លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា កត់សម្គាល់ឃើញថា ទំនាក់ទំនងកម្ពុជា-ចិន មានការវិវត្តគួរឱ្យកត់សម្គាល់នៅប៉ុន្មានឆ្នាំកន្លងមកនេះ ទាំងផ្នែកការទូត និងវិស័យសេដ្ឋកិច្ច។ ហើយតាមរយៈដំណើរទស្សនកិច្ចរបស់លោក ស៊ី ជីនភីង ប្រធានាធិបតីចិន មកកាន់ប្រទេសកម្ពុជា នៅពាក់កណ្តាលខែមេសា នេះ អ្នកជំនាញរូបនេះ រំពឹងថា វានឹងជួយធ្វើឱ្យទំនាក់ទំនងការទូត និងការធ្វើពាណិជ្ជកម្មរវាងប្រទេសទាំងពីរកាន់តែមានភាពល្អប្រសើរបន្ថែមទៀត ជាពិសេសវានឹងជួយជំរុញការនាំចេញកសិផលខ្មែរទៅកាន់ទីផ្សារចិន បានកាន់តែច្រើនបន្ថែមទៀត។ សម្រាប់អ្នកជំនាញរូបនេះ តាមរយៈដំណើរទស្សនកិច្ចនេះ វាក៏ជាផ្នែកមួយជួយផ្តល់ទំនុកចិត្តដល់ភ្ញៀវទេសចរ និងអ្នកវិនិយោគិនឱ្យមកកម្សាន្ត និងសិក្សាឱកាសវិនិយោគនៅកម្ពុជា ផងដែរ។
ជាមួយគ្នានេះ លោកសាស្រ្តាចារ្យ ឯម សុវណ្ណារ៉ា អ្នកជំនាញវិទ្យាសាស្ត្រនយោបាយ បានវាយតម្លៃថា ដំណើរទស្សនកិច្ចរបស់ប្រធានាធិបតីចិន លោក ស៊ី ជីនភីង មកកាន់ប្រទេសកម្ពុជា នៅពាក់កណ្តាលខែនេះ អាចធ្វើឡើងក្នុងគោលបំណងដើម្បីពង្រឹងទំនាក់ទំនងលើវិស័យការទូត និងពាណិជ្ជកម្ម ស្របពេលកិច្ចសហប្រតិបត្តិការរវាងប្រទេសទាំងពីរឈានដល់កម្រិកខ្ពស់។ បើតាមការអះអាងរបស់អ្នកជំនាញរូបនេះ ទោះបីចិន មានអតិរេកពាណិជ្ជកម្មខ្ពស់ជាមួយកម្ពុជា តែកម្ពុជា នៅតែត្រូវការចិន ដើម្បីគាំទ្រផ្នែកនយោបាយការទូត និងផ្គង់ផ្គង់វត្ថុដើមសម្រាប់ផលិតផលិតផល ដើម្បីនាំចេញទៅកាន់ទីផ្សារអាម៉េរិក និងសហភាពអឺរ៉ុប។
សូមបញ្ជាក់ថា នៅក្នុងឆ្នាំ២០២៤ កន្លងទៅការធ្វើពាណិជ្ជកម្មរបស់កម្ពុជា ជាមួយប្រទេសចិន សម្រេចបានទំហំជាង១៥ពាន់លានដុល្លារ កើនឡើងជាង២៣% បើធៀបនឹងឆ្នាំ២០២៣ ក្នុងនោះកម្ពុជា នាំចេញទៅប្រទេសចិន មានទំហំ១,៧៥០លានដុល្លារ ហើយចិននាំចូលមកម្ពុជាវិញ មានទំហំ១៣,៤៣៩លានដុល្លារ។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
អត្ថបទ៖ បូ ដូលា
