សួនសត្វធំជាងគេនៅកម្ពុជាបើកឲ្យចូលទស្សនាថ្ងៃទី១ មេសា ខាងមុខ!

បន្ទាប់ពីពន្យារពេលម្តងហើយម្តងទៀត នៅទីបំផុត សួនសត្វដ៏ធំជាងគេបំផុតនៅកម្ពុជា និងជាព្រៃកម្សាន្តភ្នំពេញទីមួយ ដែលមានឈ្មោះថា ភ្នំពេញសាហ្វារី នឹងចាប់បើកដំណើរការផ្លូវការ ឲ្យប្រជាជនចូលទស្សនាកម្សាន្ត នៅថ្ងៃទី១ ខែមេសា ឆ្នាំ២០១៨ នេះហើយ។

ទិដ្ឋភាពខ្លះៗនៃសួនសត្វ សាហ្វារី ភ្នំពេញ។

លោក ចារ៉េ ខាន់មេន ជាអ្នកគ្រប់គ្រងសួនសត្វ ភ្នំពេញ សាហ្វារី បានប្រាប់សារព័ត៌មានអេឡិចត្រូនិក ខេមបូណូមីស ឲ្យដឹងថា សួនសត្វនេះនឹងបើកជាផ្លូវការនៅថ្ងៃទី១ ខែមេសា ខាងមុខនេះហើយ។

លោកថា ការយឺតយ៉ាវកន្លងមក ដោយសារតែការរៀបចំផ្នែកខាងក្នុងមិនទាន់រួចរាល់ ជាពិសេស ការសាងសង់ផ្លូវតភ្ជាប់ទៅកាន់សួនសត្វដ៏ធំជាងគេនៅកម្ពុជា ក្បែររាជធានីភ្នំពេញ នេះតែម្តង។ លោក ចារ៉េ បានឲ្យដឹងថា សួនសត្វថ្មីនេះបានវិនិយោគសាងសង់ក្នុងទឹកប្រាក់អស់ប្រមាណជាង ១០លានដុល្លារអាមេរិក។

សួនសត្វដ៏ធំមួយនេះ អភិវឌ្ឍសាងសង់ដោយអ្នកឧកញ៉ា លី យ៉ុងផាត់ ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន អិល វ៉ាយ ភី គ្រុប ដែលស្ថិតនៅក្នុងតំបន់អភិវឌ្ឍន៍ទីក្រុងរណបថ្មី របស់អ្នកឧកញ៉ា លី យ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វារ ប្រមាណ ១៨គីឡូម៉ែត្រ ពីរាជធានីភ្នំពេញ។

លក្ខណៈពិសេសរបស់សួនសត្វ ភ្នំពេញ សាហ្វារី ចែកចេញជាបួនតំបន់សំខាន់ៗ មានដូចជា ទី១ កន្លែងសម្តែងសត្វខ្លា ទី២ កន្លែងសម្តែងសត្វក្រពើ ទី៣ កន្លែងសម្តែងសត្វស្វា អ៊ូរ៉ង់អ៊ូតង់ និងទី៤ កន្លែងសម្តែងសត្វសេក មកពីអាហ្វ្រិក និងមកពីប្រទេសផ្សេងៗទៀត។

ក្រៅពីបួនទីតាំងសំខាន់ៗខាងលើនេះ នៅមានកន្លែងសត្វជាច្រើនប្រភេទទៀតសម្រាប់ទស្សនា ហើយក៏មានសួនទឹកសម្រាប់ជិះទូកកម្សាន្ត និងកន្លែងក្មេងលេងផងដែរ។

សួនសត្វដ៏ធំជាងគេមួយនេះ ហ៊ុមព័ទ្ធទៅដោយរចនាបថដ៏សម្បូរបែបទាំងក្នុងនិងក្រៅ អមជាមួយនឹងព្រៃឈើរាប់ហិកតា នឹងក្លាយជាចំណុចទាក់ទាញភ្ញៀវទេសចរជាតិនិងអន្តរជាតិ ពោលជាតំបន់ទេសចរណ៍ដ៏សំខាន់សម្រាប់រាជធានីភ្នំពេញ ក៏ដូចជាប្រទេសកម្ពុជាផងដែរ។

ទីក្រុងចិនវិនិយោគទឹកប្រាក់១៥០០លានដុល្លារ ក៏ស្ថិតនៅក្បែរតំបន់សួនសត្វនេះដែរ

ការវិនិយោគសួនសត្វកម្សាន្តដ៏ធំនេះ ស្ថិតនៅក្នុងគម្រោងវិនិយោគជាច្រើនទៀត ដែលកំពុងដំណើរការសកម្មភាពយ៉ាងខ្លាំងនៅក្នុងទីក្រុងរណបរបស់អ្នកឧកញ៉ា លី យ៉ុងផាត់។ ជាក់ស្តែង ការវិនិយោគទីក្រុងមិត្តភាពកម្ពុជា-ចិន ឬហៅថា ឆាយណា ថោន ក៏កំពុងតែដំណើរការទៅតាមផែនការ ដែលមានទីតាំងក្នុងទីក្រុងរណប ជាមួយគ្នានឹងសួនសត្វ ភ្នំពេញ សាហ្វារី នេះដែរ។

ក្រុមហ៊ុនវិនិយោគចិនដ៏ល្បីល្បាញមួយដែលមានឈ្មោះថា ចុង មិញថូវ បានបោះទុនវិនិយោគរួមគ្នាក្នុងទឹកបា្រក់ប្រមាណ ១៥០០លានដុល្លារអាមេរិក ជាមួយនឹងក្រុមហ៊ុនក្នុងស្រុកដ៏ធំមួយ គឺ ក្រុមហ៊ុន អិល វ៉ាយ ភី គ្រុប ដើម្បីបង្កើតឲ្យមានការសាងសង់ទីក្រុងមិត្តភាព ចិន-កម្ពុជា នេះឡើង។

ហើយទីក្រុងមិត្តភាពកម្ពុជា-ចិន សាងសង់នៅលើផ្ទៃដីប្រមាណ ៥៥០ហិកតា។ ជុំវិញទៅនឹងការបង្កើតឲ្យមានទីក្រុងមិត្តភាពកម្ពុជា-ចិន នៅកម្ពុជា សុទ្ធតែបានការអបអរសាទរពីក្រុមអ្នកជំនាញតាមដានសេដ្ឋកិច្ចសង្គម មន្ត្រីរដ្ឋាភិបាល សង្គមស៊ីវិល ថា នេះជាសញ្ញាដ៏ល្អ ដែលកម្ពុជានឹងទទួលបានប្រយោជន៍ពីការអភិវឌ្ឍរីកចម្រើនមួយកម្រិតទៀត៕