ជាក់ស្ដែងនៅក្នុងរយៈពេលជាង១ឆ្នាំមកនេះ រាជរដ្ឋាភិបាល បានផ្តល់ការលើកទឹកចិត្តដល់គម្រោងចំនួន៣៩២គម្រោង ដែលមានទុនវិនិយោគសរុបប្រមាណជាង៧,៨ពាន់លានដុល្លារ។
មកដល់ពេលនេះ សកម្មភាព នៃវិស័យអចលនទ្រព្យក្នុងខេត្តព្រះសីហនុ មានចរន្តងើបឡើងវិញជាបណ្ដើរៗហើយ តែពុំទាន់មានសកម្មខ្លាំងដូចមុនឆ្នាំ២០១៩ នៅឡើយទេ។ នេះបើតាមការគូសបញ្ជាក់របស់ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលជឿជាក់ថា ខេត្តព្រះសីហនុនឹងក្លាយជាតំបន់សក្ដានុពលទី២ បន្ទាប់ពីរាជធានីភ្នំពេញ ខណៈបច្ចុប្បន្នខេត្តជាប់មាត់សមុទ្រមួយនេះមានហេដ្ឋារចនាសម្ព័ន្ធច្រើនយ៉ាង ដែលបម្រើដល់តម្រូវការ និងបង្កភាពងាយស្រួលដល់អ្នកវិនិយោគ។ ការលើកឡើងបែបនេះរបស់ប្រធានសមាគមរូបនេះធ្វើឡើងក្នុងពិធីចុះអនុស្សរណៈយោគយល់គ្នារវាងសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និង AgentHub នាថ្ងៃទី៩ ខែតុលា ឆ្នាំ២០២៥។
បើយោងតាមទិន្ន័យរបស់ក្រុមការងារជំរុញការវិនិយោគក្នុងខេត្តព្រះសីហនុ ចាប់ពីឆ្នាំ២០២៤ រហូតដល់ខែកញ្ញា ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុបានសម្រេចជាគោលការណ៍ផ្តល់ការលើកទឹកចិត្តដល់គម្រោងចំនួន៣៩២គម្រោង ដែលមានទុនវិនិយោគប៉ាន់ស្មានសរុប៧,៨០១លានដុល្លារ និងអាចបង្កើតការងារប្រមាណ៥ម៉ឺនកន្លែង។ ក្នុងនោះគម្រោងវិនិយោគពាក់ព័ន្ធអគារជាប់គាំងមានចំនួន១៨៦គម្រោង គម្រោងវិនិយោគថ្មីចំនួន១៦៦គម្រោង គម្រោងពង្រីក២៥គម្រោង និងគម្រោងវិនិយោគមានស្រាប់១៥គម្រោង៕
អត្ថបទ៖ បូ ដូឡា,រូបភាព តែន ចិន
