សម្តេច ហ៊ុន ម៉ាណែត អះអាងថា ការអភិវឌ្ឍន៍ប្រព័ន្ធបច្ចេកវិទ្យានៅកម្ពុជាបានបោះជំហានទៅមុខយ៉ាងលឿន

យ៉ាងណាមិញ កម្ពុជា បាន និងកំពុងចូលរួមជាមួយប្រទេសសមាជិកអាស៊ាន ក្នុងការជំរុញការរៀបចំ កិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ាន ដែលរំពឹងថា នឹងជួយបង្កើនទំហំសេដ្ឋកិច្ចឌីជីថលអាស៊ានពី១ទ្រីលានដុល្លារដល់២ទ្រីលានដុល្លារនៅត្រឹមឆ្នាំ២០៣០។

នាពិធីបើកវេទិការដ្ឋាភិបាលឌីជីថល លើកទី១ នៅព្រឹកថ្ងៃទី១១ ខែមីនា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាត់ទុក ការធ្វើបរិវត្តកម្មឌីជីថលនៅកម្ពុជា គឺជាការចាប់យកនូវផលប្រយោជន៍ជាអតិបរមាពីការរីកចម្រើននៃបច្ចេកវិទ្យាគមនាគមន៍ ព័ត៌មាន និងបច្ចេកវិទ្យាឌីជីថល ដើម្បីបង្កើនផលិតភាព និងប្រសិទ្ធភាពសេដ្ឋកិច្ច ព្រមទាំងជំរុញកំណើនសេដ្ឋកិច្ចជាតិ និងកសាងសង្គមស៊ីវិល័យផងដែរ។

សម្តេចធិបតីកត់សម្គាល់ឃើញថា នៅប៉ុន្មានឆ្នាំចុងក្រោយ ការធ្វើឌីជីថលូបនីយកម្មនៅកម្ពុជា បានបោះជំហានទៅមុខក្នុងល្បឿនលឿនគួរឱ្យកត់សម្គាល់ ពិសេសក្នុងវិបត្តិកូវីដ-១៩ បានជំរុញឱ្យមានការប្រើប្រាស់បច្ចេកវិទ្យាឌីជីថលកាន់តែខ្លាំង និងជ្រាលជ្រៅជាងពេលណាៗទាំងអស់។ បើតាមសម្តេចធិបតី ការទូទាត់សងប្រាក់ឌីជីថល បានកើនដល់ប្រមាណ៤៩២ពាន់លានដុល្លារ ក្នុងឆ្នាំ២០២៣ ស្មើនឹង១៦ដងនៃផលិតផលក្នុងស្រុកសរុប (GDP) ខណៈចំនួនអ្នកចុះឈ្មោះប្រើប្រាស់សេវាអ៊ីនធើណេតចល័ត និងចុះឈ្មោះប្រើប្រាស់សេវាទូរសព្ទចល័តបានកើនដល់ប្រមាណជាង១៩លាននាក់ ក្នុងឆ្នាំ២០២៣។

​​បើតាមសម្តេច ហ៊ុន ម៉ាណែត នៅក្នុងក្របខណ្ឌតំបន់ និងសកល រាជរដ្ឋាភិបាលកម្ពុជា ​កំពុងរៀបចំរបៀបវារៈគោលនយោបាយឌីជីថល ដោយស្មារតីបុរេសកម្ម និងបើកចំហ សំដៅសម្រេចឱ្យបាននូវគោលដៅអភិវឌ្ឍន៍ឌីជីថលជាតិ និងគោលដៅអភិវឌ្ឍន៍ឌីជីថលតំបន់ និងសកល ដូចមានកំណត់ក្នុងផែនការមេឌីជីថលអាស៊ាន ឆ្នាំ២០២៥ និងយុទ្ធសាស្រ្តឌីជីថល ឆ្នាំ២០២២-២០២៥ របស់អង្គការសហប្រជាជាតិ។ មិនតែប៉ុណ្ណោះ កម្ពុជាបាននិងកំពុងចូលរួមជាមួយប្រទេសសមាជិកអាស៊ាន ក្នុងការជំរុញការរៀបចំកិច្ចព្រមព្រៀងក្របខណ្ឌសេដ្ឋកិច្ចឌីជីថលអាស៊ាន ដោយរំពឹងថា នឹងជួយបង្កើតទំហំសេដ្ឋកិច្ចឌីជីថលអាស៊ានពី១ទ្រីលានដុល្លារ ដល់២ទ្រីលានដុល្លារ នៅត្រឹមឆ្នាំ២០៣០៕