លោក ត្រាំ អះអាងថា ពន្ធលើទំនិញកាណាដា និងម៉ិកស៊ិកនៅតែអនុវត្ត ទោះប្រទេសទាំងពីរប្រឹងប្រែងទប់ស្កាត់ជនអន្តោប្រវេសន៍ និងថ្នាំហ្វេនតានីល

លោក ដូណាល់ ត្រាំ បានថ្លែងក្នុងសន្និសីទសារព័ត៌មានរួមគ្នាជាមួយប្រធានាធិបតីបារាំងលោក អេម៉ានូអែល ម៉ាក្រុង ថា ការដំឡើងពន្ធលើទំនិញនាំចូលរបស់កាណាដា និងម៉ិកស៊ិកនឹងដំណើរការទៅមុខតាមផែនការ។ ទន្ទឹមនឹងនេះ លោកត្រូវបានគេចោទសួរថា តើប្រទេសកាណាដា និងប្រទេសម៉ិកស៊ិកបានចាត់វិធានការគ្រប់គ្រាន់ដែរឬទេ ដើម្បីគេចផុតពីពន្ធគយ២៥%របស់សហរដ្ឋអាម៉េរិក។

មជ្ឈដ្ឋានជាច្រើនបានដាក់ក្ដីសង្ឃឹមថា ប្រទេសកាណាដា និងម៉ិកស៊ិក ដែលជាដៃគូពាណិជ្ជកម្មកំពូលៗរបស់សហរដ្ឋអាម៉េរិក អាចបញ្ចុះបញ្ចូលរដ្ឋបាលរបស់លោក ដូណាល់ ត្រាំ ឱ្យពន្យារពេលបន្ថែមទៀតនូវការដំឡើងពន្ធនេះ ដែលនឹងអនុវត្តលើទំនិញនាំចូលពីប្រទេសទាំងពីរនេះក្នុងទំហំរហូតដល់ទៅ៩១៨ពាន់លានដុល្លារ ចូលទៅក្នុងទីផ្សារសហរដ្ឋអាម៉េរិក រាប់ចាប់ពីរថយន្តរហូតដល់ថាមពល។ អ្នកជំនាញមើលឃើញថា ការដំឡើងពន្ធទាំងនេះអាចជះផលប៉ះពាល់ធ្ងន់ធ្ងរដល់សេដ្ឋកិច្ចនៅក្នុងទ្វីបអាម៉េរិកខាងជើងទាំងមូល ជាពិសេសឧស្សាហកម្មរថយន្តតែម្ដង។

លោក ដូណាល់ ត្រាំ មិនបាននិយាយពីឱសានវាទថ្ងៃទី៤ ខែមីនា នោះទេ ប៉ុន្តែលោកបានសង្កត់ធ្ងន់ថា លោកចង់ដំឡើងពន្ធឱ្យស៊ីគ្នាទៅនឹងរបាំងពាណិជ្ជកម្មដែលគ្រប់ប្រទេសទាំងអស់រួមទាំងប្រទេសបារាំងផងបានដាក់លើទំនិញរបស់សហរដ្ឋអាម៉េរិក។

លោក ត្រាំ និងលោក ម៉ាក្រុង មិនបានពិភាក្សាគ្នាជាសាធារណៈនូវចំណុចជាប់គាំងមួយទៀតនោះទេ ពោលគឺបញ្ហាពន្ធលើសេវាឌីជីថលដែលប្រទេសបារាំង កាណាដា និងប្រទេសផ្សេងៗទៀតបានដាក់លើបណ្ដាក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាម៉េរិក រួមមានក្រុមហ៊ុន Google ក្រុមហ៊ុន Facebook និងក្រុមហ៊ុន Amazon ជាដើម។

សូមបញ្ជាក់ថា កាលពីថ្ងៃសុក្រ សប្ដាហ៍មុន លោក ដូណាល់ ត្រាំ បានបញ្ជាឱ្យរដ្ឋបាលរបស់លោកបើកការស៊ើបអង្កេតពន្ធឡើងវិញ លើប្រទេសនានាដែលយកពន្ធលើសេវាឌីជីថលពីបណ្ដាក្រុមហ៊ុនបច្ចេកវិទ្យារបស់សហរដ្ឋអាម៉េរិក៕

ដោយ: តែម សុខុម