តើកត្តាចម្បងអ្វីខ្លះជំរុញឱ្យក្រុមហ៊ុនផលិតស្ករសធំបំផុតទី៣របស់ថៃ KSL សម្រេចដកការវិនិយោគរបស់ខ្លួនចេញពីកម្ពុជា?

ក្រុមហ៊ុន Khon Kaen Sugar Industry Plc (KSL) ដែលជាក្រុមហ៊ុនផលិតស្ករសធំបំផុតទី៣របស់ប្រទេសថៃ បានសម្រេចដកការវិនិយោគរបស់ខ្លួនចេញពីទីផ្សារកម្ពុជា គួរឱ្យភ្ញាក់ផ្អើលក្រោមហេតុផលចម្បងមួយគឺបរិយាកាសអាជីវកម្មមិនអំណោយផល។

លោក ឆាលូស ឈីនថាំមីត (Chalush Chinthammit) ប្រធានក្រុមហ៊ុនផលិតស្ករសថៃ KSL បានគូសបញ្ជាក់ថា ការសម្រេចរបស់ក្រុមហ៊ុនដកការវិនិយោគចេញពីកម្ពុជានេះ គឺដោយសារកត្តាធំៗមួយចំនួនដូចជាកម្ពុជាបាត់បង់ប្រព័ន្ធអនុគ្រោះពន្ធ GSP, ទីផ្សារកម្ពុជា មានសន្ទុះកំណើនយឺត និងតម្លៃស្ករសបានធ្លាក់ចុះទូទាំងពិភពលោកក្នុងពេលប៉ុន្មានឆ្នាំមកនេះ។

លោកបានសង្កត់ធ្ងន់ថា ការដកការវិនិយោគចេញពីកម្ពុជានេះដោយសារកម្ពុជា លែងទទួលបានអត្ថប្រយោជន៍ពីប្រព័ន្ធអនុគ្រោះពន្ធ GSP ដូចមុននៅក្នុងការនាំចេញស្ករទៅកាន់ទីផ្សារអឺរ៉ុប និងទីផ្សារសហរដ្ឋអាម៉េរិកដោយរួចពន្ធ ឬបង់ពន្ធទាបបំផុត។

សូមបញ្ជាក់ថា សហភាពអឺរ៉ុប និងសហរដ្ឋអាម៉េរិកបានផ្តល់ប្រព័ន្ធអនុគ្រោះពន្ធ GSP ដើម្បីជួយដល់បណ្ដាប្រទេសដែលមានសេដ្ឋកិច្ចទន់ខ្សោយ ពោលគឺអនុញ្ញាតឱ្យប្រទេសទាំងនោះនាំចេញទំនិញដោយលើកលែងពន្ធ ឬបង់ពន្ធក្នុងអត្រាពន្ធទាបបំផុត។

សូមបញ្ជាក់ផងដែរថា ក្រុមហ៊ុន KSL បានចាប់ផ្តើមអាជីវកម្មស្ករសនៅក្នុងប្រទេសកម្ពុជា ចាប់តាំងពីឆ្នាំ២០០៦ ដោយចាប់ដៃគូសហការជាមួយដៃគូកម្ពុជា និងចិនតៃវ៉ាន់ ដើម្បីបង្កើតក្រុមហ៊ុនចំនួន២សម្រាប់គ្រប់គ្រងការផលិតស្ករស និងការដាំដុះអំពៅនៅទីនេះ ហើយរាជរដ្ឋាភិបាលកម្ពុជាបានយល់ព្រមផ្ដល់ដីសម្បទានដល់ក្រុមហ៊ុន KSL និងដៃគូរបស់ខ្លួនចំនួន២ម៉ឺនហិកតាក្រោមកិច្ចសន្យាជួលរយៈពេល៩០ឆ្នាំ។

លោក ឆាលូស ឈីនថាំមីត (Chalush Chinthammit) បាននិយាយថា ការអភិវឌ្ឍអាជីវកម្មស្ករសនៅកម្ពុជាមានការលំបាក ព្រោះមានបញ្ហាប្រឈមជាច្រើន។ ហើយលោកបានបន្ថែមទៀតថា ប្រាក់ចំណេញពីការវិនិយោគនៅកម្ពុជាមិនទទួលបានច្រើនដូចនៅប្រទេសថៃ និងប្រទេសឡាវនោះទេ៕

ដោយ: តែម សុខុម