តម្លៃជ័រកៅស៊ូកម្ពុជាធ្លាក់ចុះខ្លាំងប្រមាណ៣០០ដុល្លារក្នុង១តោន តើមកពីមូលហេតុអ្វី?

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូកម្ពុជាបានគូសបញ្ជាក់ថា ការធ្លាក់ចុះខ្សែច្រវាក់ផលិតកម្មធ្វើពីកៅស៊ូនៅលើទីផ្សារអន្តរជាតិ បានទាញទម្លាក់ឱ្យតម្លៃជ័រកៅស៊ូរបស់កម្ពុជាឱ្យមានការធ្លាកចុះគួរឱ្យកត់សម្គាល់នៅមួយរយៈចុងក្រោយនេះ។ ការធ្លាក់ចុះនេះកើតឡើងក្រោយសហរដ្ឋអាម៉េរិកបានដាក់ពន្ធបដិការលើបណ្ដាប្រទេសនានា ជាហេតុធ្វើឱ្យអ្នកពាក់ព័ន្ធជាច្រើនមានការព្រួយបារម្ភពីផលប៉ះពាល់សេដ្ឋកិច្ច។ បើតាមអ្នកជំនាញរូបនេះ ទីផ្សារជ័រកៅស៊ូដឹកជញ្ជូនដល់ច្រកទ្វាព្រំដែនមានតម្លៃចន្លោះពី១ពាន់៦រយដុល្លារទៅ១ពាន់៨រយដុល្លារក្នុង១តោនមានការធ្លាក់ចុះចន្លោះពី២០០ទៅ៣០០ដុល្លារក្នុង១តោនអាស្រ័យលើគុណភាពជ័រ។

ជាមួយគ្នានេះប្រធានសមាគមរូបនេះជឿជាក់ថា អ្នកវិនិយោគលើការដាំដុះ និងកែច្នៃជ័រកៅស៊ូពាក់កណ្តាលសម្រេចនៅកម្ពុជាអាចប្រឈមនឹងការខាតបង់ ប្រសិនបើការធ្លាក់ចុះតម្លៃជ័រកៅស៊ូបន្តអូសបន្លាយពេល។ តែយ៉ាងណាលោក ម៉ែន សុភក្តិ រំពឹងថា ទីផ្សារជ័រកៅស៊ូនឹងវិលមករកភាពល្អប្រសើរឡើងវិញនៅពេលប្រទេសមហាអំណាចស្រុះស្រួលគ្នា និងសេដ្ឋកិច្ចវិលមកប្រក្រតីភាពឡើងវិញ។

របាយការណ៍របស់អគ្គនាយកដា្ឋនកៅស៊ូបានបង្ហាញថា នៅពេញមួយឆ្នាំ២០២៤ កន្លងទៅ កម្ពុជាផលិតផលជ័រកៅស៊ូបានជាង៤០ម៉ឺនតោន កើនឡើងប្រមាណ៤% បើធៀបនឹងឆ្នាំ២០២៣ និងរកចំណូលបានជាង៦៦៣លានដុល្លារពីការនាំចេញជ័រកៅស៊ូ និងឈើកៅស៊ូទៅកាន់ទីផ្សារអន្តរជាតិ មានការកើនឡើងជាង៣៤%។ ក្នុងនោះការនាំចេញជ័រកៅស៊ូ សម្រេចបានទឹកប្រាក់ជាង៦៥៨លានដុល្លារ ជាមួយបរិមាណនាំចេញជិត៣៣ម៉ឺនតោន ខណៈការនាំចេញឈើកៅស៊ូមានទឹកប្រាក់ជាង៥លានដុល្លារ ជាមួយបរិមាណនាំចេញជាង២ម៉ឺន៥ពាន់ម៉ែត្រគូប។

គួរជម្រាបថា បច្ចុប្បន្នកម្ពុជាមានផ្ទៃដីដាំកៅស៊ូសរុបជាង៤២ម៉ឺនហិកតា ក្នុងនោះផ្ទៃដីចៀរជ័រមានជាង៣៣ម៉ឺនហិកតា និងផ្ទៃដីថែទាំមានជាង៩ម៉ឺនហិកតា។ ដោយឡែក សម្រាប់ផ្ទៃដីកៅស៊ូកសិឧស្សាហកម្មមានចំនួនជាង២២ម៉ឺនហិកតា និងផ្ទៃដីកៅស៊ូគ្រួសារមានចំនួនជាង២០ម៉ឺនហិកតា៕

អត្ថបទ៖ បូ ដូឡា,រូបភាព ឯកសារ