ប្រមុខរាជរដ្ឋាភិបាលកម្ពុជា សម្តេច តេជោ ហ៊ុន សែន ធ្លាប់បានលើកឡើងនៅក្នុងវេទិការធុរៈកិច្ច កម្ពុជា ចិន ដែលបានធ្វើឡើងនៅសណ្ឋាគារ ហ្គាដិនស៊ីធី កាលពីពេលកន្លងទៅថា សម្ដេចតេជោ បានចាត់ទុក តំបន់អភិវឌ្ឍន៍ទីក្រុងរណបរបស់ឯកឧត្តម អ្នកឧកញ៉ា លី យ៉ុងផាត់ ថាជា បុប្ផាលាក់ខ្លួន ដែលគេមិនទាន់ដឹងច្រើននៅឡើយ ដែលនៅថ្ងៃអនាគតតំបន់នេះ នឹងក្លាយជាទីក្រុងដ៏ល្អមួយរបស់កម្ពុជា។
សម្តេចតេជោ មានប្រសាសន៍យ៉ាងដូច្នេះថា «កន្លែងនេះ [តំបន់ទីក្រុងរណបលីយ៉ុងផាត់] ដូចជាបុប្ផាលាក់ខ្លួនមួយអ៊ីចឹង! គេមិនទាន់ដឹងថា មានសណ្ឋាគារផ្កាយប្រាំនៅទីនេះ ហើយនឹងតារាងកូនហ្គោល ប៉ុន្ដែកន្លែងនេះ នឹងក្លាយជាអនាគតទីក្រុងមួយ ហើយពេលនេះ មិត្តចិនក៏កំពុងតែជួយសាងសង់ នូវពហុកីឡដ្ឋានមួយ ដើម្បីឲ្យកម្ពុជាធ្វើជាម្ចាស់ផ្ទះស៊ីហ្គេមឆ្នាំ២០២៣»។
អត្ថបទទាក់ទង
គម្រោងដែលបានសាងសង់រួចនៅក្នុងតំបន់អភិវឌ្ឍន៍ទីក្រុងរណបនេះមានដូចជា សណ្ឋាគារផ្កាយប្រាំ និងកន្លែងវាយកូនហ្គូល ក៏មានសួនសត្វភ្នំពេញសាហ្វារី និងស្ថានីយទូរទស្សន៍ ភីអិនអិនផងដែរ។
បន្ថែមពីនេះ គម្រោងកំពុងអភិវឌ្ឍន៍នៅតំបន់ទីក្រុងរណបនេះ មានដូចជា ពហុកីឡដ្ឋានមរតកតេជោ ស្តូបវិមានអនុស្សាវរីយ៍នយោបាយឈ្នះឈ្នះ និងគម្រោងវិនិយោគដ៏ធំមួយទៀត របស់អ្នកឧកញ៉ា លី យ៉ុងផាត់ដែរ គឺសួនទឹកកម្សាន្ដដ៏ទំនើបធំជាងគេបង្អស់នៅកម្ពុជា ហើយក៏ធំជាងគេបង្អស់នៅក្នុងតំបន់អាស៊ីផងដែរ។
គម្រោងថ្មីសួនទឹកកម្សាន្ដដ៏ធំនេះ ត្រូវបានដឹងថា នឹងចំណាយទឹកបា្រក់ប្រមាណ ៣០លានដុល្លារអាមេរិក ដែលបច្ចុប្បន្នបាននិងកំពុងសាងសង់ប្រព័ន្ធហេដ្ឋារចនាសម្ព័ន្ធបានមួយចំនួនហើយ។
លោកឧកញ៉ា លី យ៉ុងផាត់ ស្ថាបនិកនិងជាប្រធានប្រឹក្សាភិបាលក្រុមហ៊ុន L.Y.P. Group។ រូបភាព៖ ហេង ភារម្យ
ជាមួយគ្នានេះ ក៏គម្រោងការវិនិយោគទីក្រុងមិត្តភាពកម្ពុជា-ចិន ដ៏ធំមួយ ឬហៅថា ឆាយណា ថោន ក៏កំពុងតែដំណើរការទៅតាមផែនការ ដែលមានទីតាំងស្ថិតនៅក្នុងទីក្រុងរណបនេះដែរ។
ក្រុមហ៊ុនវិនិយោគចិនដ៏ល្បីល្បាញមួយ ដែលមានឈ្មោះថា ចុង មិញថូវ បានបោះទុនវិនិយោគរួមគ្នាក្នុងទឹកបា្រក់ប្រមាណ ១៥០០លានដុល្លារអាមេរិក សាងសង់នៅលើផ្ទៃដីប្រមាណ ៥៥០ហិកតា ជាមួយនឹងក្រុមហ៊ុនក្នុងស្រុកដ៏ធំមួយ គឺ ក្រុមហ៊ុន អិល វ៉ាយ ភី គ្រុប ដើម្បីបង្កើតឲ្យមានការសាងសង់ទីក្រុងមិត្តភាព ចិន-កម្ពុជានេះឡើង។អត្ថបទគួរអាន!
ជុំវិញទៅនឹងការបង្កើតឲ្យមានទីក្រុងមិត្តភាពកម្ពុជា-ចិន នៅកម្ពុជា សុទ្ធតែបានការអបអរសាទរពីក្រុមអ្នកជំនាញតាមដានសេដ្ឋកិច្ចសង្គម មន្ត្រីរដ្ឋាភិបាល សង្គមស៊ីវិល ថា នេះជាសញ្ញាដ៏ល្អ ដែលកម្ពុជានឹងទទួលបានប្រយោជន៍ពីការអភិវឌ្ឍរីកចម្រើនមួយកម្រិតទៀត។
សូមជម្រាបថា ទីក្រុងរណបលីយ៉ុងផាត់ ឬទីក្រុងរណបហ្គាដិនស៊ីធី នេះ មានផ្ទៃដីសរុបជាង ១ពាន់ហិកតា ដែលមានទីតាំងស្ថិតនៅ ភាគខាងជើងរាជធានីភ្នំពេញ និងជាប់ភាគខាងជើងនៃទីក្រុងរណបជ្រោយចង្វារ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ ពោលគឺប្រមាណ ១៨គីឡូម៉ែត្រពីរាជធានីភ្នំពេញ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
