លោក ដូណាល់ ត្រាំ ថា បើលោកមិនទទួលបានពានរង្វាន់ណូបែលសន្តិភាពទេ វាស្មើនឹងការប្រមាថចំពោះសហរដ្ឋអាម៉េរិក

លោក ដូណាល់ ត្រាំ លើកឡើងដ៏គួរឱ្យភ្ញាក់ផ្អើលថា ប្រសិនបើលោកមិនទទួលបានពានរង្វាន់ណូបែលសន្តិភាពទេ វាស្មើនឹងការប្រមាថចំពោះសហរដ្ឋអាម៉េរិក ព្រោះលោកបានអន្តរាគមន៍ជួយពន្លត់ភ្លើងសង្គ្រាមជាច្រើន។ ការលើកឡើងបែបនេះរបស់លោក ត្រាំ ធ្វើឡើងតែប៉ុន្មានថ្ងៃប៉ុណ្ណោះមុនពេលបេក្ខភាព ដែលត្រូវបានជ្រើសរើសឱ្យទទួលពានរង្វាន់ណូបែលសន្តិភាព នឹងត្រូវប្រកាសនៅទីក្រុង Oslo ប្រទេសន័រវែស នៅថ្ងៃទី១០ ខែតុលា ដ៏ខ្លីខាងមុខនេះ។

ថ្លែងទៅកាន់ក្រុមមន្ត្រីយោធាអាម៉េរិក លោក ដូណាល់ ត្រាំ បានអះអាងថា លោកសមនឹងទទួលបានពានរង្វាន់ណូបែលសន្តិភាពសម្រាប់ស្នាដៃ ដែលលោកបានជួយពន្លត់ភ្លើងសង្គ្រាមរហូតដល់ទៅ៧ ក្នុងរយៈពេល៧ខែមកនេះ រួមមានសង្គ្រាមរវាងអ៊ីស្រាអែល និងអ៊ីរ៉ង់, សង្គ្រាមរវាងឥណ្ឌា និងប៉ាគីស្ថាន, សង្គ្រាមរវាងរវ៉ាន់ដា និងសាធារណរដ្ឋកុងហ្គោ, សង្គ្រាមព្រំដែនរវាងកម្ពុជា និងថៃ, សង្គ្រាមរវាងអាម៉េនី និងអាហ្ស៊ែបៃហ្សង់, សង្គ្រា​មរវាងអេហ្ស៊ីប និងអេត្យូពី និងសង្គ្រាមរវាងស៊ែរប៊ី និងកូសូវ៉ូ។

គួរបញ្ជាក់ថា ប្រមុខរាជរដ្ឋាភិបាលកម្ពុជា បានចេញលិខិតមួយដោយប្រកាសគាំទ្រលោក ដូណាល់ ត្រាំ ជាបេក្ខភាពសម្រាប់ពានរង្វាន់ណូបែលសន្តិភាព បន្ទាប់ពីលោករួមជាមួយចិន និងមេដឹកនាំប្រទេសម៉ាឡេស៊ី ក្នុងនាមជាប្រធានប្តូរវេនអាស៊ាន បានជួយជ្រោមជ្រែងឱ្យមានបទឈប់រវាងកងកម្លាំងកម្ពុជា និងកងទ័ពថៃ ដែលបានជួយឱ្យមនុស្សជាច្រើនរួចផុតពីការគំរាមកំហែងពីសង្គ្រាម។

ជាយូរមកហើយដែលលោក ដូណាល់ ត្រាំ ហាក់មានការមិនសប្បាយចិត្ត ដែលអតីតប្រធានាធិបតីអាម៉េរិក លោក បារ៉ាក់ អូបាម៉ា ទទួលបានពានរង្វាន់ណូបែលសន្តិភាពក្នុងឆ្នាំ២០០៩។ លោក ដូណាល់ ត្រាំ បានលើកឡើងថា ប្រសិនបើផែនការរបស់លោកក្នុងការពន្លត់ភ្លើងសង្គ្រាមរបស់អ៊ីស្រាអែល នៅតំបន់ Gaza ដែលជាទឹកដីប៉ាឡេស្ទីន ទទួលបានជោគជ័យ វានឹងក្លាយជាសង្គ្រាមទី៨ ដែលលោកពន្លត់បានក្នុងពេល៨ខែមកនេះ។

ទោះជាយ៉ាងណា ក្រុមអ្នកជំនាញនៅទីក្រុង Oslo ប្រទេសន័រវែស ដែលជាកន្លែងផ្តល់ពានរង្វាន់ណូបែបសន្តិភាព បានទម្លាយឱ្យដឹងថា ឱកាសរបស់លោក ដូណាល់ ត្រាំ ក្នុងការទទួលបានពានរង្វាន់ណូបែបសន្តិសភាព គឺជិតស្មើសូន្យ ពោលគឺគ្មានសង្ឃឹមនោះទេ៕

ដោយ: តែម សុខុម