ក្រុមហ៊ុនក្នុងស្រុកនិងអន្តរជាតិល្បីៗសរសើរពីសមត្ថភាពបុគ្គលិកជំនាញនៅកម្ពុជា

ស្របពេលដែលប្រជាជនកម្ពុជាមួយចំនួនធ្វើចំណាកស្រុកទៅក្រៅប្រទេស ដើម្បីស្វែងរកការងារធ្វើ ក្រុមហ៊ុនធំៗដែលបានវិនិយោគនៅកម្ពុជាបានលើកឡើងថា ចំនួនការងារនៅកម្ពុជាកំពុងមានការកើនឡើងពីមួយឆ្នាំទៅមួយឆ្នាំ ព្រមទាំងបានស្ងើចសរសើរពីសមត្ថភាពបុគ្គលិកជំនាញកម្ពុជាថា មានភាពប្រកួតប្រជែងប្រដំប្រសងនឹងសមត្ថភាពនៃបណ្ដាប្រទេសក្នុងតំបន់។

ក្រុមហ៊ុន WorldBridge Group

លោក ស្រេម ណារ៉ែន មន្រ្តីជ្រើសរើសបុគ្គលិកជាន់ខ្ពស់ នៃក្រុមហ៊ុន WorldBrigde Group ដែលជាក្រុមហ៊ុនក្នុងស្រុកដ៏ធំមួយ មានក្រុមហ៊ុនបុត្រសម្ព័ន្ធជាង៣០ វិនិយោគលើពហុវិស័យនៅកម្ពុជា បានលើកឡើងថា ក្នុងមួយឆ្នាំៗ ក្រុមហ៊ុនមួយនេះ មានតម្រូវការបុគ្គលិករាប់រយនាក់ ដោយក្នុងនោះ ទាក់ទងនឹងវិស័យដឹកជញ្ជូន សេវាហិរញ្ញវត្ថុ (ក្រុមហ៊ុនទទួលបញ្ចាំ និងធនាគារ) ការអភិវឌ្ឍលើគម្រោងអចលនទ្រព្យធំៗជាច្រើនគម្រោង វិស័យចំណីអាហារនិងភេសជ្ជៈ និងសេវាស្វែងរកការងារធ្វើសម្រាប់ក្រុមហ៊ុននានា ជាដើម។ល។

លោកបន្ថែមថា គិតមកទល់ពេលនេះ ក្រុមហ៊ុន WorldBridge Group មានបុគ្គលិកសរុបប្រមាណជាង ៥០០នាក់ ដែលកំពុងបម្រើការជាអចិន្ត្រៃយ៍ ហើយបើរាប់ទាំងបុគ្គលិក ក៏ដូចជាកម្មករធ្វើការនៅក្នុងគម្រោងអភិវឌ្ឍន៍អចលនទ្រព្យធំៗទៀតនោះ អាចមានរហូតដល់រាប់ម៉ឺននាក់ឯណោះ។

លោក ណារ៉ែន បានឲ្យដឹងទៀតថា តបទៅនឹងការរីកចម្រើនរបស់ក្រុមហ៊ុន WorldBridge Group នៅប្រមាណ៥ឆ្នាំខាងមុខនេះ តម្រូវការបុគ្គលិកសម្រាប់បម្រើការជាអចិន្រ្តៃយ៍ អាចនឹងហក់កើនឡើងរហូតដល់ខ្ទន់រាប់ពាន់នាក់។

លោក ស្រេម ណារ៉ែន មន្រ្តីជ្រើសរើសបុគ្គលិកជាន់ខ្ពស់ នៃក្រុមហ៊ុន WorldBrigde Group

មន្ត្រីជ្រើសរើសបុគ្គលិកជាន់ខ្ពស់រូបនេះ បានគូសបញ្ជាក់ថា ចំនួនការងារនៅក្នុងស្រុកបាននិងកំពុងមានការកើនឡើងពីមួយឆ្នាំទៅមួយឆ្នាំ ជាមួយនឹងការផ្ដល់ជូនប្រាក់ខែសមរម្យ ហើយលោកក៏សំណូមពរដល់អ្នកដែលធ្វើចំណាកស្រុកគួរតែស្វែងរកការងារក្នុងស្រុកធ្វើឲ្យអស់លទ្ធភាពសិន មុនធ្វើចំណាកស្រុកទៅឆ្ងាយពីស្រុកកំណើត ឬធ្វើចំណាកស្រុកទាំងប្រថុយថាន។

