បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ការដោះដូរពាណិជ្ជកម្មរវាងកម្ពុជា ជាមួយសហរដ្ឋអាម៉េរិក បានឈានដល់ជាង៨ពាន់៤៥២លានដុល្លារនៅ១០ខែកន្លងមកនេះ មានការកើនឡើង៩,៧% បើធៀបនឹងរយៈពេលដូចគ្នាកាលពីឆ្នាំមុន។ កម្ពុជា នាំចេញទៅសហរដ្ឋអាម៉េរិក មានទំហំជាង៨ពាន់២រយលានដុល្លារ មានការកើនឡើងជិត១០% ដែលប្រទេសនេះក្លាយជាទីផ្សារនាំចេញធំជាងគេរបស់កម្ពុជា ខណៈកម្ពុជានាំចូលពីទីផ្សារសហរដ្ឋអាម៉េរិក មានទំហំត្រឹមតែជាង២១៧លានដុល្លារតែប៉ុណ្ណោះ។
នៅក្នុងរយៈពេលដូចគ្នានេះដែរ ទំហំពាណិជ្ជកម្មទ្វេភាគីរវាងកម្ពុជា ជាមួយចិន បានឈានដល់ជាង១២ពាន់៣៧៩លានដុល្លារ មានការកើនឡើង២៣% ក្នុងនោះកម្ពុជា នាំចេញទៅចិន មានទំហំជាង១ពាន់៤២៧លានដុល្លារ ដែលធ្វើឱ្យប្រទេសនេះក្លាយជាទីផ្សារនាំចេញធំជាងគេទី៣របស់កម្ពុជា។ ជាមួយគ្នានេះកម្ពុជា នាំចូលទំនិញពីចិន មានទំហំរហូតដល់ជិត១១ពាន់ដុល្លារអាម៉េរិក មានការកើនឡើងជាង២៣% បើធៀបនឹងរយៈពេលដូចគ្នាកាលពីឆ្នាំមុន។
ដោយឡែក ប្រទេសវៀតណាម ដែលជាប្រទេសភូមិផងរបងជាមួយកម្ពុជា បានក្លាយជាទីផ្សារនាំចេញធំលំដាប់ទី២របស់កម្ពុជា ក្រោយនៅក្នុងរយៈពេល១០ខែកន្លងមកនេះ ប្រទេសនេះបានស្រូបយកទំនិញពីកម្ពុជា មានទំហំរហូតដល់ជិត៣ពាន់លានដុល្លារអាម៉េរិក ខណៈកម្ពុជានាំចូលទំនិញពីវៀតណាម មានទំហំជាង៣ពាន់៤៥១លានដុល្លារអាម៉េរិក មានការកើនឡើងជាង១៤%។
បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ នៅក្នុងរយៈពេល១០ខែ ឆ្នាំ២០២៤ ការដោះដូរពាណិជ្ជកម្មរបស់កម្ពុជា ជាមួយទីផ្សារអន្តរជាតិ មានទំហំជាង៤៥ពាន់លានដុល្លារអាម៉េរិក ក្នុងនោះការនាំចេញរបស់កម្ពុជា មានទំហំជាង២១ពាន់៥៧១លានដុល្លារ មានការកើនឡើង១៦% ខណៈការនាំចូលទំនិញពីទីផ្សារអន្តរជាតិ មកវិញ មានទំហំជាង២៣ពាន់៤៩០លានដុល្លារ មានការកើនឡើង១៧% បើធៀបនឹងរយៈពេលដូចគ្នាកាលពីឆ្នាំមុន។
គួរបញ្ចាក់ថា ទំនិញសក្តានុពលដែលកម្ពុជានាំចេញទៅកាន់ទីផ្សារអន្តរជាតិ រួមមាន ផលិតផលវាយនភណ្ឌ សម្លៀកបំពាក់ កាបូប ស្បែកជើង គ្រឿងផ្គុំអគ្គិសនី ផលិតផលកសិកម្ម និងកសិឧស្សាហកម្មជាដើម៕
អត្ថបទ៖ បូ ដូឡា
