ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជាបានអះអាងថា មកទល់ពេលនេះផ្សារភាគហ៊ុនរបស់កម្ពុជាពុំទាន់មានទំនាក់ទំនងខ្លាំងជាមួយបណ្ដាប្រទេសដទៃនៅឡើយទេ ហើយក៏ពុំទាន់មានការវាយតម្លៃលើទំនាក់ទំនងផ្សារហ៊ុនជាមួយប្រទេសនានានៅឡើយដែរ។ ជាការកត់សម្គាល់របស់មេផ្សារហ៊ុនរូបនេះ ស្ថិតក្នុងស្ថានភាពបច្ចុប្បន្នអ្នកវិនិយោគមានការប្រុងប្រយ័ត្នខ្ពស់ចំពោះការវិនិយោគលើផ្សារហ៊ុននៅកម្ពុជា ខណៈការធ្លាក់ចុះភាគហ៊ុនអាចជាឱកាសដល់ការវិនិយោគ។
អគ្គនាយកផ្សារមូលបត្រកម្ពុជាជឿជាក់ថា ប្រសិនបើមិនមានឧបសគ្គអ្វីមួយកើតឡើងនោះទេ នៅក្នុងឆ្នាំ២០២៥ នេះ ការចុះបញ្ជីជួញដូរភាគហ៊ុននឹងមានការកើនឡើងជាងបណ្ដាឆ្នាំមុនៗ ខណៈបច្ចុប្បន្នមានក្រុមហ៊ុនមកចុះបញ្ជីបោះផ្សាយលក់សញ្ញាបណ្ណជាបន្តបន្ទាប់ផងដែរ។
គិតត្រឹមខែកុម្ភៈ ឆ្នាំ២០២៥ នេះ មានក្រុមហ៊ុនចំនួន២៤ បានចុះបញ្ជីនៅផ្សារមូលបត្រកម្ពុជា ក្នុងនោះក្រុមហ៊ុនចំនួន១១បានចុះបញ្ជីបោះផ្សាយលក់ភាគហ៊ុន និងក្រុមហ៊ុនចំនួន១៣ បានចុះបញ្ជីបោះផ្សាយលក់សញ្ញាបណ្ណ ឬមូលបត្របំណុល ដោយក្រុមហ៊ុនទាំងនេះអាចកៀរគទុនពីទីផ្សារបានប្រមាណ៤៧៥លានដុល្លារ។ នេះបើតាមការគូសបញ្ជាក់របស់ឯកឧត្តម ហុង សុហួរ៕
អត្ថបទ៖ បូ ដូឡា,រូបភាព ឯកសារ
