ពិព័រណ៍អចលនទ្រព្យកម្ពុជាលើកទី២ ដែលនឹងប្រព្រឹត្តទៅនៅថ្ងៃទី៦ និងទី៧ ខែតុលាខាងមុខនេះ ត្រូវបានអ្នកជំនាញអះអាងថា គឺជាវេទិកាសំខាន់មួយសម្រាប់វិនិយោគិនក្នុងស្រុក និងអន្តរជាតិ អាចស្វែងយល់ពីបច្ចុប្បន្នភាពទីផ្សារអចលនទ្រព្យរបស់កម្ពុជា ដើម្បីជំរុញដល់ការវិនិយោគមកកាន់កម្ពុជាកាន់តែច្រើនឡើង។
លោក Tom O’Sullivan នាយកប្រតិបត្តិក្រុមហ៊ុន Realestate.com.kh បានលើកឡើងថា កម្ពុជាកំពុងទទួលបានការចាប់អារម្មណ៍យ៉ាងខ្លាំងពីសំណាក់វិនិយោគិនអចលនទ្រព្យអន្តរជាតិ ទាំងប្រទេសក្នុងតំបន់អាស៊ាន ប្រទេសចិន និងពិភពលោក។
លើសពីនេះ បើធៀបទៅនឹងប្រទេសជិតខាង កម្ពុជាគឺមានភាពអំណោយផលយ៉ាងខ្លាំងសម្រាប់វិនិយោគិនបរទេសក្នុងការបណ្ដាក់ទុនរកស៊ីនៅកម្ពុជា តួយ៉ាង ការផ្ដល់ជូននូវកម្មសិទ្ធិស្របច្បាប់សម្រាប់ជនបរទេស និងមានកំណើននៃការវិនិយោគខ្លាំងក្លាពីមួយឆ្នាំទៅមួយឆ្នាំ។
តើអ្នកបានអានអត្ថបទនេះ ឬនៅ?
លោកបន្ថែមថា ដូច្នេះ ព្រឹត្តិការណ៍ពិព័រណ៍អចលនទ្រព្យកម្ពុជាលើកទី២នេះ នឹងបង្ហាញកាន់តែច្បាស់ពីសក្ដានុពលទីផ្សារអចលនទ្រព្យរបស់កម្ពុជា ទៅកាន់ពិភពលោក និងផ្ដល់ឱកាសសម្រាប់វិនិយោគិនក្នុងស្រុក ក្នុងការស្វែងរកឱកាសសម្រាប់សហការក្នុងភាពជាដៃគូអាជីវកម្មជាមួយក្រុមហ៊ុនអន្តរជាតិធំៗជាច្រើនផងដែរ។
ពិព័រណ៍អចលនទ្រព្យលើកទី២នេះ នឹងមានគម្រោងអចលនទ្រព្យធំៗជិត៣០គម្រោង នឹងចូលរួមដាក់បង្ហាញលក់គម្រោងរបស់ខ្លួន ហើយក្នុងនោះ ក៏មានការចែករំលែកព័ត៌មានគន្លឹះសំខាន់ៗក្នុងការវិនិយោគលើវិស័យអចលនទ្រព្យ ពីសំណាក់វាគ្មិនដែលជាអ្នកជំនាញ និងអ្នកអភិវឌ្ឍអចលនទ្រព្យធំៗជាច្រើននាក់ផងដែរ។
សូមជម្រាបដែរថា កម្មវិធីពិព័រណ៍អចលនទ្រព្យលើកទី១ កាលពីខែឧសភាកន្លងទៅ បានទាក់ទាញភ្ញៀវជាតិ និងអន្តរជាតិចូលរួមជាង ៣០០០នាក់ ខណៈដែលការលក់អចលនទ្រព្យនៅក្នុងកម្មវិធីពិព័រណ៍នោះ គិតជាទឹកប្រាក់ប្រមាណ៣លានដុល្លារអាមេរិក៕
