នៅក្នុងសន្និសីទសារព័ត៌មាននៅសេតវិមាន លោក ដូណាល់ ត្រាំ បានវាយប្រហារចំៗទៅលើប្រព័ន្ធផ្សព្វផ្សាយ ដោយចោទប្រកាន់ថា បានធ្វើឱ្យប៉ះពាល់ដល់សន្តិសុខជាតិរបស់អាម៉េរិក។ យោងតាមទីភ្នាក់ងារព័ត៌មាន Reuters នៅប៉ុន្មានសប្តាហ៍ចុងក្រោយនេះ លោក ត្រាំ បានសម្តែងការមិនពេញចិត្តយ៉ាងខ្លាំងចំពោះការរាយការណ៍ព័ត៌មានជុំវិញជម្លោះរវាងអាម៉េរិក-អ៊ីស្រាអែល និងអ៊ីរ៉ង់ ដែលលោកចាត់ទុកថា មានលក្ខណៈអវិជ្ជមានជ្រុល។
រឿងរ៉ាវនេះបានផ្ទុះឡើង ក្រោយយន្តហោះចម្បាំងអាម៉េរិកមួយគ្រឿងត្រូវបានអ៊ីរ៉ង់បាញ់ធ្លាក់ក្នុងទឹកដីអ៊ីរ៉ង់ កាលពីថ្ងៃសុក្រ សប្តាហ៍មុន។ អ្វីដែលធ្វើឱ្យខឹងបំផុតនោះ គឺស្របពេលដែលប្រតិបត្តិការសង្គ្រោះកំពុងបន្តប្រព័ន្ធផ្សព្វផ្សាយជាច្រើនបានរាយការណ៍ថា អ្នកបើកយន្តហោះម្នាក់ក្នុងចំណោមពីរនាក់ ត្រូវបានកងកម្លាំងពិសេសជួយសង្គ្រោះបានសម្រេច។
លោក ត្រាំ បានចាត់ទុកការទម្លាយព័ត៌មាននេះថា បានធ្វើឱ្យប្រតិបត្តិការសង្គ្រោះអ្នកបើកយន្តហោះទីពីរស្ថិតក្នុងហានិភ័យខ្ពស់ បើទោះបីជាចុងក្រោយអ្នកបើកយន្តហោះរូបនោះត្រូវបានជួយសង្គ្រោះដោយសុវត្ថិភាពក៏ដោយ។ លោកបានសង្កត់ធ្ងន់ក្នុងសម្រង់សម្តីដើមថា យើងកំពុងតាមរកមុខអ្នកបញ្ចេញព័ត៌មាននោះយ៉ាងដិតដល់បំផុត ហើយយើងនឹងទៅរកក្រុមហ៊ុនផ្សព្វផ្សាយទាំងនោះ ហើយសួរថា តើសុខចិត្តប្រាប់ប្រភពផ្តល់ព័ត៌មានមកយើងក្នុងនាមជាស្ថាប័នសន្តិសុខជាតិ ឬក៏សុខចិត្តជាប់គុក»។
មកទល់ពេលនេះគេនៅមិនទាន់ដឹងច្បាស់ថា លោក ត្រាំ ចង់សំដៅលើស្ថាប័នព័ត៌មានណាមួយជាក់លាក់នោះទេ ព្រោះមានស្ថាប័នធំៗជាច្រើនដូចជា The New York Times, CBS News និង Axios សុទ្ធតែបានរាយការណ៍អំពីករណីនេះក្នុងរយៈពេលដ៏ខ្លីដូចគ្នា។ ដោយឡែក ខាងសេតវិមាន ក៏មិនទាន់មានការបកស្រាយបន្ថែមជុំវិញការគំរាមកំហែងនេះដែរ៕
អត្ថបទៈ សួន ឡង់ទី. រូបភាពៈ ឯកសារបរទេស
