លោក វន់ ពៅ ប្រធានសមាគម IDEA បានថ្លែងថា អ្នកលក់ដូរតាមដងផ្លូវដែលស្ថិតក្នុងមុខរបរសេដ្ឋកិច្ចក្រៅប្រព័ន្ធបានរួមចំណែកស្រូបយកកម្លាំងពលកម្មការងារបានមួយចំនួន និងជាផ្នែកមួយនៃទេសចរ និងលើកកម្ពស់សេដ្ឋកិច្ចគ្រួសារ។ តែយ៉ាងណាអ្នកជំនាញក្នុងវិស័យសេដ្ឋកិច្ចក្រៅប្រព័ន្ធរូបនេះបានលើកឡើងពីបញ្ហាប្រឈមមួយចំនួនរបស់អ្នកប្រកបរបរសេដ្ឋកិច្ចក្រៅប្រព័ន្ធ ខណៈការលក់ដូរភាគច្រើននៅធ្វើតាមបែបប្រពៃណី និងស្នើដល់អ្នកពាក់ព័ន្ធឱ្យជួយបង្កភាពងាយស្រួលដល់អាជីវករស្ថិតក្នុងសេដ្ឋកិច្ចក្រៅប្រព័ន្ធ។
ជាមួយគ្នានេះ លោកស្រី ភាណ សោភ័ណ នាយិកាអង្គការអុកស្វាមបានគូសបញ្ជាក់ថា ជាង៨៨%នៃកម្មករធ្វើការក្នុងសេដ្ឋកិច្ចក្រៅប្រព័ន្ធ គឺជាអ្នកលក់ដូរតាមដងផ្លូវដែលបានរួមចំណែកផ្ដល់សេវាកម្មម្ហូបអាហារតម្លៃសមរម្យ ជួយបង្កើតការងារ និងកាត់បន្ថយការចំណាកស្រុក។ បើតាមនាយិកាអង្គការអុកស្វាម អ្នកធ្វើការក្នុងមុខរបរសេដ្ឋកិច្ចក្រៅប្រព័ន្ធនៅតែស្ថិតក្នុងក្រុមងាយរងគ្រោះ និងត្រូវមានការគាំពារដល់ពួកគេ។
ពាក់ព័ន្ធបញ្ហានេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា នៅក្នុងគោលនយោបាយរបស់រាជរដ្ឋាភិបាលកម្ពុជា បានបង្ហាញពីការគាំទ្រដល់សកម្មភាពមុខរបររបស់ពលរដ្ឋស្ថិតក្នុងសេដ្ឋកិច្ចក្រៅប្រព័ន្ធ។ ទន្ទឹមនេះ ថ្នាក់ដឹកនាំក្រសួងការងារ បានចាត់ទុកអ្នកលក់ដូរតាមផ្លូវបានរួមចំណែកក្នុងការចូលរួមជំរុញសេដ្ឋកិច្ច ជួយទាក់ទាញអ្នកទេសចរ និងបង្កើតជាទីផ្សារផលិតផលសម្រាប់បង្ហាញដល់សាធារណជន។ ជាក់ស្ដែងនៅក្នុងខេត្តសៀមរាប និងរាជធានីភ្នំពេញ ត្រូវបានអាជ្ញាធររៀបចំឱ្យមានការលក់ដូរនៅផ្លូវថ្មើជើង និងបានផ្ដល់ឱកាសជូនដល់អ្នកលក់ដូរតាមផ្លូវមួយចំនួនបានចូលទៅលក់នៅទីនោះផងដែរ។ តែយ៉ាងណាថ្នាក់ដឹកនាំក្រសួងការងារ យល់ឃើញថា ស្ថិតក្នុងស្ថានភាពបច្ចុប្បន្នអ្នកលក់ដូរតាមដងផ្លូវ ឬការធ្វើសកម្មភាពសេដ្ឋកិច្ចមិនអាចធ្វើតាមបែបបុរាណដូចមុននោះទេ ពោលគឺគួរងាកមកលក់តាមប្រព័ន្ធបច្ចេកវិទ្យា ដើម្បីពង្រីកការលក់របស់ពួកគេ។
សូមបញ្ជាក់ថា ការលើកឡើងខាងលើនេះធ្វើឡើងក្នុងទិវាអន្តរជាតិ អ្នកលក់ដូរតាមដងផ្លួវលើកទី១៣ ដែលជាវេទិកាផ្ដល់ឱកាសដល់អ្នកលក់ដូរតាមដងផ្លូវចូលរួមកិច្ចពិភាក្សា និងចែករំលែកពីស្ថានភាពការងារ និងបញ្ហាប្រឈម ដែលពួកគេជួបប្រទះ ដើម្បីកែលម្អលក្ខខណ្ឌការងារ និងសុខុមាលភាពទូទៅ ដើម្បីពង្រឹងក្របខ័ណ្ឌគាំពារសង្គមរបស់កម្ពុជា ដើម្បីធានាថា អ្នកលក់ដូរតាមដងផ្លូវមិនត្រូវបានទុកចោលនៅពេលដែលកម្ពុជា ឈានទៅរកសេដ្ឋកិច្ចបៃតង និងឌីជីថល៕
អត្ថបទ៖ បូ ដូឡា,រូបភាព ប៉ុក វុន្ថា
