បើតាមអ្នកគ្រប់គ្រងគម្រោង តំបន់ទេសចរណ៍ថ្មី WB Arena បានអះអាងប្រាប់ខេមបូណូមីសថា តំបន់ដែលកំពុងសាងសង់ឡើងនេះ មានទីតាំងនៅតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែក្រោម ចម្ងាយប្រមាណតែជាង ២គីឡូម៉ែត្រប៉ុណ្ណោះ ពីស្ពានអាកាសព្រះមុនីវង្ស។
លក្ខណៈពិសេសរបស់តំបន់ទេសចរណ៍ប្លែកភ្នែក WB Arena នេះ គឺមានបរិយាកាសស្រស់ស្រាយ បែបធម្មជាតិពិតៗទាំងអាហារដែលដាក់លក់ដូរនៅទីនោះ និងដំណើរកម្សាន្ដបែបជិះទូកតាមដងទន្លេគយគន់សម្រស់រាជធានីភ្នំពេញ។
រូបប្លង់គំរូ របស់ តំបន់ទេសចរណ៍ WB Arena
លើសពីនោះWB Arena ក៏ជាកន្លែងកម្សាន្ដដ៏ស័ក្ដិសមបំផុត សម្រាប់ការមកកម្សាន្ដជាលក្ខណៈគ្រួសារ ហើយភ្ញៀវទេសចរក៏អាចធ្វើដំណើរតាមទូកទស្សនាទេសភាពដ៏ស្រស់ត្រកាលតាមដងទន្លេមេគង្គ និងទន្លេបាសាក់។ ទីតាំងចំណតសម្រាប់ការធ្វើដំណើរកម្សាន្ដជិះទូកនេះ នឹងចាកចេញពីកំពង់ចម្លងនៅជិត NagaWorld ឬ Wat Phnom នឹងមកដល់ចំណត WB Arena ដោយផ្ទាល់។
អ្នកគ្រប់គ្រងដដែលនេះ បានគូសបញ្ជក់ទៀតថា មកទល់ពេលនេះ ចំនួនហាងត្រូវបានជួលចេញ មានចំនួន ៧០% ហើយ ក្នុងរយៈពេលបើកជួលត្រឹមតែ ៣ខែប៉ុណ្ណោះ ខណៈដែលហាងនៅទល់មុខនឹងមាត់ទន្លេមួយចំនួនទៀត នៅសល់មិនទាន់មានម្ចាស់ជួលនៅឡើយ។
រូបប្លង់គំរូ របស់ តំបន់ទេសចរណ៍ WB Arena
WB Arena គឺជាកន្លែងថ្មី ទីតាំងស្អាត បរិយាកាសល្អបរិសុទ្ធ និងមានអាហារដ្ឋានបែបទំនៀមទម្លាប់ខ្មែរ ចិន អឺរ៉ុប និងអាហារជាច្រើនប្រភេទទៀត។ បន្ថែមពីនេះ WB Arena ក៏មានកន្លែងកម្សាន្ដផ្សេងៗទៀត រួមមាន ក្រុមរបាំ ការប្រគុំតន្រ្តី និងអ្នកសម្ដែងប្រចាំតំបន់ផងដែរ។ តំបន់ទេសចរណ៍ដ៏ពិសេស និងថ្មីសន្លាងមួយនេះ នឹងក្លាយជាទីដ៏សែនមនោរម្យមួយ សម្រាប់ភ្ញៀវទេសចរជាតិ និងអន្ដរជាតិ អាចមកលំហែកាយពេលសម្រាកពីការងារ។ នេះបើតាមការអះអាងពីអ្នកគ្រប់គ្រងគម្រោងអភិវឌ្ឍន៍តំបន់ទេសចរណ៍មួយនេះ។
ផ្លូវដើរតាមមាត់ទន្លេ សម្រាប់ភ្ញៀវទេសចរដើរកម្សាន្ដ មានទំហំរហូតដល់ ៣ពាន់ម៉ែត្រការ៉េ ដែលមានដើមត្នោតជាជួរតុបតែងភ្លើងលម្អ និងរចនាបទគួរឲ្យទាក់ទាញ នៅតាមបណ្តោយទន្លេបាសាក់។
អត្ថបទគួរអាន!
តាមអ្វីដែលជាផែនការ ក៏មានសាលមហោស្រពធំមួយទៀត នៅទីនោះផងដែរ ដែលមានកន្លែងអង្គុយចំនួន ៤០០កៅអី មានការសម្តែងរៀងរាល់ថ្ងៃ ពីអ្នកសម្ដែងក្នុងស្រុក និងអន្តរជាតិ ព្រមទាំងមាន ការប្រគំតន្ត្រី ព្រឹត្តិការណ៍កីឡា និងកម្មវិធីសម្ដែងវប្បធម៌ប្រពៃណីខ្មែរជាដើម។
ជាមួយគ្នានោះ តំបន់ទេសចរណ៍ដ៏ពិសេសមួយនេះ ក៏មានផ្សារវប្បធម៌ Khmer Culture Market នៅទីនោះផងដែរ។ ផ្សារនេះ មានហាងចំនួន៩០ និងមានលក់សម្លៀកបំពាក់ គ្រឿងអលង្ការ វត្ថុអនុស្សាវរីយ៍ និងសម្ភារជាច្រើនទៀត។ លើសពីនេះទៅទៀត តំបន់ទេសចរណ៍ WB Arena ក៏មជ្ឈមណ្ឌលសម្រាកលំហែកាយ ដែលផ្តល់នូវការម៉ាស្សា ការព្យាបាលបែបសុខភាព និងថែរក្សាសម្ផស្សផងដែរ។
តើអ្នកត្រៀមខ្លួន រួចរាល់ហើយឬនៅ សម្រាប់ដំណើរកម្សាន្ដដ៏ទាក់ទាញមួយនេះ?
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
