កិច្ចព្រមព្រៀងនៃការលក់ក្រុមហ៊ុនផលិតបន្ទះឈីប Arm ដែលមានមូលដ្ឋាននៅអង់គ្លេសមួយនេះ គឺជាការទិញលក់ក្រុមហ៊ុនដ៏ធំបំផុតមួយនៅពិភពការផលិតបន្ទះឈីបពិភពលោក ដោយការលក់នេះ គឺអនុញ្ញាតឲ្យក្រុមហ៊ុន Nvidia ដែលមានមូលដ្ឋាននៅរដ្ឋកាលីហ្វ័រញ៉ា សហរដ្ឋអាមេរិក អាចគ្រប់គ្រងលើក្រុមហ៊ុន Arm ទាំងស្រុង ខណៈដែលក្រុមហ៊ុនអង់គ្លេសមួយនេះ គឺប្រៀបដូចជាបេះដូងនៃការផលិតឧបករណ៍គ្រឿងអេឡិចត្រូនិកជាច្រើនរបស់ពិភពលោក។ ទោះយ៉ាងណា និយ័តករនៅក្នុងប្រទេស អង់គ្លេស អឺរ៉ុប អាមេរិក មិនបានគាំទ្រលើការលក់ក្រុមហ៊ុននេះឡើយ ដោយបារម្ភថា វាអាចប៉ះពាល់ដល់ការប្រកួតប្រជែង នៅក្នុងឧស្សាហកម្មបន្ទះឈីបពិភពលោក។ បន្ថែមពីនេះ ក្រុមហ៊ុនបច្ចេកវិទ្យាយក្សៗមួយចំនួន ដែលពឹងផ្អែកលើការផលិតបន្ទះឈីបរបស់ក្រុមហ៊ុន Arm រួមមានក្រុមហ៊ុន Qualcomm និង Microsoft ក៏បានជំទាស់នឹងការលក់នេះដែរ។
ទោះយ៉ាងណា ប្រភពព័ត៌មានបានអះអាងថា ក្រុមហ៊ុន SoftBank នឹងទទួលបានប្រាក់ចំណាយសងទៅវិញពីការលុបចោលការទិញលក់ក្រុមហ៊ុន Armនេះ ក្នុងតម្លៃជាង ១ពាន់២រយលានដុល្លារ ហើយកំពុងស្វែងរកការដកក្រុមហ៊ុននេះចេញពីការបោះផ្សាយលក់មូលបត្រ (IPO) នៅមុនចុងឆ្នាំនេះផងដែរ។
អត្ថបទគួរអាន
ការបរាជ័យលើកិច្ចព្រមព្រៀងលក់ក្រុមហ៊ុន Arm ក៏បានធ្វើឲ្យក្រុមហ៊ុន Softbank ដែលជាក្រុមហ៊ុនមេ មានការដាំក្បាលចុះនូវតម្លៃភាគហ៊ុនយ៉ាងខ្លាំងផងដែរ។
នៅចក្រភពអង់គ្លេស ក្រុមអ្នកនយោបាយបានចាត់ទុកក្រុមហ៊ុន Arm នេះ ជាទ្រព្យសម្បត្តិជាតិផ្នែកយុទ្ធសាស្ត្រ ហើយរដ្ឋាភិបាលអង់គ្លេសក៏យកចិត្តទុកដាក់ខ្លាំងណាស់ដែរក្នុងការជំរុញផ្លាស់ប្ដូរឲ្យក្រុមហ៊ុននេះ ងាកមកចុះបញ្ជីលក់ភាគហ៊ុននៅក្នុងទីផ្សារក្នុងស្រុក។ ប៉ុន្ដែ ក្រុមហ៊ុនមេរបស់ Arm គឺ Softbank កន្លងមកមានបំណងបោះផ្សាយលក់ភាគហ៊ុនរបស់ក្រុមហ៊ុននេះនៅសហរដ្ឋអាមេរិក ដែលខុសពីអ្វីដែលរដ្ឋាភិបាលអង់គ្លេសចង់បាន។
សូមបញ្ជាក់ថា ការត្រួតពិនិត្យរបស់អង់គ្លេសទៅលើកិច្ចព្រមព្រៀងនេះ ត្រូវបានបន្ដមកតាំងពីចុងឆ្នាំមុនម្ល៉េះ រួមទាំងមានការពិចារណាលើផ្នែកសន្ដិសុខជាតិផងដែរ៕
None
