សិង្ហបុរី ជាប់ចំណាត់ថ្នាក់លេខ១ ជាប្រទេសមានការប្រកួតប្រជែងផ្នែកទេពកោសល្យខ្ពស់បំផុតក្នុងពិភពលោក

ប្រទេសដែនកោះសិង្ហបុរី បានចំណាត់ថ្នាក់លេខ១នៅក្នុងសន្ទស្សន៍ប្រកួតប្រជែងទេពកោសល្យជាសកលជាលើកដំបូង ដោយជែងឈ្នះប្រទេសស្វីស។ ការចាត់ចំណាក់ថ្នាក់នេះត្រូវបានវាយតម្លៃតាមរយៈវិធីដែលប្រទេសនានាមានភាពប៉ិនប្រសព្វក្នុងការទាក់ទាញ អភិវឌ្ឍន៍ និងរក្សាទុកមនុស្ស ដែលមានជំនាញខ្ពស់។ ប្រទេសសិង្ហបុរី ជាប់ចំណាត់ថ្នាក់ខ្ពស់បំផុតសម្រាប់ជំនាញទូទៅដូចជា ជំនាញទន់ អក្ខរកម្មឌីជីថល និងសមត្ថភាពផ្នែកនវានុវត្តន៍។

ប្រទេសសិង្ហបុរី ក៏មានភាពប្រសើរឡើងខ្លាំងផងដែរ ខាងរក្សាទុកមនុស្សមានទេពកោសល្យ ដោយលោតពីចំណាត់ថ្នាក់លេខ៣៨ មកនៅចំណាត់ថ្នាក់លេខ៣១ ហើយនោះ ក៏ដោយតែកត្តាជាច្រើនរួមមាន សិទ្ធិផ្ទាល់ខ្លួន សុវត្ថិភាព និងសេវាវេជ្ជសាស្ត្រកាន់តែល្អប្រសើរ។ នៅឆ្នាំ២០២៥ នេះ ការបង្កើតសន្ទស្សន៍នេះគ្របដណ្តប់លើប្រទេសចំនួន១៣៥ និងរួមបញ្ចូលកត្តាថ្មីៗដូចជាការប្រើប្រាស់បច្ចេកវិទ្យាបញ្ញាសិប្បនិម្មិត AI ជំនាញទន់ និងសុខុមាលភាពបុគ្គលិកជាដើម។

ប្រទេសស្វីស បានធ្លាក់ចុះមកនៅចំណាត់ថ្នាក់លេខ២ ហើយប្រទេសដាណឺម៉ាក ប្រទេសហ្វាំងឡង់ និងប្រទេសស៊ុយអែត បានជាប់ចំណាត់ថ្នាក់កំពូលទាំង៥ ចំណែកឯសហរដ្ឋអាម៉េរិកបានធ្លាក់ចុះមកនៅចំណាត់ថ្នាក់លេខ៩៕

ដោយ: តែម សុខុម