ហេតុអ្វីវិនិយោគិនជប៉ុន ភាគច្រើន ចង់ឲ្យលោកស្រី កាម៉ាឡា ហារីស ក្លាយជាប្រធានាធិបតីជាងលោក ដូណាល់ ត្រាំ?

វិនិយោគិនជប៉ុនភាគច្រើនមិនចង់ឱ្យអតីតប្រធានាធិបតីសហរដ្ឋអាម៉េរិក លោក ដូណាល់ ត្រាំ ឈ្នះក្នុងការបោះឆ្នោតនៅដើមខែវិច្ឆិកា ខាងមុខនោះទេ ពោលគឺពួកគេចង់ឱ្យលោកស្រី កាម៉ាឡា ហារីស ឈ្នះច្រើនជាង។ ការដែលវិនិយោគិនជប៉ុន ចង់ឱ្យលោកស្រី កាម៉ាឡា ហារីស ឈ្នះការបោះឆ្នោត ក៏ដោយសារពួកគេជឿជាក់ថា លោកស្រី ហារីស នឹងធ្វើឱ្យការធ្វើពាណិជ្ជកម្មរវាង​ជប៉ុន និងសហរដ្ឋអាម៉េរិកនឹងមានភាពល្អប្រសើរជាងរដ្ឋបាលរបស់លោក ត្រាំ។ ជាពិសេសពួកគេបារម្ភថា អាជីវកម្មរបស់ពួកគេនឹងប្រឈមការលំបាកប្រសិនបើលោក ត្រាំ ឈ្នះឆ្នោត ដែលបង្កឡើងដោយគោលនយោបាយគាំពារនិយម និងគោលនយោបាយមិនអាចទាយទុកជាមុនបានរបស់លោក ត្រាំ។

លទ្ធផលស្ទង់មតិបានបង្ហាញថា ក្រុមហ៊ុនជប៉ុន ប្រហែល៤៣% បាននិយាយថា ពួកគេចូលចិត្ត និងចង់ឲ្យ លោកស្រី កាម៉ាឡា ហារីស ឈ្នះក្នុងការបោះឆ្នោត ខណៈអ្នកចង់ឲ្យលោក ត្រាំ ឈ្នះឆ្នោតមានតែ៨% ប៉ុណ្ណោះ ស្របពេលដែល៤៦% មិនខ្វល់ខ្វាយពីអ្នកទាំងពីរ ហើយ៣%ទៀត និយាយថា ពួកគេមិនចូលចិត្តបេក្ខជនប្រធានាធិបតីរបស់សហរដ្ឋអាម៉េរិកទាំងពីរតែម្តង។

នៅក្នុងពេលស្ទង់មតិ អ្នកគ្រប់គ្រងនៅក្រុមហ៊ុនផលិតសេរ៉ាមិចមួយបានសរសេរថា លទ្ធភាពដែលសង្រ្គាមពាណិជ្ជកម្ម និងការគំរាមកំហែងផ្នែកសន្តិសុខនឹងកើនឡើង បើអាម៉េរិកនឹងស្ថិតក្រោមការគ្រប់គ្រងរបស់លោក ត្រាំ ដែលវានឹងនាំឲ្យប៉ះពាល់ដល់យុទ្ធសាស្រ្តអាជីវកម្មរបស់ខ្លួន។

គេនៅចាំបានថា នៅពេលដែលលោក ត្រាំ ដឹកនាំសហរដ្ឋអាម៉េរិក លោកធ្លាប់ទាមទារថ្លៃការពារពីជប៉ុន ហើយក៏បានដាក់សម្ពាធពន្ធលើជប៉ុនផងដែរ ដូច្នេះហើយថ្នាក់ដឹកនាំក្រុមហ៊ុនជប៉ុនមួយបានសរសេរថា ក្រោមការគ្រប់គ្រងរបស់លោកស្រី ហារីស ខ្លួនសង្ឃឹមថា គោលនយោបាយទូទៅរបស់រដ្ឋបាលអាម៉េរិកបច្ចុប្បន្ននឹងត្រូវបានរក្សា ហើយវានឹងផ្តល់នូវទស្សនវិស័យកាន់តែប្រសើរឡើងនាពេលអនាគត។

នៅពេលសួរថា តើការផ្លាស់ប្តូរអ្វីដែលអាចនឹងកើត​មានឡើងប្រសិនបើលោក ត្រាំ ជាប់ឆ្នោត ក្នុងនោះ៣៤%នៃអ្នកចូលរួមស្ទង់មតិបាននិយាយថា យុទ្ធសាស្រ្តប្តូរប្រាក់បរទេសរបស់ពួកគេនឹងត្រូវពិនិត្យឡើងវិញ ខណៈ២៨% បាននិយាយថា ខ្សែច្រវាក់ផ្គត់ផ្គង់របស់ពួកគេនឹងត្រូវបានតម្រឹមឡើងវិញ ហើយ២១% បាននិយាយថា ពួកគេនឹងកាត់បន្ថយប្រតិបត្តិការអាជីវកម្មនៅក្នុងប្រទេសចិន។

ពាក់ព័ន្ធនឹងទំនាក់ទំនងរវាងចិន និងជប៉ុន ការស្ទង់មតិបានបង្ហាញថា មិនថាអ្នកណាឈ្នះការបោះឆ្នោតនៅសហរដ្ឋអាម៉េរិកនោះទេ ក្រុមហ៊ុនជប៉ុន១៣% កំពុងពិចារណាកាត់បន្ថយប្រតិបត្តិការនៅក្នុងប្រទេសចិន ខណៈ៣%កំពុងស្វែងរកការពង្រីកអាជីវកម្មរបស់ពួកគេ ហើយ៤៧% ប្តេជ្ញារក្សាស្ថានភាពបច្ចុប្បន្នដដែល៕

ដោយៈ សរ សុជាតិ