តើអាម៉េរិក ពិតជាកែសម្រួលអត្រាពន្ធបដិការនៅពេលអតុល្យភាពពាណិជ្ជកម្មរបស់ខ្លួនមានភាពល្អប្រសើរមែនឬ?

រដ្ឋមន្ត្រីក្រសួងរតនាគារអាម៉េរិក លោក ស្កុត បេសសេន (Scott Bessent) បាននិយាយនៅក្នុងបទសម្ភាស​ជាមួយសារព័ត៌មាន Nikkei Asia ថា ពន្ធបដិការដែលដាក់ដោយសហរដ្ឋអាម៉េរិក លើការនាំចូលពីប្រទេសផ្សេងៗអាចនឹងធ្លាក់ចុះ ប្រសិនបើអតុល្យភាពពាណិជ្ជកម្មរបស់អាម៉េរិក មានភាពប្រសើរឡើង។ ស្របពេលពិភពលោកកំពុងឈឺក្បាលជាមួយរឿងពន្ធបដិកា ដែលដាក់ដោយសហរដ្ឋអាម៉េរិក រដ្ឋមន្ត្រីរូបនេះបាននិយាយសម្រាលបញ្ហាថា ពន្ធគយបដិការនេះអាចនឹងត្រូវបានលុបចោលវិញ ប្រសិនបើឱនភាពពាណិជ្ជកម្មរបស់អាម៉េរិក ត្រូវបានលុបបំបាត់។

ពាក់ព័ន្ធបញ្ហាពន្ធបដិការដែលអាម៉េរិក ​កំពុងដាក់លើប្រទេសនានានេះ សាកលវិទ្យាល័យ Yale បានអះអាងថា អត្រាពន្ធគយជាមធ្យមដែលអាម៉េរិក កំពុងអនុវត្តលើប្រទេសនានានេះមានក្នុងរង្វង់ ១៨,៦% ដែលជាមធ្យមភាគខ្ពស់បំផុតចាប់តាំងពីសង្គ្រាមលោកលើកទី២ បានបញ្ចប់មក។

រដ្ឋមន្ត្រីរតនាគារអាម៉េរិករូបនេះ បានព្យាយាមការពារ និងពន្យល់ពីគោលបំណងសំខាន់នៃការដាក់ពន្ធរបស់រដ្ឋបាលលោក ដូណាល់ ត្រាំ ថា គឺដើម្បីធ្វើឱ្យឱនភាពពាណិជ្ជកម្មទំហំជាង ១,១ទ្រីលានដុល្លាររបស់អាម៉េរិក មានតុល្យភាពឡើងវិញតែប៉ុណ្ណោះ។ លោកបានសង្កត់ធ្ងន់ថា ប្រសិនបើផលិតកម្មរបស់ក្រុមហ៊ុនអាម៉េរិកនៅក្រៅប្រទេសវិលត្រលប់មកសហរដ្ឋអាម៉េរិកវិញ នោះអាម៉េរិកនឹងកាត់បន្ថយអត្រាពន្ធបដិការវិញជាក់ជាមិនខាន។

ទាក់ទងនឹងការចរចាដែលកំពុងបន្តជាមួយប្រទេសដែលមិនទាន់ទទួលបានកិច្ចព្រមព្រៀងពាណិជ្ជកម្ម លោក ស្កុត បានអះអាងថា ការចរចាកិច្ចព្រមព្រៀងពាណិជ្ជកម្មជាមួយប្រទេសផ្សេងទំនងជានឹងបញ្ចប់នៅចុងខែតុលា ខណៈការចរចាជាមួយចិនវាជារឿងសំខាន់បំផុតសម្រាប់អាម៉េរិក៕

ដោយៈ សរ សុជាតិ