លោក ត្រាំ អួតក្ដែងៗថា អាម៉េរិកនឹងសម្រេចកិច្ចព្រមព្រៀងពាណិជ្ជកម្មជាមួយឥណ្ឌា ខណៈសង្គ្រាមពាណិជ្ជកម្មជាមួយចិននៅមិនទាន់មានច្រកចេញ

លោក ដូណាល់ ត្រាំ បានថ្លែងទៅកាន់ក្រុមអ្នកសារព័ត៌មាននៅខាងក្រៅសេតវិមាន ថា លោកជឿជាក់ថា សហរដ្ឋអាម៉េរិកនឹងសម្រេចបានកិច្ចព្រមព្រៀងពាណិជ្ជកម្មជាមួយប្រទេសឥណ្ឌា ដែលមានប្រជាជនសរុបរហូតដល់ទៅជាង១,៤ពាន់លាននាក់ ដោយលោកបានអះអាងថា នាយករដ្ឋមន្ត្រីឥណ្ឌាលោក ណារិនដ្រា ម៉ូឌី (Narendra Modi) ដែលបានធ្វើទស្សនកិច្ចនៅសេតវិមានកាលពីចុងខែកុម្ភៈ បានបង្ហាញបំណងសម្រេចឱ្យបាននូវកិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិក។

ការអត្ថាធិប្បាយរបស់លោក ដូណាល់ ត្រាំ ធ្វើឡើង បន្ទាប់ពីរដ្ឋមន្ត្រីក្រសួងរតនាគារអាម៉េរិក លោក ស្កុត បេសេន ((Scott Bessent) បានអះអាងថា សហរដ្ឋអាម៉េរិក ជិតសម្រេចបានកិច្ចព្រមព្រៀងពាណិជ្ជកម្មជាមួយប្រទេសឥណ្ឌាហើយ។ រដ្ឋមន្ត្រីរូបនេះក៏បានបញ្ជាក់ដែរថា រដ្ឋបាលលោក ត្រាំ បានចរចាកិច្ចព្រមព្រៀងពាណិជ្ជកម្មជាមួយប្រទេសជប៉ុន ហើយក៏កំពុងចចាកិច្ចព្រមព្រៀងពាណិជ្ជកម្មជាមួយកូរ៉េខាង្បូងផងដែរ។

សូមបញ្ជាក់ថា ការលើកឡើងរបស់លោក ដូណាល់ ត្រាំ ធ្វើឡើងស្របពេលដែលសង្គ្រាមពាណិជ្ជកម្មរវាងសហរដ្ឋអាម៉េរិកជាមួយមហាយក្សចិន ដែលមានសេដ្ឋកិច្ចធំបំផុតលំដាប់ទី២របស់ពិភពលោកនៅតែមិនទាន់មានច្រកចេញនៅឡើយ។

ក្នុងបទសម្ភាសន៍ជាមួយសារព័ត៌មាន ABC News កាលពីថ្ងៃអង្គារ ទី២៩ ខែមេសា លោក ដូណាល់ ត្រាំ បានលើកឡើងថា ប្រទេសចិនសមនឹងទទួលរងពន្ធខ្ពស់កប់ពពកពីខ្លួន ហើយបានព្យាករថា ក្រុងប៉េកាំងអាចនឹងស្វះស្វែងរកវិធី ដើម្បីកាត់បន្ថយផលប៉ះពាល់ទៅលើអ្នកប្រើប្រាស់នៅសហរដ្ឋអាម៉េរិក។

លោក ដូណាល់ ត្រាំ បានអះអាងថា មហាយក្សចិនកើបលុយបានរហូតដល់ទៅរាប់ទ្រីលានដុល្លារអាម៉េរិកក្នុងមួយឆ្នាំៗតាមរយៈការកេងចំណេញលើសហរដ្ឋអាម៉េរិក ហើយពេលនេះមហាយក្សចិន លែងអាចធ្វើបែបនេះបានទៀតហើយ៕

ដោយ: តែម សុខុម