ជាមួយគ្នានេះដែរ លោក ឃាង សុឃីន ប្រធានក្រុមផ្នែកធនធានមនុស្សនៃក្រុមហ៊ុន RMA Cambodia ដែលជាក្រុមហ៊ុនអន្តរជាតិដែលបានវិនិយោគលើពហុវិស័យនៅកម្ពុជា បានលើកឡើងដែរថា ត្បិតថា ចំនួនការងារនៅក្នុងស្រុកមានការកើនឡើងក្ដី ប៉ុន្ដែ ការស្វែងរកបុគ្គលិកដែលមានចំណេះនិងជំនាញច្បាស់លាស់ គឺជាកត្តាប្រកួតប្រជែងមួយសម្រាប់ក្រុមហ៊ុនធំៗនៅកម្ពុជា។

ដូច្នេះ អ្នកស្វែងរកការងារ ក៏ដូចជានិស្សិតដែលកំពុងស្វែងរកការងារ ត្រូវតែពង្រឹងបន្ថែមនូវចំណេះ និងជំនាញ ទៅតាមទីផ្សារដែលក្រុមហ៊ុនកំពុងមានតម្រូវការ។ អ្វីដែលពិសេសជាងនេះ គឺការពង្រឹងនូវជំនាញទន់ (Soft Skills) ដែលទាក់ទិននឹងការទំនាក់ទំនងនិងអត្តចរិតល្អជាដើម។

យ៉ាងណាក៏ដោយ លោក សុឃីន បន្តថា សមត្ថភាពរបស់យុវជនកម្ពុជា ដែលកំពុងបម្រើការនៅក្នុងក្រុមហ៊ុនធំៗ គឺមិនអន់នោះទេ តួយ៉ាង ក្រុមហ៊ុន RMA Cambodia ដែលមានបុគ្គលិកសរុបជិត២០០០នាក់នោះ មានបុគ្គលិកដែលជាជនជាតិបរទេសប្រមាណតែ១០%ប៉ុណ្ណោះ។

លោក ឃាង សុឃីន ប្រធានក្រុមផ្នែកធនធានមនុស្សនៃក្រុមហ៊ុន RMA Cambodia

លោកបន្ដថា អ្វីដែលធ្វើឲ្យកម្ពុជានៅពឹងផ្អែកលើបុគ្គលិកដែលជាជនជាតិបរទេស គឺដោយសារតែកម្ពុជានៅខ្វះអ្នកដែលមានជំនាញបច្ចេកទេស ពិសេស អ្នកដឹកនាំកំពូលៗ។

ដូច្នេះហើយទើបនៅគ្រាដំបូង ក្រុមហ៊ុនធំៗភាគច្រើនត្រូវពឹងពាក់អ្នកជំនាញពីក្រៅប្រទេសមកធ្វើការដឹកនាំក្រុមហ៊ុន ហើយក្រោយពីក្រុមហ៊ុននោះបានឈរជើងរឹងមាំហើយ គេនឹងផ្ទេរចំណេះដឹងជំនាញនោះ មកឲ្យអ្នកក្នុងស្រុកដើម្បីរ៉ាប់រងដឹកនាំជំនួសវិញ។

