នាយករដ្ឋមន្ត្រីថៃ សរសើរ និងគាំទ្រជនទំនើង ចម ផាឡាង ឱ្យចាក់សំឡេងខ្មោចលងរំខានអ្នកភូមិព្រៃចាន់

កាលពីថ្ងៃទី១២ ខែតុលា នាយករដ្ឋមន្ត្រីថៃលោក អនុទីន ឆានវីរៈគុល បានទទួលស្គាល់គួរឱ្យហួសចិត្ត និងឥតអៀនខ្មាសថា លោកនៅតែស្ញើចសរសើរ និងបង្ហាញការគោរពចំពោះជនពាល ចម ផាឡាង (Chom Palang) ដែលបានចាក់សំឡេងឆ្កែលូ និងសំឡេងខ្មោចលងរំខានអ្នកភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ មិនឱ្យដេកពួនបាន ក្រោយពីកងកម្លាំងចម្រុះរបស់ថៃបរាជ័យ​ក្នុងការបណ្ដេញពលរដ្ឋខ្មែរចេញពីភូមិព្រៃចាន់។

លោក អនុទីន ឆានវីរៈគុល បានសរសើរជនពាលខាងលើនេះថា លោកពិតជាភ្ញាក់ផ្អើលដែលមនុស្សម្នាក់ដូច ចម ផាឡាង អាចធ្វើកិច្ចការបានច្រើនជាងរដ្ឋ ដើម្បីជួយដល់ប្រជាជនថៃ ហើយថា លោកគ្រោងនឹងចុះទៅពិនិត្យមើលស្ថានការណ៍នៅភូមិព្រៃចាន់ ដោយផ្ទាល់ក្នុងពេលឆាប់ៗនេះ។

គួររំឭកថា កាលពីពេលកន្លងទៅថ្មីៗនេះជនពាល ចម ផាឡាង (Chom Palang) ត្រូវបានពលរដ្ឋខ្មែរដាក់រហស្សនាមថា ស្ថាបនិកឡានដឹកលាមក ក្រោយពីជនពាលរូបនេះបានដឹកនាំក្បួនឡានដឹកលាមក១០គ្រឿងដោតទង់ជាតិថៃ ប្រៀបដូចក្បួនរថយន្តគណៈប្រតិភូថៃ មកកាន់ភូមិ ណងចាន់ ខេត្តស្រះកែវ បម្រុងបាញ់ស្រោចមកលើពលរដ្ឋខ្មែរនៅភូមិព្រៃចាន់។

នាយករដ្ឋមន្ត្រី អនុទីន ឆានវីរៈគុល បានសរសើរជនពានស្ថាបនិកឡានដឹកលាមកខាងលើក្នុងអំឡុងពេលផ្ដល់បទសម្ភាសន៍ទាក់ទងនឹងករណី ដែលភាគីកម្ពុជាប្តឹងជនពាល ចម ផាឡាង (Chom Palang) ទៅអង្គការសហប្រជាជាតិចំពោះការចាក់សំឡេងឆ្កែលូ និងសំឡេងខ្មោចលង រំខានអ្នកភូមិព្រៃចាន់រកដេកពួនមិនបាន។

នាយករដ្ឋមន្ត្រីថៃ អនុទីន ឆានវីរៈគុល បាននិយាយគួរឱ្យហួសចិត្តថា គ្មានជនជាតិថៃណាម្នាក់ចូលចិត្តអ្នក ដែលឈ្លានពានបូរណភាពទឹកដីរបស់ថៃនោះទេ ដូចនេះប្រទេសថៃ មិនគួរបន្ទោសជនពាល ចម ផាឡាង នោះឡើយ ព្រោះគេធ្វើនេះដើម្បីបង្ហាញឱ្យសាធារណជនដឹងថា នេះគឺជាទឹកដីរបស់ថៃ ហើយលោកនឹងព្យាយាមផ្សព្វផ្សាយរឿងនេះទៅអន្តរជាតិតាមដែលអាចធ្វើបាន។ ពាក្យសម្ដីរបស់លោក អនុទីន ឆានវីរៈគុល បានបង្ហាញយ៉ាងច្បាស់ថា ទង្វើដ៏ថោកទាបរបស់ពួកថៃជ្រុលនិយម ដែលបានចាក់សំឡេងឆ្កែលូ និងសំឡេងខ្មោចលងរំខានអ្នកភូមិព្រៃចាន់ គឺទទួលបានការគាំទ្រពេញទំហឹងពីកងទ័ពថៃ និងរដ្ឋាភិបាលថៃ៕

ដោយ: តែម សុខុម