លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា ជឿជាក់ថា ការកំណត់ប្រាក់ឈ្នួលអប្បរមាដល់កម្មករនិយោជិតនៅក្នុងវិស័យឧស្សាហកម្មវាយនភណ្ឌកាត់ដេរកម្ពុជា សម្រាប់ឆ្នាំ២០២៦ នឹងនៅតែអាចរក្សាបាននូវកំណើន ពោលគឺអាចឡើងយ៉ាងហោចណាស់ក៏២១០ដុល្លារដែរ បើទោះបីបច្ចុប្បន្នកម្ពុជាទទួលរងនូវអត្រាពន្ធគយបដិការ១៩% ពីអាម៉េរិក ឥទ្ធិពលភាពមិនប្រាកដប្រជានៃសេដ្ឋកិច្ចសកល និងបញ្ហាជម្លោះព្រំដែនកម្ពុជា-ថៃ ក៏ដោយ។ ទន្ទឹមនឹងការរំពឹងមានការដំឡើងប្រាក់ឈ្នួលបន្ថែមពីម្ចាស់រោងចក្រ អ្នកជំនាញរូបនេះយល់ថា រាជរដ្ឋាភិបាល ក៏ត្រូវធ្វើយ៉ាងណាជួយកាត់បន្ថយថ្លៃដើមរបស់ក្រុមហ៊ុននិយោជក ដូចជាថ្លៃដឹកជញ្ជូន អគ្គិសនី និងការចំណាយផ្សេងៗមួយចំនួនបន្ថែមទៀត សំដៅជួយលើកកម្ពស់ការនាំចេញរបស់ឧស្សាហកម្មវាយនភណ្ឌកាត់ដេរកម្ពុជា។
ជាមួយគ្នានេះ លោកបណ្ឌិត ឌុច ដារិន្ទ សាស្រ្តាចារ្យសេដ្ឋកិច្ចយល់ឃើញថា ការកំណត់ប្រាក់ឈ្នួលអប្បបរមារបស់កម្មករនិយោជិកសម្រាប់ឆ្នាំ២០២៦ ត្រូវថ្លឹងថ្លែងយ៉ាងណាឱ្យឆ្លើយតបនឹងអត្រាអតិផរណា និងកំណើនសេដ្ឋកិច្ច ដើម្បីការពារសិទ្ធិ និងលើកកម្ពស់ជីវភាពរស់នៅរបស់កម្មករនិយោជិក ក៏ដូចជារក្សាការប្រកួតប្រជែងក្នុងវិស័យកាត់ដេរ និងស្ថិរភាពម៉ាក្រូសេដ្ឋកិច្ច។ អ្នកជំនាញរូបនេះបានបន្ថែមថា ទោះបីបច្ចុប្បន្នមានបញ្ហាប្រឈមខាងក្រៅមួយចំនួន ដូចជាបញ្ហាភូមិសាស្រ្តនយោបាយក្នុងតំបន់ និងកំណើនយឺត នៃសេដ្ឋកិច្ចសកលក្តី តែកម្ពុជា មានយុទ្ធសាស្ត្រធ្វើពិពិធកម្មសេដ្ឋកិច្ចពាណិជ្ជកម្មរបស់ខ្លួន ព្រមទាំងបន្តស្វែងរកទីផ្សារនាំចេញ បន្តពង្រឹងសហប្រតិបត្តិការជាមួយប្រទេសដៃគូ និងជំរុញការលើកកម្ពស់ផលិតភាពក្នុងស្រុក ដូច្នេះហើយតាមរយៈការអនុវត្តវិធានការទាំងនេះ លោកបណ្ឌិត ឌុច ដារិន្ទ មានគំនិតសុទិដ្ឋិនិយមខ្ពស់ និងជឿជាក់ថា អត្រាប្រាក់ឈ្នួលអប្បបរមានៅឆ្នាំក្រោយ នឹងអាចកំណត់បានក្នុងកម្រិតមួយ ដែលអាចឆ្លើយតបនឹងអត្រាអតិផរណា និងស្ថានភាពសេដ្ឋកិច្ចជាក់ស្តែងនៅកម្ពុជា។
ពាក់ព័ន្ធបញ្ហាប្រាក់ឈ្នួលរបស់កម្មករ និយោជិតនេះដែរ ក្រុមសម្ព័ន្ធសហជីព សហព័ន្ធសហជីព និងអង្គការសង្គមស៊ីវិល បានបង្ហាញគោលជំហររួមគ្នាដោយស្នើឱ្យដំឡើងប្រាក់ឈ្នួលអប្បបរមាយ៉ាងតិចចំនួន ២៣២ដុល្លារ សម្រាប់ឆ្នាំ២០២៦ ដោយសារផ្អែកលើស្ថានភាពចាំបាច់ទាក់ទងនឹងការចំណាយជាក់ស្តែងរបស់កម្មករនិយោជិត និងសមត្ថភាពសេដ្ឋកិច្ចរបស់កម្ពុជា ដ្បិតថា គម្លាតរវាងប្រាក់ឈ្នួល និងការចំណាយបានបន្តរុញច្រានកម្មករនិយោជិតឱ្យកាន់តែធ្លាក់ក្នុងបំណុល និងបង្ខំឱ្យពួកគេកាត់បន្ថយការចំណាយលើថ្លៃអាហារ ការថែទាំសុខភាព និងការអប់រំ។
គួរជម្រាបថា នៅក្នុងកិច្ចប្រជុំក្រុមប្រឹក្សាជាតិ ប្រាក់ឈ្នួលអប្បបរមា ផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៦ របស់ក្រុមប្រឹក្សាជាតិ ប្រាក់ឈ្នួលអប្បបរមា នៅថ្ងៃទី៣ ខែកញ្ញា ភាគីកម្មករនិយោជិតបានស្នើនូវតួលេខកំណើនចំនួន១០ដុល្លារអាម៉េរិក លើតួលេខបច្ចុប្បន្ន២០៨ដុល្លារ ខណៈតំណាងភាគីនិយោជកស្នើរក្សាតួលេខបច្ចុប្បន្ន២០៨ដុល្លារ៕
