ការបោះឆ្នោតប្រឆាំងនឹងការដកសេចក្ដីទុកចិត្តនេះ បានធ្វើឡើងក្នុងសំឡេងគាំទ្រពីសមាជិករដ្ឋសភាចំនួន ៣១៩ សំឡេង អនុប្បវាទចំនួន ៧សំឡេង នៅក្នុងចំណោមសមាជិកសភា ៤៨៨រូប។ ការបោះឆ្នោតសភាប្រឆាំងនឹង ការដកសេចក្ដីទុកចិត្ត លើលោកស្រីផែថុងថាន នេះ គឺជាវិញ្ញាសារលើកដំបូងមួយ ដែលនាយករដ្ឋមន្ត្រីថៃរូបនេះ បានឆ្លងកាត់ បន្ទាប់ពីចូលកាន់អំណាចបានជាង ៧ខែមកនេះ ។
Lead: ប្រធានរដ្ឋសភាថៃ លោក វ៉ាន មូហាម៉ាត់ នូ ម៉ាថា (Wan Muhamad Noor Matha) បានចាប់ផ្តើមសម័យប្រជុំនៅម៉ោង១០ព្រឹក ជាមួយនឹងវត្តមានតំណាងរាស្ត្រចំនួន៤៨៨នាក់។ រដ្ឋសភាបានបោះឆ្នោតប្រឆាំងនឹងញត្តិដកសេចក្ដីទុកចិត្តលើលោកស្រី ផែថងថាន របស់គណបក្សប្រឆាំងក្នុងសំឡេង៣១៩ ទល់នឹង ១៦២ ជាមួយនឹងសំឡេងអនុប្បវាទ ៧សំឡេង។ លោក វ៉ាន ប្រធានរដ្ឋសភាថៃ បានប្រកាសពីលទ្ធផលនៃការបោះឆ្នោតនេះ និងប្រកាសបិទសម័យប្រជុំភ្លាមៗតែម្ដង។យ៉ាងណាក៏ដោយលោក ណាថាផង រឿងផានយ៉ាវុត (Natthaphong Ruengpanyawut) មេដឹកនាំគណបក្សរបស់ប្រជាជន ដែលជាបក្សប្រឆាំងនៅប្រទេសថៃ នឹងស្នើឱ្យអង្គការឯករាជ្យបើកការស៊ើបអង្កេតលើលោកស្រី ផែថងថាន ចំពោះបញ្ហាទាក់ទងនឹងការជជែកដេញដោលអំពីការដកសេចក្ដីទុកចិត្តនេះ ហើយលោក ក៏បានប្រាប់ឱ្យរដ្ឋាភិបាលគួរតែត្រៀមការពារខ្លួនឱ្យបានល្អ ព្រោះលោកស្រី មិនទំនងជាអាចឆ្លើយសំណួរដ៏ច្រើន ដែលពួកគេនឹងចោទសួរនោះឡើយ។
សូមជម្រាបថា ញត្តិដកសេចក្ដីទុកចិត្តនេះត្រូវបានពិភាក្សាដេញដោលរយៈពេលពីរថ្ងៃមកហើយ មុនបោះឆ្នោតសម្រេចនៅថ្ងៃពុធ សប្តាហ៍នេះ។ គណបក្សប្រឆាំងបានចោទនាយករដ្ឋមន្ត្រីថៃលោកស្រី ផែថងថាន ថាខ្វះចំណេះដឹង គ្មានភាពចាស់ទុំ និងខ្វះឆន្ទៈនយោបាយក្នុងការដឹកនាំរដ្ឋាភិបាល ដែលស្ថិតក្រោមឥទ្ធិពលរបស់ឪពុករបស់លោកស្រី គឺលោក ថាក់ស៊ីន ស៊ីណាវ៉ាត្រា។
សមាជិកសភារបស់គណបក្សប្រឆាំងចោទរដ្ឋាភិបាលរបស់លោកស្រី មិនបានដោះស្រាយបញ្ហាសំខាន់ៗរួមទាំងថ្លៃអគ្គិសនីខ្ពស់ និងតម្លៃកសិកម្មធ្លាក់ចុះ ហើយបានបន្តគោលនយោបាយចែកប្រាក់ដល់ប្រជាជន ទោះជាមានការព្រមានថា វានឹងគ្មានប្រសិទ្ធភាពជំរុញសេដ្ឋកិច្ចក៏ដោយ។
លោកស្រី ផែថងថាន បានច្រានចោលការចោទប្រកាន់ទាំងអស់នេះ ដោយនិយាយថា លោកស្រី កំពុងផ្តល់ចំណុចល្អបំផុតដល់ប្រទេសជាតិ ហើយគេគួរតែវិនិច្ឆ័យលើការងាររបស់លោកស្រី ជាជាងទំនាក់ទំនងគ្រួសាររបស់លោកស្រី។
នាយករដ្ឋមន្ត្រីវ័យក្មេងរូបនេះបាននិយាយដោយទទូចថា រដ្ឋាភិបាលរបស់លោកស្រី មិនស្ថិតនៅក្រោមឥទ្ធិពលរបស់នរណាម្នាក់ឡើយ ខណៈលោក ថាក់ស៊ីន បានអះអាងថា លោកបានចូលនិវត្តន៍ហើយ ហើយលោកគ្រាន់តែផ្តល់ដំបូន្មានខ្លះៗដល់កូនស្រីតែប៉ុណ្ណោះ៕
អត្ថបទ៖ សុខ មង្គល
