គណៈកម្មការរៀបចំការបោះឆ្នោតថៃ បញ្ជាឱ្យរៀបចំបោះឆ្នោត និងរាប់សន្លឹកឆ្នោតនៅមណ្ឌលចំនួន៩ឡើងវិញ

​គណៈកម្មការរៀបចំការបោះឆ្នោតថៃ បានប្រកាសជាផ្លូវការនៅថ្ងៃទី១៧ ខែកុម្ភៈ ឆ្នាំ២០២៦ ថា គណៈកម្មការបានបញ្ជាឱ្យរៀបចំការបោះឆ្នោតជាថ្មីនៅមណ្ឌលបោះឆ្នោតលេខ១ ការិយាល័យលេខ៦ ក្នុងខេត្តផាយ៉ាវ និងរាប់សន្លឹកឆ្នោតឡើងវិញនៅទីតាំងចំនួន៧កន្លែងផ្សេងទៀត។ ដោយឡែក ការរាប់សន្លឹកឆ្នោតឡើងវិញមួយកន្លែងទៀតនៅខេត្តកាន់ចាណៈប៊ូរី នឹងត្រូវធ្វើឡើងនៅថ្ងៃទី២២ ខែកុម្ភៈ ខាងមុខនេះ។

ស្របពេលដែលដំណើរការបច្ចេកទេសបោះឆ្នោតកំពុងដោះស្រាយ ការរៀបចំបង្កើតរដ្ឋាភិបាលចម្រុះ ដែលដឹកនាំដោយគណបក្សភូមិចៃថៃរបស់លោក អានុទីន ឆានវីរៈគុល វិញ នៅមិនទាន់មានភាពប្រាកដច្បាស់នៅឡើយទេ ដោយសារការចរចាស្វែងរកផលប្រយោជន៍រៀងៗខ្លួនរវាងបណ្ដាគណបក្សនយោបាយ ដែលទទួលបានអាសនៈនៅក្នុងសភា។

ថ្មីៗនេះ គណបក្សភូមិចៃថៃ បានបង្ហើបរូបមន្តបង្កើតរដ្ឋាភិបាលចម្រុះ ដែលទទួលបាន២៩៧អាសនៈពីការប្រមូលផ្ដុំគណបក្សចំនួន១៥រួមមានបក្សភូមិចៃថៃ, ភឿថៃ, ថៃរួមផាឡាំង, ផាឡាំងប្រាឆារ៉ាត់, ប្រាឆាឆាត, សេដ្ឋកិច្ច , ថៃសាងថៃ , ភឿជាតិថៃ និងគណបក្សតូចៗចំនួន៧ទៀតដែលមានម្នាក់១អាសនៈ។

ទោះបីជាចំនួនអាសនៈសរុបនេះលើសពាក់កណ្ដាលនៃអាសនៈសភាទាំង៥០០ ដែលគ្រប់គ្រាន់សម្រាប់បង្កើតរដ្ឋាភិបាលក៏ដោយ ប៉ុន្តែរូបមន្តនេះហាក់ចង់ផាត់ចេញនូវគណបក្សធំៗចំនួន៣រួមមានគណបក្សប្រជាជន, គណបក្សក្លាថាំ និងគណបក្សប្រជាធិបតេយ្យ។ មូលហេតុចម្បងដែលនាំឱ្យការចរចាមិនចុះសម្រុង គឺដោយសារគណបក្សទាំងនោះទាមទារកូតារដ្ឋមន្ត្រីក្នុងក្រសួងសំខាន់ៗ ដែលគណបក្សរបស់លោក អានុទីន ចង់គ្រប់គ្រងដូចគ្នា ដែលធ្វើឱ្យការបែងចែកអំណាចនៅតែមានភាពរកាំរកូសនៅឡើយ៕

អត្ថបទ៖ សួន ឡង់ទី​