លោកត្រាំ គ្រោងកាត់បន្ថយពន្ធគយលើប្រទេសចិន ដើម្បីសម្រេចបានកិច្ចព្រមព្រៀងទិញលក់កម្មវិធី TikTok

ប្រធានាធិបតីអាម៉េរិក លោក ដូណាល់ ត្រាំ បានប្រាប់អ្នកយកព័ត៌មាននៅសេតវិមាន កាលពីថ្ងៃពុធ សប្តាហ៍នេះថា គ្រប់ចំណុចពាក់ព័ន្ធបញ្ហាពន្ធគយ គឺមានតម្លៃជាងកម្មវិធី TikTok ទៅទៀត ប៉ុន្តែដើម្បីឱ្យចិនយល់ព្រមចំពោះការលក់ប្រតិបត្តិការរបស់កម្មវិធីនេះទៅឱ្យក្រុមហ៊ុនអាម៉េរិក លោកត្រាំនឹងពិចារណាកាត់បន្ថយពន្ធខ្លះសម្រាប់ប្រទេសចិន។

យ៉ាងណាមិញលោក ត្រាំ នឹងដាក់ពន្ធថ្មី២៥% លើការនាំចូលរថយន្ត ដែលគ្រោងប្រកាសនៅសប្តាហ៍ក្រោយ ខណៈកន្លងមក លោក ត្រាំ ក៏បានដាក់ពន្ធលើទំនិញដែលនាំចូលពីប្រទេសចិន ចំនួន២០% រួចមកហើយដែរ។

លោក ដូណាល់ត្រាំ បានព្យាករថា លោកនឹងអាចទទួលបានយ៉ាងហោចណាស់នូវគម្រោងកិច្ចព្រមព្រៀងមួយសម្រាប់កម្មវិធី TikTok នៅសប្តាហ៍ក្រោយនេះ ប៉ុន្តែប្រសិនបើគម្រោងកិច្ចព្រមព្រៀងមិនទាន់បញ្ចប់ទេ លោកនឹងព្យាយាមពន្យារពេលកំណត់បន្ថែមទៀត។

បើតាមច្បាប់ដែលបានកំណត់កាលពីឆ្នាំមុនដោយអតីតប្រធានាធិបតីអាម៉េរិក លោក ចូ បៃដិន ក្រុមហ៊ុន ByteDance ត្រូវតែលក់ប្រតិបត្តិការកម្មវិធី TiKTok នៅសហរដ្ឋអាម៉េរិក នៅត្រឹមថ្ងៃទី១៩ ខែមករា បើមិនដូច្នេះទេនឹងត្រូវបិទចោលតែម្ដង ប៉ុន្តែលោក ត្រាំ បានពន្យារពេលការបិទកម្មវិធីនេះរហូតដល់ថ្ងៃទី៥ ខែមេសា។

លោក ត្រាំ កាលពីដើមខែនេះ បាននិយាយថា លោកកំពុងចរចាជាមួយនឹងអ្នកដេញថ្លៃដ៏មានសក្ដានុភាពចំនួន៤នាក់ ដើម្បីទិញកម្មវិធី TikTok ប៉ុន្តែលោកមិនបានបង្ហាញអត្តសញ្ញាណពួកគេជាសាធារណៈនោះទេ៕

អត្ថបទ៖ សុខ មង្គល