ក្រោមការជួយជ្រោមជ្រែង និងចាត់ចែងពីអង្គការសហប្រតិបត្តិការ និងអភិវឌ្ឍសេដ្ឋកិច្ច ហៅកាត់ថា OECD (Organisation for Economic Cooperation and Development) ដែលមានទីតាំងនៅក្នុងប្រទេសបារាំង ប្រទេសចំនួន១៣០ បានព្រមព្រមព្រៀងគ្នាកាលពីសប្តាហ៍មុន លើការកំណត់យកពន្ធអប្បបរមាជាសកល ចំពោះក្រុមហ៊ុនអន្តរជាតិនានា ដែលបាននិងកំពុងមានប្រតិបត្តិការនៅទូទាំងពិភពលោក។
ក្រោយការជជែកពិភាក្សាអស់ពេល២ថ្ងៃ រវាងប្រទេសទាំង១៣០ដែលដំណាងឲ្យជាង ៩០%នៃ GDP ពិភពលោក និងមានការជួយជ្រោមជ្រែងពី OECD កិច្ចព្រមព្រៀងគ្នាជាប្រវត្តិសាស្ត្រមួយត្រូវបានធ្វើឡើង ហើយវាជាលើកទី១ហើយ ដែល១៣០ប្រទេសនៅក្នុងពិភពលោក បានព្រមព្រៀងគ្នា ឲ្យមានការកំណត់អត្រាពន្ធដារ រួមមួយលើក្រុមហ៊ុនអន្តរជាតិ។
អត្ថបទគួរអាន
តាមសេចក្តីថ្លែងការណ៍ របស់ OECD នៅក្រោយការចរចាស្តីពីកំណែទម្រង់ប្រព័ន្ធពន្ធដារពិភពលោក ក្រុមប្រទេសទាំង១៣០បានសម្រេចលើចំណុចសំខាន់ៗចំនួនពីរ។ ទី១ ក្រុមហ៊ុនអន្តរជាតិ ត្រូវបង់ពន្ធអប្បបរមា ១៥% នៃប្រាក់ចំណូលរបស់ខ្លួនមិនថា ពួកគេធ្វើជំនួញ នៅប្រទេសណានោះទេ និងទី២ គឺការបែងចែក ស្មើភាពគ្នានៃសិទ្ធិយកពន្ធលើក្រុមហ៊ុនអន្តរជាតិ សម្រាប់ប្រទេសដែលមានជាប់ពាក់ព័ន្ធ។
បើតាមការចុះផ្សាយពីទីភ្នាក់ងារសារព័ត៌មាន Reuters ការកំណត់ពន្ធលើប្រាក់ចំណូលសាជីវកម្មអប្បបរមារបស់ពិភពលោក១៥%ខាងលើនេះ អាចផ្តល់ចំណូលប្រហែល ១៥០ពាន់លានដុល្លារអាមេរិកបន្ថែមទៀត លើចំណូលពន្ធពិភពលោកជារៀងរាល់ឆ្នាំ។
គួរកត់សម្គាល់ថា បើតាមការស្រាវជ្រាវ និងចេញផ្សាយដោយសារព័ត៌មានជប៉ុន Nikkei មានក្រុមហ៊ុនចំនួន ៨១ បានស្ថិតនៅក្នុងការកំណត់យកពន្ធនៃកំណែទម្រង់ថ្មី ដូចដែលមានក្នុងកិច្ចព្រមព្រៀងរបស់ OECD ហើយការយកពន្ធនេះ គឺត្រូវបានកំណត់ទៅតាមកម្រិតប្រាក់ចំណូល និងប្រាក់ចំណេញរបស់ក្រុមហ៊ុនទាំងនោះ។
ក្នុងចំណោមក្រុមហ៊ុនទាំង ៨១ មាន ១១ក្រុមហ៊ុនជាក្រុមហ៊ុនមកពីប្រទេសចិនដូចជា ក្រុមហ៊ុនថេនសេន (Tencent) និងក្រុមហ៊ុនយក្សអាលីបាបា (Alibaba) របស់មហាសេដ្ឋីជេកម៉ាជាដើម។ ទន្ទឹមនឹងនេះ មាន៣៥ក្រុមហ៊ុនផ្សេងទៀតជាក្រុមហ៊ុនធំៗរបស់អាមេរិក ដូចជាក្រុមហ៊ុន ហ្វេសប៊ុក (Facebook) ហ្គូហ្គល (Google) អេផល (Apple) និងអាម៉ាហ្សូន(Amazon) ជាដើម។
សូមបញ្ជាក់ថា បន្ទាប់ពីបានព្រមព្រៀងគ្នារួចហើយ អ្នកតំណាងរបស់ក្រុមប្រទេសទាំង១៣០ត្រូវបន្តពិភាក្សាគ្នាបន្ថែមទៀតនៅខែតុលាខាងមុខ ដើម្បីសរសេរបិទបញ្ចប់ផ្នែកបច្ចេកទេស មុននឹងសម្រេចដាក់ឲ្យអនុវត្តជាផ្លូវការ នូវវិធានការយកពន្ធជារួមនេះ ដែលត្រូវគេរំពឹងថា អាចនឹងផ្តើមធ្វើឡើងនៅអំឡុងឆ្នាំ ២០២៣៕
None
