លោកស្រី ផែនថុងថាន បាននិយាយទៅកាន់អ្នកសារព័ត៌មានថា «រាជរដ្ឋាភិបាលនឹងមិនបណ្ដោយឲ្យបញ្ហាពន្ធគយដែលដាក់ដោយអាមេរិកនេះ ធ្វើឲ្យប៉ះពាល់ដល់គោលដៅកំណើនសេដ្ឋកិច្ចនោះឡើយ»។ លោកស្រីថែមទាំងបានសង្កត់ធ្ងន់ទៀតថា រាជរដ្ឋាភិបាលថៃ គឺមានផែនការច្បាស់លាស់ណាស់ លើបញ្ហានេះ និងបានរៀបចំដំណោះស្រាយជាជំហានៗ រួមទាំងការបញ្ជូនលេខាធិការអចិន្ត្រៃយ៍ ដើម្បីទៅចរចាជាមួយនឹងមន្ត្រីសហរដ្ឋអាមេរិកផងដែរ។
ដោយឡែក អនុរដ្ឋមន្ត្រីក្រសួងហិរញ្ញវត្ថុថៃ លោក ជូឡាផុន អេមមុនវីវ៉ាត់ បាននិយាយថា រាជរដ្ឋាភិបាល គ្មានការភ្ញាក់ផ្អើលនោះឡើយ នៅពេលដែលលោកត្រាំ ប្រកាសពីការដាក់ពន្ធបន្ថែមនេះ បើទោះបីជា វាមានអត្រាខ្ពស់ ដល់ទៅ ៣៦% ខ្ពស់ជាងការរំពឹងទុកយ៉ាងណាក្ដី។
លោកបាននិយាយថា រាជរដ្ឋាភិបាលថៃ ត្រូវតែចរចាដោយស្មារតីយោគយល់គ្នា មិនមែនគឃ្លើនដាក់គ្នានោះឡើយ ប៉ុន្ដែ ត្រូវជជែកឲ្យដឹងគ្នាច្បាស់សិនថា តើផលិតផលណាខ្លះ ដែលអាមេរិកគិតថា មានការយកពន្ធគយមិនស្មើភាពគ្នានោះ ហើយភាគីទាំងពីរនឹងធ្វើការសម្របសម្រួលគ្នាតាមភាពជាក់ស្ដែង។
ប្រទេសថៃ មានអតិរេកពាណិជ្ជកម្ម ជាមួយអាមេរិកដល់ទៅ ៤៥ពាន់លានដុល្លារ កាលពីឆ្នាំ២០២៤ នេះបើតាមតួលេខពីការិយាល័យតំណាពាណិជ្ជកម្មអាមេរិក ហើយអាមេរិកជាទីផ្សារនាំចេញដ៏ធំបំផុតរបស់ថៃ លើផលិតផលអេឡិចត្រូនិក គ្រឿងម៉ាស៊ីន និងផលិតផលកសិកម្មជាដើម។