ទាក់ទងទៅនឹងវប្បធម៌ធ្វើការងារជាមួយនឹងជនបរទេសនេះដែរ លោក Chakkree Soithong នាយកប្រតិបត្តិហិរញ្ញវត្ថុក្រុមហ៊ុន Chip Mong Insee ដែលជាក្រុមហ៊ុនមួយត្រូវបានវិនិយោគរួមគ្នាវាងក្រុមហ៊ុនថៃ និងក្រុមហ៊ុនក្នុងស្រុក Chip Mong Group ផលិតស៊ីម៉ងត៍នៅកម្ពុជា បានឲ្យដឹងថា ក្រុមហ៊ុនរបស់លោក មានបុគ្គលិក១០ជាតិសាសន៍ផ្សេងគ្នាកំពុងបម្រើការរួមគ្នា ក្នុងនោះអ្នកជំនាញបច្ចេកទេសភាគច្រើនត្រូវបានបញ្ជូនមកពីក្រៅប្រទេស ហើយក្នុងនោះ ក៏មានអ្នកជំនាញនៅក្នុងស្រុកខ្លះផងដែរ។

លោកបានសរសើរថា អស់រយៈពេល២ឆ្នាំមកហើយ ដែលលោកបានធ្វើការនៅកម្ពុជា ហើយលោកពិតជាភ្ញាក់ផ្អើលនឹងសមត្ថភាពរបស់បុគ្គលិកកម្ពុជា ដែលកំពុងបម្រើការនៅក្រុមហ៊ុនរបស់លោក ព្រោះពួកគេមានឆន្ទៈខ្ពស់ក្នុងការងារ ធ្វើការងារសកម្ម និងតែងតែព្យាយាមអភិវឌ្ឍសមត្ថភាពខ្លួនឯងជាប្រចាំ ដើម្បីឆ្លើយតបតាមការរីកចម្រើនរបស់ក្រុមហ៊ុន។ អ្វីដែលសំខាន់ជាងនេះទៀត ដែលធ្វើឲ្យលោកមិនសរសើរមិនបាននោះ គឺ ឥរិយាបថនៃផ្នត់គំនិតរបស់បុគ្គលិកកម្ពុជា ហើយលោកជឿថា ពួកគេក៏អាចមានសមត្ថភាពគ្រប់គ្រាន់ក្នុងការប្រកួតប្រជែងជាមួយបណ្ដាប្រទេសនានាបានផងដែរ។

លើសពីនេះទៀត បើតាមការអះអាងពីលោក Chakkree Soithong នៅប្រមាណ១០ឆ្នាំខាងមុខទៀត រោងចក្រផលិតធំៗនឹងអាចកាត់បន្ថយការនាំយកអ្នកជំនាញបច្ចេកទេសសំខាន់ៗពីក្រៅប្រទេស ហើយប្រជាជនក្នុងស្រុកនឹងអាចមានសមត្ថភាពពេញលេញក្នុងការគ្រប់គ្រងការងារទាំងអស់នេះបានដោយជោគជ័យ ព្រោះលោកជឿទៅលើការវិឌ្ឍនៃធនធានមនុស្សរបស់កម្ពុជា ពិសេស គឺការបង្ហាញយ៉ាងច្បាស់ពីសក្ដានុពលធនធានមនុស្សនាពេលបច្ចុប្បន្ន។

សូមបញ្ជាក់ដែរថា តាមរបាយការណ៍ពីក្រសួងការងារ ក្នុងរយៈពេលជាង២០ឆ្នាំមកនេះ កម្ពុជាមានការងារចំនួនជាង ៣លាន ៦សែនការងារ ត្រូវបានបង្កើឡើងនៅក្នុងវិស័យឧស្សហកម្ម និងសេវាកម្ម និងចំនួន ៧សែនការងារទៀត ក្នុងវិស័យកសិកម្ម។ កំណើនការងារនេះក៏បានធ្វើឲ្យអត្រាអ្នកគ្មានការងារធ្វើ ត្រូវបានកាត់បន្ថយមកត្រឹមកម្រិតក្រោម ១% ខណៈដែលអត្រាភាពក្រីក្រនៅទូទាំងប្រទេសបានថយចុះមកនៅត្រឹម ១៣.៥% ក្នុងឆ្នាំ២០១៤៕