ដង្កូវហ្វូងបានពង្រីកការវាយលុកលើដំណាំកសិកម្មដល់ខេត្តចំនួន១០ហើយ

ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់ប្រាប់ខេមបូណូមីសថា មកទល់ពេលនេះក្រសួងពុំទាន់អាចកំណត់ពីទំហំនៃផលប៉ះពាល់លើដំណាំផ្សេងៗ ដែលបង្កឡើងដោយដង្កូវហ្វូងបាននៅឡើយទេ។ ប៉ុន្តែមន្រ្តីជាន់ខ្ពស់រូបនេះបានអះអាងថា គិតត្រឹមថ្ងៃទី២០ ខែមិថុនា វត្តមានសត្វដង្កូវហ្វូងត្រូវបានប្រទះឃើញកំពុងបំផ្លិចបំផ្លាញដំណាំរបស់ពលរដ្ឋនៅតាមតំបន់មួយចំនួនក្នុងខេត្តចំនួន១០។ ការផ្ទុះឡើងហ្វូងដង្កូវនេះ ត្រូវបានអ្នកនាំពាក្យរូបនេះអះអាងថា គឺដោយសារឆ្នាំនេះមានអាកាសធាតុក្តៅខ្លាំង និងអូសបន្លាយពេលយូរ ដែលបានធ្វើឱ្យវដ្តជីវិតរបស់ដង្កូវហ្វូងកាន់តែខ្លី ពងឆាប់ញាស់ ឆាប់ធំ និងបង្កកំណើតក្នុងល្បឿនលឿន។ ក្រៅពីនេះ ក៏មានកត្តាបូកផ្សំនឹងការបាត់លំនឹងជីវចម្រុះដោយសារកត្តាអាកាសធាតុ ដែលបានធ្វើឱ្យបាត់បង់នូវប្រភេទសត្វមានប្រយោជន៍មួយចំនួន ដែលតែងដើរតួនាទីបំផ្លាញពពួកដង្កូវទាំងនេះផងដែរ។

បើតាមអ្នកនាំពាក្យក្រសួងកសិកម្មរូបនេះ ហេតុការណ៍ស្រដៀងគ្នានេះធ្លាប់បានកើតឡើងរួចមកហើយនៅក្នុងប្រទេសកម្ពុជាកាលពីឆ្នាំ២០១៦ ដែលនៅក្នុងពេលនោះ ដង្កូវបានស៊ីបំផ្លាញដំណាំរបស់ប្រជាកសិករអស់ជាច្រើននៅក្នុងខេត្តព្រះវិហារ និងខេត្តកំពង់ចាម។ ទន្ទឹមនេះឯកឧត្តម ឃឹម ហ្វីណង់ បានជំរុញដល់កសិករត្រូវបង្កើនការប្រុងប្រយ័ត្នខ្ពស់ និងតាមដានត្រួតពិនិត្យមើលដំណាំស្រែចម្ការជាប្រចាំ និងចាត់វិធានការឱ្យបានទាន់ពេលវេលា ហើយក្នុងករណីរកឃើញថា មានផ្ទុះដង្កូវហ្វូងនៅក្នុងចម្ការ ស្រែ គឺត្រូវចាត់វិធានការការពារ ក្នុងនោះមានការសម្អាតស្មៅនៅតាមភ្លឺស្រែ ឬគម្ពោធព្រៃនៅជុំវិញស្រែ ជីកចង្អូរមាត់លើដែលមានមុខកាត់៣០សង់ទីម៉ែត្រ និងជម្រៅ២០សង់ទីម៉ែត្រ រួចរោយផេះ ឬកន្ទក់នៅបាតរណ្តៅដើម្បីបង្អាក់ការធ្វើដំណើររបស់ដង្កូវហ្វូង។ ចំពោះវិធានការកម្ចាត់ អាចព្រលែងសត្វទាចូលទៅក្នុងស្រែ ហើយបើមានប្រភពទឹក គួរបង្ហូរទឹកចូលទៅក្នុងស្រែឱ្យលិចសន្ទូង ឬសំណាបរួចបង្ហូរទឹកចេញវិញហើយយកស្បៃមុង ឬថ្នងដងត្រីត្រង យកដង្កូវហ្វូងកម្ទេចចោល និងការប្រើវិធានការគីមីផងដែរ៕

អត្ថបទ៖ បូ ដូឡា,រូបភាព ឯកសារ