហ៊ុននេះបានកើនឡើងរហូតដល់ទៅ១៤៧%ឯណោះមកដល់ឆ្នាំ២០២៤នេះ ដោយសារតែទីផ្សារពេញនិយមខ្លាំងនឹង processors កំពូលរបស់ខ្លួន ខណៈដែល Microsoft, Meta Platforms, និងម្ចាស់ Google Alphabet កំពុងប្រជែងគ្នាដើម្បីបង្កើនសមត្ថភាពកុំព្យូទ័រ AI៕
ដោយៈ សរ សុជាតិ
