រដ្ឋាភិបាលរបស់លោកស្រី ផែថងថាន ស៊ីណាវ៉ាត្រា កំពុងធ្វើសេចក្ដីព្រាងច្បាប់ដំបូងបង្អស់របស់ថៃ ដើម្បីគ្រប់គ្រងបច្ចេកវិទ្យា AI

រដ្ឋាភិបាលរបស់លោកស្រី ផែតងតាន ស៊ីណាវ៉ាត្រា កំពុងធ្វើសេចក្ដីព្រាងច្បាប់ដំបូងបង្អស់របស់ប្រទេសថៃ ស្ដីពីការគ្រប់គ្រងបច្ចេកវិទ្យាបញ្ញា​សិប្បនិម្មិត AI ដើម្បីធានាថា អ្នកប្រើប្រាស់ទាំងឡាយអាចទទួលបានអត្ថប្រយោជន៍ពេញលេញពី AI និងប្រើប្រាស់បច្ចេកវិទ្យានេះប្រកបដោយការទទួលខុសត្រូវខ្ពស់។

លោកស្រីបានកត់សម្គាល់ថា បច្ចេកវិទ្យា AI នឹងក្លាយជាឧបករណ៍ដ៏សំខាន់មួយនៅក្នុងការជំរុញអាជីវកម្ម និងការអភិវឌ្ឍឧស្សាហកម្មនានា ហើយលោកស្រីចង់ឱ្យច្បាប់ថ្មីនេះជួយគាំទ្រការប្រើប្រាស់បច្ចេកវិទ្យា AI ក្នុងវិស័យផលិតកម្ម និងពាណិជ្ជកម្ម។ លោកស្រីបានបញ្ជាក់បន្ថែមថា ដំណើរការនៃការធ្វើសេចក្តីព្រាងច្បាប់នេះនឹងបញ្ចប់ជាស្ថាពរក្នុងពេលឆាប់ៗនេះ។

លោកស្រី ផែតងតាន ស៊ីណាវ៉ាត្រា បានថ្លែងបែបនេះក្នុងព្រឹត្តិការណ៍ពិព័រណ៍មួយមានរយៈពេល៤ថ្ងៃ ដែលរៀបចំឡើងដោយសហព័ន្ធឧស្សាហកម្មថៃ (FTI) ដែលនឹងបញ្ចប់នៅថ្ងៃសៅរ៍ សប្ដាហ៍នេះ។

លោក គ្រៀងក្រៃ ធាននុគុល (Kriengkrai Thiennukul) សហព័ន្ធឧស្សាហកម្មថៃ (FTI) បានលើកឡើងថា សហព័ន្ធកំពុងរៀបចំផែនទីបង្ហាញផ្លូវសម្រាប់បច្ចេកវិទ្យា AI ជាមួយនឹងគោលការណ៍ណែនាំសម្រាប់វិស័យផលិតកម្ម ដើម្បីទាញយកប្រយោជន៍បានកាន់តែល្អប្រសើរពីការប្រើប្រាស់បច្ចេកវិទ្យា AI ដែលនឹងក្លាយជាឧបករណ៍ដ៏មានឥទ្ធិពលមួយក្នុងការអភិវឌ្ឍឧស្សាហកម្មនានា។

លោក គ្រៀងក្រៃ ធាននុគុល បានលើកឡើងបន្ថែមទៀតថា បច្ចេកវិទ្យាបញ្ញាសិប្បនិម្មិត AI នឹងជួយសហគ្រាសផលិតនានា កែលម្អគុណភាពផលិតផល តម្លៃ សម្រេចបានកំណើន និងចំណេញច្រើនជាងមុន។

ទន្ទឹមនេះ សហព័ន្ធឧស្សាហកម្មថៃ (FTI) ក៏បានដាក់ឱ្យដំណើរការអង្គភាពមួយផងដែរ ដើម្បីគាំទ្រដល់នវានុវត្តន៍ថ្មីផ្នែកផលិតកម្ម ដោយជួយអាជីវកម្មនានាកាត់បន្ថយការចំណាយ រក្សាការប្រកួតប្រជែង និងដើរតាមឱ្យទាន់ទំនោរ ឬនិន្នាការរបស់ពិភពលោក៕

ដោយ: តែម សុខុម