យោងតាមរបាយការណ៍ដែលផ្ដល់ដោយ លោក កេន លូ អគ្គលេខាធិការសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា បង្ហាញថានៅឆ្នាំ២០២៣នេះ កម្រិតប្រាក់ឈ្នួលក្នុងវិស័យកាត់ដេរនៅកម្ពុជា ខ្ពស់ជាងបណ្ដាប្រទេសមួយចំនួនក្នុងតំបន់ ដូចជា វៀតណាម ហ្វីលីពីន ឥណ្ឌូនេស៊ី ឡាវ និងមីយ៉ាន់ម៉ា។ ដោយឡែក ទាក់ទងនឹងចំនួនម៉ោងការងារប្រចាំឆ្នាំនៅកម្ពុជាវិញ ធៀបនឹងបណ្ដាប្រទេសកំពុងអភិវឌ្ឍន៍ កម្ពុជាជាប់ចំណាត់ថ្នាក់លេខ៨ ដែលមានចំនួនម៉ោងធ្វើការច្រើនជាងគេ ខណៈប្រទេសថៃជាប់ចំណាត់ថ្នាក់លេខ១ ហើយវៀតណាមជាប់ចំណាត់ថ្នាក់លេខ២។
យ៉ាងណាក៏ដោយចុះ អ្នកជំនាញយល់ឃើញថា ស្ថានភាពប្រាក់ឈ្នួលកម្មករក្នុងវិស័យកាត់ដេរនៅកម្ពុជា នាពេលបច្ចុប្បន្ន មានលក្ខណៈល្អប្រសើរ ក៏ប៉ុន្តែ ហាក់នៅមានកម្រិតនៅឡើយ បើធៀបទៅមួយចំនួនក្នុងតំបន់។ លោក អាត់ ធន់ ប្រធានសហជីពកម្មករកាត់ដេរនៅកម្ពុជា យល់ឃើញថា ប្រាក់ឈ្នួលអប្បបរមាកម្មករកាត់ដេរនៅកម្ពុជា ហាក់មិនសូវខុសគ្នាប៉ុន្មាននោះទេ បើធៀបទៅនឹងបណ្ដាប្រទេសមួយចំនួនក្នុងតំបន់។ ដោយឡែក បើធៀបនឹងប្រទេសថៃ និងម៉ាឡេស៊ី ប្រាក់ឈ្នួលកម្មករកាត់ដេរនៅកម្ពុជា ហាក់នៅមានកម្រិតនៅឡើយ។
បើទោះបីជាប្រាក់ឈ្នួលកម្មករនៅក្នុងវិស័យកាត់ដេរកំពុងមានខ្ពស់ជាប្រទេសជាច្រើនក្ដី ប៉ុន្ដែ ក្រសួងការងារ និងវិស័យឯកជននៅតែបន្ដពិភាក្សាលើការដំឡើងប្រាក់ឈ្នួលអប្បបរមាជូនកម្មករនៅឆ្នាំក្រោយទៀត។
អត្ថបទគួរអាន
យ៉ាងណាក៏ដោយ ជុំវិញកិច្ចពិភាក្សាលើកទី១ ស្ដីពីការកំណត់ប្រាក់ឈ្នួលកម្មករកាត់ដេរឆ្នាំ២០២៤ កាលពីថ្ងៃទី១៦ ខែសីហាក ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ គូសបញ្ជាក់ថា ចំពោះប្រាក់ឈ្នួលអប្បបរមាកម្មករកាត់ដេរសម្រាប់ឆ្នាំ២០២៤ ភាគីពាក់ព័ន្ធនៅមិនទាន់អាចកំណត់ជាតួលេខនៅឡើយនោះទេ និងរង់ចាំការពិភាក្សាបន្ថែមទៀត។ ក្នុងនោះ ភាគីពាក់ព័ន្ធទាំងអស់បានកំណត់កាលបរិច្ឆេទ នៅថ្ងៃទី២៨ ខែសីហា ឆ្នាំ២០២៣ ដើម្បីពិភាក្សាបន្ត ក្នុងគោលបំណងកំណត់នូវប្រាក់ឈ្នួលអប្បបរមាកម្មករកាត់ដេរសម្រាប់ឆ្នាំ២០២៤។
ដោយឡែក អ្នកឧកញ៉ា លី ឃុនថៃ ប្រធានសមាគមរោងចក្រស្បែកជើងនៅកម្ពុជា បានអះអាងថា ការកំណត់ប្រាក់ឈ្នួលកម្មករកាត់ដេរឆ្នាំ២០២៤ នឹងត្រូវធ្វើឡើងជាច្រើនលើកច្រើនសារទៀត ដើម្បីឈានទៅសម្រេចបាននូវតួលេខដ៏ជាក់លាក់មួយ។ សម្រាប់អ្នកឧកញ៉ា លី ឃុនថៃ មុននឹងកម្ពុជាសម្រេចកំណត់ប្រាក់ឈ្នួលថ្មីសម្រាប់កម្មករក្នុងវិស័យកាត់ដេរ ទាមទាភាគីពាក់ព័ន្ធសិក្សាលម្អិតអំពីស្ថានភាពសង្គម-សេដ្ឋកិច្ច របស់បណ្ដាប្រទេសក្នុងតំបន់ និងពិភពលោក ជាពិសេសតម្រូវការទីផ្សារ តែម្ដង។
គួរជម្រាបថា នៅក្នុង២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមានចំនួន ២០០ដុល្លារក្នុងមួយខែ។ ជាមួយគ្នានោះ ប្រសិនបើបូកនិងប្រាក់អត្ថប្រយោជន៍ផ្សេងៗបន្ថែម កម្មករនិយោជិតម្នាក់អាចទទួលបានប្រាក់ឈ្នួល ចន្លោះពី ២១៧ ទៅ ២២៨ដុល្លារក្នុងមួយខែ។ យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជជីវៈ ប្រាក់ឈ្នួលអប្បបរមារបស់ប្រទេសវៀតណាម គឺ១៦៦ដុល្លារ ដែលនេះទាបជាងប្រាក់ឈ្នួលអប្បបរមារបស់កម្ពុជា ក្នុងឆ្នាំ២០២៣ ប្រមាណ ៣៤ដុល្លារ ឯណោះ។ ក៏ប៉ុន្តែ សម្រាប់ប្រាក់ឈ្នួលអប្បបរមារបស់ប្រទេសថៃ នៅឆ្នាំ២០២៣ គឺ២៤៩ដុល្លារក្នុងមួយខែ ខណៈប្រាក់ឈ្នួលអប្បបរមារបស់ប្រទេសម៉ាឡេស៊ី គឺ៣៣៧ដុល្លារ ក្នុងមួយខែ៕
