​ ខេមបូណូមីស

បំណែកសាច់បង្កកខូចគុណភាព និងខុសច្បាប់ជាង២៣០តោន ត្រូវបានមន្រ្តីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប) បង្រ្កាប បានរឹបអូសយកទៅកម្ទេចចោលនៅក្នុងរយៈពេល៦ខែកន្លងមកនេះ។ ចំនួននេះមានការថយចុះប្រមាណ៤៣តោន បើប្រៀបធៀបនឹងរយៈពេលដូចគ្នាកាលពីឆ្នាំ២០២៣។ ទោះបីអាជ្ញាធរបានបង្ក្រាប និងរឹបអូសសាច់បង្កកខុសច្បាប់ និងខូចគុណភាពបានជាបន្តបន្ទាប់ក្តី តែសាច់ប្រភេទនេះនៅតែសង្កេតមានដាក់ចរាចរលក់នៅលើទីផ្សារ ដោយអាជ្ញាធរសន្មតថា អាចនាំចូលក្នុងទ្រង់ទ្រាយតូចៗតាមច្រងរបៀង។