ប្រទេសវៀតណាម នៅសប្តាហ៍នេះ បានអនុម័តផែនការយុទ្ធសាស្ត្រជាតិ ដើម្បីអភិវឌ្ឍន៍ និងអនុវត្តកម្មវិធីបច្ចេកវិទ្យា blockchain រហូតដល់ឆ្នាំ២០៣០ ក្នុងគោលដៅចង់ប្រែក្លាយប្រទេស ដែលមានគោលនយោបាយគ្រប់គ្រងតាមបែមសង្គមសនិយម និងសេដ្ឋកិច្ចទីផ្សារនេះឱ្យក្លាយជាមជ្ឈមណ្ឌលនាំមុខគេនៃការចរាចរកម្មវិធី blockchain នៅក្នុងតំបន់អាស៊ាន។
លោក ហូ ដឹក ផុក (Hồ Đức Phớc ) ឧបនាយករដ្ឋមន្ត្រីវៀតណាម បានឲ្យដឹងថា ការសម្រេចចិត្តជាយុទ្ធសាស្ត្រនេះមានគោលបំណងប្រែក្លាយវៀតណាម ទៅជាប្រទេសនាំមុខគេក្នុងតំបន់ទាក់ទងនឹងការស្រាវជ្រាវ ការអភិវឌ្ឍ និងការពង្រឹងសមត្ថភាពនៃប្រតិបត្តិការកម្មវិធីហិរញ្ញវត្ថុ blockchain។ តាមរយៈយុទ្ធសាស្រ្តនេះលោករំពឹងថា នៅឆ្នាំ២០២៥ ខាងមុខ ហេដ្ឋារចនាសម្ព័ន្ធគាំទ្រ blockchain ជាមូលដ្ឋាននានានឹងត្រូវបានបង្កើតឡើង ដើម្បីត្រៀមលើកកម្ពស់ការប្រកួតប្រជែងនៅក្នុងតំបន់។
មកទល់ពេលនេះប្រព័ន្ធប្រតិបត្តិការ blockchain ដែលមានឈ្មោះបណ្តោះអាសន្នថា Blockchain+ ត្រូវបានគេបង្កើតឡើងតាមរយៈកម្មវិធីបច្ចេកវិទ្យា blockchain នៅក្នុងឧស្សាហកម្មមួយចំនួន រួមទាំងហិរញ្ញវត្ថុ និងធនាគារ ការដឹកជញ្ជូន ការថែទាំសុខភាព ការអប់រំ ពាណិជ្ជកម្ម ភស្តុភារ ផលិតកម្មឧស្សាហកម្ម ថាមពល ទេសចរណ៍ កសិកម្ម និងសេវាកម្មសាធារណៈផ្សេងៗទៀត។ តាមផែនការនេះ នៅឆ្នាំ២០៣០ ហេដ្ឋារចនាសម្ព័ន្ធនឹងត្រូវបានពង្រឹង និងពង្រីកដោយផ្តល់សេវាកម្មមិនត្រឹមតែក្នុងស្រុកប៉ុណ្ណោះទេ ថែមទាំងទៅកាន់ប្រទេសផ្សេងទៀតផងដែរ។
គួរបញ្ជាក់ថា Blockchain គឺជាបច្ចេកវិទ្យាទូទាត់ផ្នែកហិរញ្ញវត្ថុមួយ ដែលអាចឱ្យមានការចែករំលែកព័ត៌មានប្រកបដោយសុវត្ថិភាពនៅទូទាំងបណ្តាញមួយ។ វាអាចត្រូវបានយល់យ៉ាងសាមញ្ញថា ជាមូលដ្ឋានទិន្នន័យឌីជីថល ដែលកត់ត្រាប្រតិបត្តិការទាំងអស់នៅទូទាំងបណ្តាញ ដោយប្រតិបត្តិការនីមួយៗអាចចូលដំណើរការបាន លុះត្រាតែមានការអនុញ្ញាតជាមួយនឹងហត្ថលេខាឌីជីថលរបស់ម្ចាស់ ដែលធ្វើឱ្យព័ត៌មានដែលរក្សាទុកក្នុងបណ្តាញមានសុវត្ថិភាពខ្ពស់។ បច្ចុប្បន្នថៃ និងសិង្ហបុរី ត្រូវបានគេដឹងថា គឺជាមជ្ឈមណ្ឌលនៃប្រតិបត្តិការទូទាត់ blockchain សម្រាប់តំបន់អាស៊ាន ដែលនៅក្នុងមួយឆ្នាំៗទំហំប្រតិបត្តិការទូទាត់នេះមានតម្លៃជាង១០០ពាន់លានដុល្លារ៕
ដោយៈ សរ សុជាតិ
