វិស័យពាណិជ្ជកម្ម

អ្នកជំនាញរំពឹងដំណើរទស្សនកិច្ចរបស់លោក ស៊ី ជីនភីង នឹងជួយស្រូបទាញវិនិយោគិនចិន ឱ្យមកបោះទុនវិនិយោគនៅកម្ពុជា កាន់តែច្រើន


បើមិនមានការប្រែប្រួលទេ លោក ស៊ី ជីនភីង ប្រធានាធិបតីចិននឹងមកបំពេញទស្សនកិច្ចនៅម្ពុជា ជាលើកទី២ នៅពាក់កណ្ដាលខែមេសា ឆ្នាំ២០២៥ នេះ។ ដំណើរទស្សនកិច្ចរបស់កំពូលមេដឹកនាំចិន មកកម្ពុជា លើកនេះ ត្រូវបានអ្នកជំនាញរំពឹងថា នឹងជួយពង្រឹង និងពង្រីកទំនាក់ទំនងការទូត សេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសជួយផ្តល់ទំនុកចិត្តដល់វិនិយោគិនចិន ឱ្យបោះទុនវិនិយោគនៅកម្ពុជា កាន់តែច្រើនបន្ថែមទៀត។
វិស័យពាណិជ្ជកម្ម
ដោយ

អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា រំពឹងថា នៅក្នុងអំឡុងពេលលោក ស៊ី ជីនភីង ប្រធានាធិបតីចិន មកបំពេញទស្សនកិច្ចនៅកម្ពុជា មេដឹកនាំកម្ពុជា និងចិន នឹងមានការពិភាក្សាគ្នាពីការដំឡើង និងផ្លាស់ប្ដូរពាណិជ្ជកម្ម ឱ្យកាន់តែធំជាងមុន ពិសេសការស្រូបយកផលិតផលកសិកម្មរបស់កម្ពុជា ទៅកាន់ទីផ្សារចិន។ សម្រាប់អ្នកជំនួញរូបនេះ ទំនាក់ទំនងការទូត និងសេដ្ឋកិច្ចរវាងកម្ពុជាចិន កំពុងដើរទន្ទឹមគ្នា ខណៈដំណើរទស្សនកិច្ចរបស់លោក ស៊ី ជីនភីង ប្រធានាធិបតីចិន មកកម្ពុជានឹងជំរុញឱ្យអ្នកធុរកិច្ចពីប្រទេសចិន មកកម្ពុជា មានការកើនឡើងថែមទៀត។ ជាការកត់សម្គាល់របស់អ្នកឧកញ៉ា ហ៊ុន ឡាក់ មានវិនិយោគិនចិន បានមកបោះទុនវិនិយោគនៅកម្ពុជា ជាបន្តបន្ទាប់នៅមួយរយៈចុងក្រោយនេះ។

​ដោយឡែក លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា យល់ឃើញថា ដំណើរទស្សនកិច្ចរបស់លោក ស៊ី ជីនភីង ប្រធានាធិបតីចិន មកប្រទេសកម្ពុជា អាចនឹងមានការចុះកិច្ចព្រមព្រៀងមួយចំនួន ដែលផ្ដល់ផលប្រយោជន៍ឱ្យគ្នាទៅវិញទៅមក​ដើម្បីឈានទៅពង្រឹងទំនាក់ទំនងរវាងប្រទេសទាំងពីរឱ្យកាន់តែមានភាពរឹងមាំ។ អ្នកជំនាញរូបនេះ បានចាត់ទុកដំណើរទស្សនកិច្ចរបស់មេដឹកនាំចិន មកកាន់ប្រទេសកម្ពុជា ជាសញ្ញាមួយបង្ហាញឱ្យឃើញពីការបើកចំហរឡើងវិញនៃប្រព័ន្ធសេដ្ឋកិច្ចរបស់ចិន ខណៈសញ្ញានេះ អាចនឹងបង្ហូរឱ្យអ្នកវិនិយោគនិងភ្ញៀវទេសចរចិន ព្រមទាំងមូលធនមួយចំនួនចូលមកប្រទេសកម្ពុជា ផងដែរ។

​សូមបញ្ជាក់ថា នៅក្នុងឆ្នាំ២០២៤ កន្លងទៅ ការដោះដូរពាណិជ្ជកម្មរបស់កម្ពុជា ជាមួយប្រទេសចិន សម្រេចបានទំហំជាង១៥ពាន់លានដុល្លារ កើនឡើងជាង២៣% បើធៀបនឹងឆ្នាំ២០២៣ ក្នុងនោះ កម្ពុជា នាំចេញទៅប្រទេសចិន មានទំហំ១ពាន់៧៥០លានដុល្លារ ខណៈចិន នាំចូលមកកម្ពុជាវិញ មានទំហំជាង១៣ពាន់៤៣៩លានដុល្លារ។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕

អត្ថបទ៖ បូ ដូឡា​




អត្ថបទបន្ទាប់


ឥណទាន ”MyQuickCash” របស់ធនាគារ ហត្ថា - រហ័ស និងងាយស្រួល ដើម្បីជាដំណោះស្រាយហិរញ្ញវត្ថុដល់អតិថិជនកាន់តែប្រសើរ

ធនាគារ ហត្ថា ម.ក ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព…

មកទល់ពេលនេះគម្រោងនាំសម្បុកត្រចៀកកាំរបស់កម្ពុជា ទៅកាន់ទីផ្សារចិន នៅតែមិនទាន់មានពន្លឺ

កម្ពុជា បានចរចាបើកទីផ្សារនាំចេញសម្បុកត្រចៀកកាំទៅកាន់ទីផ្សារចិន ជាយូរមកហើយ តែមកទល់ពេលនេះនៅតែមិនទាន់មានពន្លឺ ថាតើអាចនាំចេញបានទៅពេលណា…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