តើលោក ស៊ី ជីនពីង នឹងបង្ហាញវត្តមានក្នុងកិច្ចប្រជុំកំពូលអាស៊ាន នាពេលខាងមុខមែន ឬយ៉ាងណា?

សារព័ត៌មាន Channel News Asia បានរាយការណ៍ថា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានបង្ហាញនូវភាពជឿជាក់ថា ប្រធានាធិបតីចិន លោក ស៊ី ជីនពីង នឹងចូលរួមកិច្ចប្រជុំកំពូលអាស៊ាន ដែលនឹងចាប់ផ្តើមពីថ្ងៃទី២៦-២៨ ខែតុលា នៅទីក្រុងកូឡាឡាំពួរខាងមុខនេះ បើទោះបីជាអាជ្ញាធរចិន មិនទាន់បានបញ្ជាក់ពីការចូលរួមរបស់លោក ស៊ី ក៏ដោយ។ អ្នកវិភាគបានចាត់ទុក ជំនួបជាមួយលោក ដូណាល់ ត្រាំ និងដើម្បីបង្ហាញពីបំណង និងការឱ្យតម្លៃលើទំនាក់ទំនងនយោបាយ និងសេដ្ឋកិច្ចជាមួយអាស៊ាន វាជាជាហេតុផលមួយដែលលោក ស៊ី អាចនឹងបង្ហាញខ្លួនដ៏កម្រនៅក្នុងកិច្ចប្រជុំកំពូលអាស៊ាននាពេលខាងមុខ។ ប្រសិនបើក្តីរំពឹងនេះពិតប្រាកដមែននោះ វត្តមានរបស់លោក ស៊ី នឹងបំបែកទំព័រកំណត់ត្រាការទូតរវាងចិន និងអាស៊ាន។

នៅក្នុងកិច្ចប្រជុំអាស៊ានកន្លងមកមានតែឆ្នាំ១៩៩៧ ម្តងគត់ដែលប្រធានាធិបតីចិន ចូលរួមកិច្ចប្រជុំកំពូលអាស៊ាន ដោយកាលនោះ ចិនស្ថិតនៅក្រោមការដឹកនាំរបស់លោក ចាង ហ្សេមិន (Jiang Zemin) ដោយឡែកលោក ស៊ី បានដឹកនាំកិច្ចប្រជុំកំពូលអាស៊ាន-ចិន ម្តងគត់នៅឆ្នាំ២០២១ ហើយកិច្ចប្រជុំនោះធ្វើឡើងបែបនិម្មិតទៅទៀត។

លោក អ៊ីឡានហ្គោ ការូផានណាន់ (Ilango Karuppannan ) អតីតឯកអគ្គរដ្ឋទូតម៉ាឡេស៊ី ដែលមានបទពិសោធន៍ជាង៣ទសវត្សរ៍ក្នុងកិច្ចការបរទេសបាននិយាយថា ប្រសិនបើលោក ស៊ី បង្ហាញមុខក្នុងកិច្ចប្រជុំកំពូលអាស៊ានមែន នោះវានឹងបង្ហាញសញ្ញាថា ទីក្រុងប៉េកាំងមើលឃើញពីតម្លៃក្នុងដំណើរទស្សនកិច្ចលើសពីរបៀបវារៈនៃកិច្ចប្រជុំកំពូល៕

ដោយៈ សរ សុជាតិ