ជាមួយគ្នានេះ កម្ពុជាឯណេះវិញក៏បាននិងកំពុងខ្នះខ្នែងរកវិធីដើម្បីឲ្យសហភាពអឺរ៉ុបដកកាតក្រហម ដែលហាមឃាត់ការនាំចូលផលនេសាទពីកម្ពុជាឲ្យបានឆាប់ផងដែរ។
ក្រុមហ៊ុននាំចេញផលនេសាទសមុទ្ររបស់វៀតណាម នៅឆ្នាំនេះ កំពុងដេកមិនលក់បក់មិនល្ហើយទេ ដ្បិតថា កំពុងជួបនឹងបទប្បញ្ញតិថ្មីមួយទៀតហើយ ពីសហភាពអឺរ៉ុប និងអាមេរិក ដែលជាទីផ្សារនាំចេញផលនេសាទសមុទ្រដ៏ធំរបស់វៀតណាម។
បញ្ញតិថ្មីនេះក៏បានធ្វើវៀតណាមត្រូវប្រឈមនឹងការទទួលបានកាតលឿងសម្រាប់ការនាំចេញទៅអឺរ៉ុប ហើយក្រុមហ៊ុននាំចេញផលនេសាទសមុទ្រធំៗ និងរដ្ឋាភិបាលវៀតណាមកំពុងខ្វាយខ្វល់ក្នុងចិត្ត បារម្ភថា មិនអាចនឹងបំពេញសមាសភាពគ្រប់គ្រាន់ដើម្បីឆ្លើយតបទៅនឹងបទប្បញ្ញតិនេះ។ នេះបើតាមការចុះផ្សាយពីគេហទំព័រ Vietnamnews។
យ៉ាងណាក៏ដោយ សេចក្តីសម្រេចថា វៀតណាមនឹងត្រូវបានកាតលឿង ឬក៏អត់នោះ សហភាពអឺរ៉ុបនឹងបង្ហាញផ្លូវការនៅកិច្ចប្រជុំនាថ្ងៃទី២០ ខែតុលាខាងមុខ ជាមួយនឹងរដ្ឋាភិបាលវៀតណាម ខណៈដែលកាលពីថ្ងៃទី៣០ កញ្ញា កន្លងទៅ គឺជាថ្ងៃផុតកំណត់នៃការបង្ហាញពីភាពស្របច្បាប់របស់វៀតណាមដើម្បីឆ្លើយតបទៅនឹងការតម្រូវនៃបទប្បញ្ញតិនេសាទរបស់សហភាពអឺរ៉ុប។
តើអ្នកបានអានអត្ថបទនេះ ឬនៅ?
មិនមែនភ័យអីតែវៀតណាមនោះទេ កម្ពុជាយើងឯណេះវិញក៏រងទុក្ខយូរខែឆ្នាំមកហើយដែរ ដែលត្រូវបានអឺរ៉ុបឲ្យកាតក្រហម មិនឲ្យនាំចូលផលនេសាទសមុទ្រទៅក្នុងទីផ្សារអឺរ៉ុប។ បើតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការពិន័យកាតក្រហមមកលើកម្ពុជានេះ គឺដោយសារតែសហភាពអឺរ៉ុបបានរកឃើញទូកនេសាទរបស់កម្ពុជាបានធ្វើការនេសាទមិនស្របច្បាប់ កាលពីពេលកន្លងទៅ។
ទោះយ៉ាងណា រាជរដ្ឋាភិបាលនឹងនៅតែបន្តជំរុញឲ្យសហភាពអឺរ៉ុប ដកកាតក្រហមចេញពីកម្ពុជា ដើម្បីបើកចំហទ្វារទីផ្សារជលផលសមុទ្រកម្ពុជា សម្រាប់នាំចេញទៅកាន់អឺរ៉ុប។ មិនខុសពីវៀតណាមនោះទេ កាលពីពេលថ្មីៗនេះ ប្រទេសថៃក៏ទើបទទួលបានកាតលឿងពីសហភាពអឺរ៉ុប ទាក់ទងនឹងការរកឃើញពីបទល្មើសនេសាទនេះដែរ។
សូមបញ្ជាក់ថា សហភាពអឺរ៉ុប គឺជាទីផ្សារនាំចេញដ៏សំខាន់សម្រាប់ប្រទេសនៃតំបន់អាស៊ីអាគ្នេយ៍ ហើយការនាំចូលផលនេសាទសមុទ្រនេះទៀត ត្រូវបានសហភាពអឺរ៉ុបមានការប្រុងប្រយ័ត្នខ្ពស់ និងរឹតត្បិតយ៉ាងខ្លាំង ទាំងផ្នែកគុណភាពនៃផលិតផល និងភាពស្របច្បាប់នៃការនេសាទ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
