កំពូលមេដឹកនាំចិន លោក ស៊ី ជីនពីង ប្តេជ្ញាពង្រឹងសមត្ថភាពអភិវឌ្ឍន៍ AI ដោយខ្លួនឯង ចំពេលមានការប្រកួតប្រជែងដ៏ក្ដៅគគុកជាមួយអាម៉េរិក

ថ្លែងនៅក្នុងកិច្ចប្រជុំពិភាក្សាមួយនៅការិយាល័យនយោបាយ កាលពីថ្ងៃទី ២៥ ខែមេសា លោក ស៊ី បាននិយាយថា ប្រទេសចិន គួរតែប្រើប្រាស់ «ប្រព័ន្ធជាតិទាំងមូលថ្មី» របស់ខ្លួនដើម្បី​អភិវឌ្ឍន៍បញ្ញាសិប្បនិម្មិត (AI) ដោយខ្លួនឯង ដោយបានអំពាវនាវឱ្យក្រុមហ៊ុនបច្ចេកវិទ្យារបស់ចិន ទាំងអស់ រួបរួមគ្នា ដើម្បីសម្រេចគោលដៅនេះ។

បើតាមទីភ្នាក់ងារព័ត៌មានរដ្ឋរបស់ចិន លោក ស៊ី បាននិយាយថា ចិន ត្រូវតែទទួលស្គាល់អំពីចំណុចខ្វះខាតរបស់ខ្លួន និងត្រូវបង្កើនកិច្ចខិតខំរបស់ខ្លួនដើម្បីជំរុញឱ្យមានការច្នៃប្រឌិតផ្នែកបច្ចេកវិទ្យា ការអភិវឌ្ឍឧស្សាហកម្ម និងកម្មវិធីផ្ដោតលើ AI។ លោក ស៊ី បានកត់សម្គាល់ថា ការគាំទ្រគោលនយោបាយនឹងត្រូវផ្តល់លើផ្នែកមួយចំនួនដូចជា លទ្ធកម្មរបស់រដ្ឋាភិបាល សិទ្ធិលើកម្មសិទ្ធិបញ្ញា ការស្រាវជ្រាវ និងការបណ្តុះទេពកោសល្យ។

អ្នកជំនាញមួយចំនួននិយាយថា ប្រទេសចិន បានចាប់ផ្ដើមកាត់បន្ថយគម្លាតនៃការអភិវឌ្ឍ AI ជាមួយនឹងសហរដ្ឋអាម៉េរិក កាន់តែខ្លាំងឡើងកាលពីឆ្នាំមុន ដោយកាលពីខែមករា ប្រទេសចិន បានបង្កើតអាជីវកម្ម AI ផ្ទាល់ខ្លួន គឺក្រុមហ៊ុន DeepSeek ដោយទាក់ទាញការចាប់អារម្មណ៍ជាសកលជាខ្លាំងចំពោះកម្រិតបន្ទះឈីបទំនើប និងមានតម្លៃទាបជាងបន្ទះឈីបដែលផលិតដោយប្រទេសលោកខាងលិច ដូចជាសហរដ្ឋអាម៉េរិក ជាដើម។

លោក ស៊ី បាននិយាយថា ចិនត្រូវតែបន្តពង្រឹងការស្រាវជ្រាវជាមូលដ្ឋាន ផ្តោតការខិតខំរបស់ខ្លួនលើការគ្រប់គ្រងបច្ចេកវិទ្យាស្នូលដូចជាបន្ទះឈីបដ៏ទំនើប និងសូហ្វវែរជាមូលដ្ឋានព្រមទាំងបង្កើតប្រព័ន្ធមូលដ្ឋានផ្នែកទន់និងរឹងនៃបញ្ញាសិប្បនិម្មិតមួយមានឯករាជ្យ អាចគ្រប់គ្រងបាន និងសហការគ្នា។

លោក ស៊ី បានបន្ថែមថា បទប្បញ្ញត្តិ និងច្បាប់របស់ AI គួរតែពន្លឿនដើម្បីបង្កើត«ការព្រមានអំពីហានិភ័យ និងប្រព័ន្ធឆ្លើយតបពេលមានអាសន្នដើម្បីធានាថា បញ្ញាសិប្បនិម្មិតមានសុវត្ថិភាព ភាពជឿជាក់ និងអាចគ្រប់គ្រងបាន។

លោក ស៊ី បាននិយាយកាលពីឆ្នាំមុនថា AI មិនគួរជា«ល្បែងរបស់ប្រទេសអ្នកមាននោះទេ» ព្រមទាំងបានអំពាវនាវឱ្យមានអភិបាលកិច្ចអន្តរជាតិ និងកិច្ចសហប្រតិបត្តិការលើ AIនេះផងដែរ៕

ដោយ៖ សុខ មង្គល