វៀតណាម ចាប់ផ្ដើមបង្ក្រាបទំនិញបរទេសដែលបន្លំបិទស្លាកផលិតនៅវៀតណាម សម្រាប់នាំចេញទៅអាម៉េរិក ដើម្បីលាងសម្អាតកេរ្ដិ៍ឈ្មោះ

ក្រសួងពាណិជ្ជកម្មវៀតណាម តាមរយៈសារាចរ​ណែនាំកាលពីពេលថ្មីៗនេះ បានលើកឡើងថា ការក្លែងបន្លំពាណិជ្ជកម្មក្រោមរូបភាពទំនិញបរទេសបន្លំបិទស្លាកផលិតនៅប្រទេសដទៃសម្រាប់ការនាំចេញទំនងជាកើនឡើង ស្របពេលពាណិជ្ជកម្មពិភពលោកកំពុងជ្រួលច្របល់កាន់តែខ្លាំងឡើង ដែលបណ្តាលមកពីពន្ធគយបដិការដ៏ចម្រូងចម្រាសរបស់សហរដ្ឋអាម៉េរិក។ ក្រសួងពាណិជ្ជកម្មវៀតណាម បានលើកឡើងថា ប្រសិនបើគ្មានការទប់ស្កាត់ទេ ប្រទេសនានា រួមទាំងវៀតណាមផង នឹងកាន់តែពិបាកគេចផុតពីទណ្ឌកម្មពន្ធរបស់សហរដ្ឋអាម៉េរិកណាស់។

ជាវិធានការទប់ស្កាត់ និងដើម្បីលួងចិត្តសហរដ្ឋអាម៉េរិក ក្រសួងពាណិជ្ជកម្មវៀតណាម បានបញ្ជាឱ្យស្ថាប័ន និងមន្ត្រីមានសមត្ថកិច្ចពង្រឹងការគ្រប់គ្រងលើទំនិញនាំចូល ហើយដាក់ចេញនូវនីតិវិធីថ្មីៗសម្រាប់ការចេញលិខិតបញ្ជាក់ផលិតនៅវៀតណាម ឬ Made in Vietnam សម្រាប់ផលិតផលស្របច្បាប់ដើម្បីទប់ស្កាត់ការក្លែងបន្លំប្រភពដើមនៃទំនិញ។

វៀតណាម បាននាំចូលទំនិញពីប្រទេសចិន ច្រើនជាងគេបំផុត ខណៈដែលសហរដ្ឋអាម៉េរិក ជាទីផ្សារនាំចេញកំពូលរបស់ខ្លួន។

គួររំឭកថា សហរដ្ឋអាម៉េរិក ធ្លាប់បានចោទប្រកាន់ប្រទេសវៀតណាមថា លេងល្បិចបោកប្រាស់ខ្លួនក្រោមរូបភាពបន្លំបិទស្លាកសញ្ញាថា ផលិតផលដែលនាំចូលទៅកាន់សហរដ្ឋអាម៉េរិក ជារបស់ប្រទេសវៀតណាម ប៉ុន្តែធាតុពិតជាផលិតផលរបស់ប្រទេសចិន៕

ដោយ: តែម សុខុម