រូបមន្តគណនាពន្ធរបស់លោក ត្រាំ ទាក់ទាញការថ្កោលទោសពេញពិភពលោក ហើយអ្នករិះគន់យល់ថា វាជាការដាក់ទណ្ឌកម្មលើប្រទេសក្រីក្រ

រូបមន្តគណនាពន្ធថ្មីដ៏ចម្រូងចម្រាសរបស់លោកប្រធានាធិបតី ដូណាល់ ត្រាំ កំពុងបណ្ដាលឱ្យមានប្រតិកម្មរិះគន់ទូទាំងពិភពលោក ជាពិសេសក្នុងចំណោមបណ្ដាប្រទេសក្រីក្រ។ ប្រព័ន្ធគណនាពន្ធថ្មីរបស់អាម៉េរិកនេះ ដោយផ្អែកលើឱនភាពពាណិជ្ជកម្មជាមួយប្រទេសនីមួយៗ ដែលធ្វើឱ្យអត្រាពន្ធហក់ឡើងខ្ពស់ខ្លាំងសម្រាប់បណ្ដាប្រទេសដែលនាំចេញច្រើនទៅកាន់សហរដ្ឋអាម៉េរិក បើធៀបនឹងការនាំចូលទំនិញអាម៉េរិក។

សហរដ្ឋអាម៉េរិក បានដាក់ពន្ធអប្បបរមា១០% ប៉ុន្តែប្រទេសជាច្រើនប្រឈមនឹងអត្រាខ្ពស់ជាងឆ្ងាយ តួយ៉ាម៉ាដាហ្គាស្កា ដែលជាប្រទេសក្រីក្របំផុតមួយរបស់ពិភពលោកនៅពេលនេះប្រឈមនឹងពន្ធគយអាម៉េរិករហូតដល់ទៅ៤៧% ឡេសូតូ (Lesotho) ដែលជាប្រទេសដ៏តូចមួយប្រឈមពន្ធគយ៥០% ចំណែកឯកម្ពុជាប្រឈមនឹងអត្រាពន្ធរហូតដល់ទៅ៤៩%។

ក្រុមអ្នករិះគន់បាននិយាយថា រូបមន្តគណនាពន្ធគយនេះ គឺជាការដាក់ទណ្ឌកម្មយ៉ាងអយុត្តិធម៌ទៅលើបណ្ដាប្រទេសកំពុងអភិវឌ្ឍន៍ ដែលមិនមានលទ្ធភាពទិញទំនិញរបស់សហរដ្ឋអាម៉េរិក។

ដូចគ្នានេះសូម្បីប្រទេសអ្នកមានក៏រងផលប៉ះពាល់ដែរ តួយ៉ាងសហភាពអឺរ៉ុប ក៏ប្រឈមមុខនឹងពន្ធ២០% ដែលខ្លួនហៅថា ជាកំហុសដ៏ធំមួយ។ ក្រុមអ្នករិះគន់សង្កត់ធ្ងន់ថា រូបមន្តគណនាពន្ធគយរបស់លោក ដូណាល់ ត្រាំ នេះមានកំហុសឆ្គងច្រើន និងងាយខ្លាំងពេកដែលប្រៀបដូចការចេញវេជ្ជបញ្ជាផ្ដល់ថ្នាំពេទ្យដោយផ្អែកលើទម្ងន់រាងកាយចែកនឹងអាយុរបស់អ្នកជំងឺ។

ហើយអ្វីដែលគួរឱ្យអស់សំណើចបំផុតនោះគឺថា សូម្បីតែកោះដែលគ្មានមនុស្សរស់នៅ និងកោះដែលជាជម្រករបស់សត្វផេនឃ្វីន (Penguin) ក៏លោក ដូណាល់ ត្រាំ យកពន្ធមិនលើកលែងដែរ។ លោក ដូណាល់ ត្រាំ បានដាក់ពន្ធដល់ទៅ៤១%លើដែនកោះ Falkland ដែលមានមនុស្សរស់នៅត្រឹមតែប្រមាណជិត៤ពាន់នាក់ និងជាជម្រករបស់សត្វផេនឃ្វីន ប្រមាណ១លានក្បាល។ ទន្ទឹមនេះ ដែនកោះ Heard និងកោះ McDonald ដែលគ្មានមនុស្សរស់នៅក្រៅពីសត្វផេនឃ្វីន ក៏បានរងពន្ធ១០%ដែរ ដែលជារឿងគួរឱ្យអស់សំណើច។

ក្រុមអ្នករិះគន់អះអាងថា ផែនការពន្ធគយដ៏ចម្រូងចម្រាសរបស់លោក ដូណាល់ ត្រាំ នេះបានបញ្ជូនសារអវិជ្ជមានទៅកាន់បណ្ដាប្រទេសជាសម្ព័ន្ធមិត្តរបស់សហរដ្ឋអាម៉េរិក និងបង្កឱ្យមានការចោទឡើងជាសំណួរថា តើអាចចរចាគ្នាបានដែរឬយ៉ាងណាជុំវិញបញ្ហាពន្ធគយនេះ។ ក្រុមអ្នកជំនាញសេដ្ឋកិច្ចបានចាត់ទុកពន្ធគយទៅវិញទៅមកថ្មីរបស់សហរដ្ឋអាម៉េរិក នេះថាខ្វះភាពសមហេតុសមផលជាក់ស្ដែង និងតម្លាភាព។

ប្រធានអង្គការពាណិជ្ជកម្មពិភពលោក WTO លោកស្រី អឹនហ្គោហ្ស៊ី អូកុនចូ អ៊ីវេឡា (Ngozi Okonjo-Iweala) បានចេញសេចក្ដីថ្លែងការណ៍កាលពីថ្ងៃព្រហស្បតិ៍ ទី៣ ខែមេសា ថា ពន្ធគយថ្មីដែលប្រកាសដោយប្រធានាធិបតីអាម៉េរិកលោក ដូណាល់ ត្រាំ រួមជាមួយពន្ធគយដែលលោកបានដាក់ចេញកាលពីដើមឆ្នាំនេះផង អាចធ្វើឱ្យទំហំពាណិជ្ជកម្មពិភពលោកធ្លាក់ចុះប្រមាណ១%នៅឆ្នាំ២០២៥ នេះ៕

ដោយ: តែម សុខុម