តើសិស្សប្រលងបាក់ឌុបឆ្នាំនេះគួរចាប់យកជំនាញអ្វីសម្រាប់រៀនបន្ត ដើម្បីអាចឆ្លើយតបនឹងតម្រូវការការងារ?
នៅឆ្នាំ២០២៥ នេះ មានបេក្ខជនបានចុះឈ្មោះចូលរួមប្រលងសញ្ញាបត្រមធ្យមសិក្សាទុតិយភូមិ ឬបាក់ឌុបចំនួនជាង១៤ម៉ឺននាក់ ហើយក៏មានបេក្ខជនជាច្រើនបានបោះប…
ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេស បានគូសបញ្ជាក់ថា ចាប់តាំងពីប្រទេសថៃ និងកម្ពុជា បិទច្រកព្រំដែនគោករួចមក ថៃ បានបង្វែរការដឹកជញ្ជូនទំនិញដែលមិនមានការហាមឃាត់ចូលមកកម្ពុជា តាមផ្លូវទឹក ដោយឆ្លងកាត់កំពង់ផែនៅប្រទេសសិង្ហបុរី និងកំពង់ផែនៅប្រទេសវៀតណាម រួចចូលមកកំពង់ផែស្វយ័តក្រុងព្រះសីហនុរបស់កម្ពុជា។ តាមរយៈសកម្មភាពដឹកជញ្ជូនទំនិញមកពីថៃ តាមផ្លូវទឹកនេះ ត្រូវបានអ្នកជំនាញរូបនេះ កត់សម្គាល់ឃើញថា បានធ្វើឱ្យកំពង់ផែស្វយ័តក្រុងព្រះសីហនុ មានសកម្មភាពមមាញឹកជាងមុនជាហេតុធ្វើឱ្យទំនិញឆ្លងកាត់នៅកំពង់ផែស្វយ័តក្រុងព្រះសីហនុ មានការកកស្ទះ។
ស្រដៀងគ្នានេះ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា កត់សម្គាល់ឃើញថា ទោះបីមានការបិទច្រកទ្វារព្រំដែនគោករវាងកម្ពុជា និងថៃ ក៏ដោយ ក៏ទំនិញរបស់ថៃ ដែលនៅក្រៅបញ្ជីហាមឃាត់នៅតែហូរចូលមកកម្ពុជា ជាបន្តបន្ទាប់ ខណៈនៅមួយរយៈចុងក្រោយនេះ ការដឹកជញ្ជូនទំនិញរបស់ថៃ ចូលមកកម្ពុជា បានធ្វើឡើងតាមផ្លូវទឹកជាធម្មតា។
ដោយឡែក ឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) យល់ឃើញថា ការនាំចូលទំនិញពីថៃ តាមផ្លូវទឹកចូលមកកម្ពុជា គួរមានការត្រូតពិនិត្យឱ្យបានច្បាស់លាស់ ដើម្បីកុំឱ្យផ្ទុយពីវិធានការរបស់រាជរដ្ឋាភិបាលកម្ពុជា ដែលបានដាក់ចេញនាពេលកន្លងមក។ ជាមួយគ្នានេះ អ្នកជំនាញរូបនេះ ស្នើពលរដ្ឋខ្មែរឱ្យគាំទ្រផលិតផលក្នុងស្រុក និងកុំមានការរើសអើងជនបរទេស ដែលមកវិនិយោគកែច្នៃនៅកម្ពុជា ដើម្បីកុំឱ្យប៉ះពាល់ដល់គោលនយោបាយរបស់រាជរដ្ឋាភិបាល។
បើយោងតាមរបាយការណ៍ពីក្រសួងពាណិជ្ជកម្ម នៅក្នុងខែកក្កដា តម្លៃនៃការនាំចូលទំនិញថៃមកកាន់ទីផ្សារកម្ពុជា មានត្រឹមតែប្រមាណ១៦៦លានដុល្លារប៉ុណ្ណោះដាំក្បាលចុះ៤៤% បើធៀបនឹងរយៈពេលដូចគ្នាកាលឆ្នាំមុន។ យ៉ាងណាមិញនៅក្នុងរយៈពេល៧ខែ ឆ្នាំ២០២៥ ការដោះដូរពាណិជ្ជកម្មទ្វេភាគីរវាងកម្ពុជា និងថៃ មានទំហំប្រមាណ២ពាន់៤រយលានដុល្លារ ធ្លាក់ចុះ០,៦% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជា នាំចេញទៅថៃ មានទំហំប្រមាណ៤៨៨លានដុល្លារ ខណៈថៃ នាំចូលមកកម្ពុជាវិញ មានទំហំជាង១ពាន់៩រយលានដុល្លារ៕
អត្ថបទ៖ បូ ដូឡា
