រដ្ឋាភិបាលថៃ ជំរុញឱ្យធ្វើវិសោធនកម្មច្បាប់ ដើម្បីបើកឱ្យវិនិយោគិនអាចជួលអចលនទ្រព្យរយៈពេល៩៩ឆ្នាំ
រដ្ឋាភិបាលថៃ កំពុងធ្វើវិសោធនកម្មច្បាប់ ដើម្បីបើកដៃឱ្យវិនិយោគិនអាចជួលអចលនទ្រព្យឱ្យយូរថែមទៀតពី៣០ឆ្នាំ ដល់៩៩ឆ្នាំ ក្នុងបំណងចាក់បញ្ចូលថវិកាក្ន…
រដ្ឋាភិបាលវៀណាម កាលពីថ្ងៃសុក្រ ទី១៨ ខែកក្កដា បានចេញការព្រមានថា ជំងឺប៉េស្តជ្រូកអាហ្រ្វិកកំពុងរីករាលដាលពាសពេញផ្ទៃប្រទេសវៀតណាម ដោយគំរាមកំហែងធ្វើឱ្យរាំងស្ទះការផ្គត់ផ្គង់សាច់ជ្រូកនៅក្នុងប្រទេសក្បែរខាងរបស់កម្ពុជា មួយនេះ។ រដ្ឋាភិបាលវៀតណាម បានចេញសេចក្តីថ្លែងការណ៍ថា ប្រទេសវៀតណាម នៅក្នុងឆ្នាំ២០២៥ នេះ បានរកឃើញការផ្ទុះឡើងនូវករណីជំងឺប៉េស្តជ្រូកអាហ្វ្រិកនៅ២៨ខេត្តក្រុង ក្នុងចំណោមខេត្តក្រុងទាំង៣៤ ទូទាំងប្រទេស ហើយបានបញ្ជាក់ថា អាជ្ញាធរវៀតណាម បានសម្លាប់ជ្រូកដែលកើតជំងឺនេះចោលអស់ជាង៣ម៉ឺនក្បាលរួចមកហើយ។
រដ្ឋាភិបាលវៀតណាម បាននិយាយថា ហានិភ័យនៃជំងឺប៉េស្តជ្រូកអាហ្រ្វិក គឺកំពុងកើនឡើងដែលជះឥទ្ធិពលអវិជ្ជមានដល់ឧស្សាហកម្មចិញ្ចឹមជ្រូក ការផ្គត់ផ្គង់ស្បៀងអាហារ និងបរិស្ថាន។
គួរបញ្ជាក់ថា ជំងឺប៉េស្តជ្រូកអាហ្រ្វិក បានធ្វើឱ្យរអាក់រអួលការផ្គត់ផ្គង់សាច់ជ្រូកនៅលើទីផ្សារទូទាំងពិភពលោកច្រើនឆ្នាំមកហើយ។ ជាក់ស្ដែងនៅក្នុងការផ្ទុះឡើងដ៏អាក្រក់បំផុតនៃករណីជំងឺប៉េស្តជ្រូកអាហ្រ្វិក អំឡុងឆ្នាំ២០១៨-២០១៩ ជិតពាក់កណ្ដាលនៃជ្រូកចិញ្ចឹមនៅក្នុងប្រទេសចិន បានងាប់ ដែលធ្វើឱ្យចិន ខាតបង់ធ្ងន់ធ្ងរក្នុងទំហំទឹកប្រាក់រហូតដល់ទៅជាង១០០ពាន់លានដុល្លារអាម៉េរិក។
ការឆ្លងរាតត្បាតជំងឺប៉េស្តជ្រូកអាហ្វ្រិក នៅក្នុងប្រទេសវៀតណាម ថ្មីៗនេះ បានជំរុញឱ្យនាយករដ្ឋមន្ត្រីវៀតណាម លោក ផាម មិញជិញ ចេញបញ្ជាឱ្យបណ្ដាខេត្ត និងទីភ្នាក់ងាររដ្ឋាភិបាលក្នុងសប្តាហ៍នេះ ដើម្បីដាក់ចេញវិធានការទប់ស្កាត់ការរីករាលដាលនៃជំងឺប៉េស្តជ្រូកអាហ្រ្វិកនេះជាបន្ទាន់។
សូមបញ្ជាក់ថា គិតចាប់ពីដើមឆ្នាំ២០២៥ មក គ្រាន់តែនៅក្នុងខេត្តមួយរបស់វៀតណាម គឺខេត្តញ៉េ អាន់ (Nghe An) បានសម្លាប់ចោលជ្រូកដែលកើតជំងឺនេះរហូតដល់ទៅជាង២ម៉ឺន ៣ពាន់ក្បាល ដែលគិតជាសាច់ស្មើនឹង១ពាន់៥៤៣តោន៕
ដោយ: តែម សុខុម
