អ្នកជំនាញស្នើដល់ប្រជាពលរដ្ឋ ដែលស្ថិតនៅទីតាំងជម្លោះជាមួយថៃ គួរប្រកាន់ខ្ជាប់ឱ្យបានខ្ពស់ ធ្វើយ៉ាងណាកុំឱ្យមានការប្រើប្រាស់ហិង្សា និងពាក្យសម្ដីមិនគប្បី ដើម្បីបង្ហាញអន្តរជាតិ ដែលកំពុងសង្កេតការណ៍ថា ពលរដ្ឋខ្មែរមិនត្រូវការសង្គ្រាម និងត្រូវការសន្តិភាពប៉ុណ្ណោះ។ បើតាមការអះអាងរបស់អ្នកជំនាញសិទ្ធិមនុស្ស ប្រសិនពលរដ្ឋថៃ ហ៊ានយកសារធាតុកខ្វក់បាញ់សាចលើពលរដ្ឋខ្មែរ នោះពួកគេនឹងប្រឈមមុខខុសច្បាប់អន្តរជាតិ ក៏ដូចជារំលោភបំពានលើសិទ្ធិមនុស្សអន្តរជាតិ ផងដែរ។
លោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញផ្នែកទស្សនវិជ្ជា នៃរាជបណ្ឌិត្យសភាកម្ពុជា យល់ឃើញថា ស្របពេលដែលពលរដ្ឋថៃ ធ្វើសកម្មភាពមិនគប្បីក្នុងចេតនាញុះញង់ ពលរដ្ឋខ្មែរត្រូវជៀសវាងឱ្យបាននូវអំពើហិង្សា ដើម្បីចូលរួមជាមួយរដ្ឋាភិបាល ក៏ដូចជាបង្ហាញទៅអន្តរជាតិថា ពលរដ្ឋខ្មែរស្អប់ជម្លោះ និងត្រូវការសន្តិភាព។ បើតាមការវាយតម្លៃរបស់អ្នកជំនាញរូបនេះ កងទ័ពថៃ ហាក់កំពុងពង្រីកជម្លោះ តាមរយៈការបញ្ឆះឱ្យពលរដ្ឋខ្មែរប្រើអំពើហិង្សា និងរដ្ឋាភិបាលប្រើកម្លាំងទ័ពក្នុងការដោះស្រាយបញ្ហា។ បើតាមការអះអាងរបស់អ្នកជំនាញរូបនេះ ស្របពេលពលរដ្ឋខ្មែរកំពុងរងគ្រោះ ព្រួយបារម្ភខ្លាចបាត់បង់ផ្ទះសម្បែង និងដីធ្លីដោយសារសកម្មភាពរំលោភបំពានរបស់ទាហានថៃ ក្រសួងការពារជាតិ គួរតែជួយអន្តរាគមន៍ក្នុងកម្រិតណាមួយ។ លោកបណ្ឌិតយល់ថា សកម្មភាពរបស់ពលរដ្ឋថៃ ដែលបានមកប្រមូលផ្ដុំគ្នារាំសប្បាយនៅជិតព្រំដែនជាមួយកម្ពុជានេះ ហាក់ផ្ទុយស្រឡះមិនសមជាជនរងគ្រោះ ដែលខ្លួនតែងស្រែកថា ត្រូវបានកម្ពុជាឈ្លានពាននោះឡើយ។
ជាមួយគ្នានេះ លោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ បានគូសបញ្ជាក់ថា នៅពេលដែលក្រុមទាហានថៃ ចូលរាយបន្លាលួសដល់ដីផ្ទះប្រពលរដ្ឋខ្មែរ វាបានសបញ្ជាក់ឱ្យឃើញថា ភាគីថៃ បានរំលោភបំពានទាំងកម្រោលលើបទឈប់បាញ់ ដែលកើតចេញពីការជួយសម្របសម្រួលរបស់អាម៉េរិក ចិន និងម៉ាឡេស៊ី ក្នុងនាមជាប្រធានអាស៊ាន។ បើតាមលោក អំ សំអាត ពលរដ្ឋខ្មែរគួរធ្វើយ៉ាងណាកុំឱ្យមានអរិភាពពីការបង្ករឿងរបស់ទាហាន និងប្រជាជនថៃ ព្រោះថា បញ្ហានេះ គណៈកម្មាធិការព្រំដែនទូទៅកម្ពុជា-ថៃ (GBC) និងគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ជាអ្នកដោះស្រាយគ្នាដោយសន្តិវិធី ដែលអាចឈានទៅរកសន្តិភាពរវាងប្រទេសទាំងពីរ។ ពាក់ព័ន្ធនឹងថៃ គំរាមបាញ់ទឹកកខ្វក់លើពលរដ្ឋខ្មែរ អ្នកជំនាញរូបនេះ បានអះអាងថា ប្រសិនជាពលរដ្ឋថៃ ហ៊ានប្រើប្រាស់ឧបករណ៍បាញ់សាចសារធាតុកខ្វក់មកលើពលរដ្ឋខ្មែរ នោះពួកគេ ក៏នឹងប្រឈមមុខខុសជាមួយច្បាប់អន្តរជាតិ និងរំលោភលើសិទ្ធិមនុស្សអន្តរជាតិ ផងដែរ។
នាសន្និសីទសារព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានសង្កត់ធ្ងន់ថា គិតត្រឹមថ្ងៃទី២៨ ខែសីហា ឆ្នាំ២០២៥ កិច្ចព្រមព្រៀងបទឈប់បាញ់រវាងកងទ័ពកម្ពុជា-ថៃ បានអនុវត្តរយៈមកពេល១ខែហើយ។ អ្នកនាំពាក្យរូបនេះ បានអះអាងថា ក្នុងអំឡុងពេលនេះ កម្ពុជា បានគោរពកិច្ចព្រមព្រៀងបានយ៉ាងល្អ ដោយអនុវត្តយ៉ាងម៉ឺងម៉ាត់បំផុតនៅគ្រប់ចំណុច ព្រោះវាជាការផ្តល់តម្លៃដល់កិច្ចព្រមព្រៀងបទឈប់បាញ់ ក៏ដូចជាបានឆ្លុះបញ្ចាំងពីការផ្តល់តម្លៃដល់អាយុជីវិតមនុស្សរាប់ពាន់នាក់ និងបង្ហាញចេតនាស្រលាញ់សន្តិភាពរបស់រដ្ឋាភិបាល និងពលរដ្ឋកម្ពុជា ទាំងមូលផងដែរ។
គួរបញ្ជាក់ថា បន្ទាប់ពីភាគីកម្ពុជា បានអនុវត្តបទឈប់បាញ់បានយ៉ាងខ្ជប់ខ្ជួន និងមិនបានបំពានលើបទឈប់បាញ់ដែលបានចូលជាធរមាននៅថ្ងៃទី២៩ ខែកក្កដា ឆ្នាំ២០២៥ ក្រុមទាហានថៃ និងក្រុមជ្រុលនិយមថៃ បានធ្វើគ្រប់សកម្មភាព ដើម្បីបញ្ឆះកំហឹងឱ្យពលរដ្ឋខ្មែរឆ្លើយតបទៅខ្លួនវិញ ដែលកត្តានេះអ្នកជំនាញ ក៏បានអំពាវនាវដល់ពលរដ្ឋត្រូវប្រកាន់ខ្ជប់ធ្វើយ៉ាងណាកុំឱ្យថៃ សម្រេចបំណង ដែលប៉ងឈ្លានពានលើកម្ពុជា៕
អត្ថបទ៖ ជា ម៉ារ៉ា
