ការបិទដំណើរការរដ្ឋាភិបាល ធ្វើឱ្យអាម៉េរិកខាតបង់រហូតដល់១៥ពាន់លានដុល្លារក្នុង១ថ្ងៃ

សារព័ត៌មាន The Edge Malaysia បានរាយការណ៍ថា រដ្ឋមន្រ្តីក្រសួងរតនាគារអាម៉េរិកលោក ស្កុត បេសសេន បាននិយាយកាលពីថ្ងៃពុធ សប្តាហ៍នេះថា ការបិទទ្វាររដ្ឋាភិបាលសហព័ន្ធរយៈពេលពីរសប្តាហ៍កន្លងមកនេះ បានធ្វើឱ្យសេដ្ឋកិច្ចអាម៉េរិកខាតបង់ធ្ងន់ធ្ងរ និងរាំងស្ទះការងារមួយចំនួន។ បើតាមការអះអាងរបស់មន្ត្រីជាន់ខ្ពស់រូបនេះ សេដ្ឋកិច្ចអាម៉េរិករងការខាតបង់ធ្ងន់ធ្ងររហូតដល់១៥ពាន់លានដុល្លារ ក្នុង១ថ្ងៃ ដូច្នេះ លោក ស្នើឱ្យគណបក្សប្រជាធិបតេយ្យចូលតុពិភាក្សាជាមួយគណបក្សសាធារណរដ្ឋឡើងវិញ ដើម្បីបញ្ចប់ការខាតបង់។ ជាមួយគ្នានេះ រលកនៃលំហូរវិនិយោគទៅក្នុងសេដ្ឋកិច្ចអាម៉េរិក រួមទាំងគម្រោងដំណើរការប្រព័ន្ធស្វ័យប្រវត្តិកម្ម នៃបញ្ញាសិប្បនិម្មិតត្រូវបានរាំងស្ទះដោយសារការបិទទ្វារនេះ។

លើសពីនេះការបិទស្ថាប័នរដ្ឋាភិបាលមួយចំនួនរបស់សហរដ្ឋអាម៉េរិកនេះមិនមែនប៉ះពាល់តែសហរដ្ឋអាម៉េរិកនោះទេ តែវាក៏បានបង្កផលប៉ះពាល់ដល់ប្រទេសនានាផងដែរ។ ហើយសូម្បីតែស្ថិតិ និងទិន្នន័យ ដែលចាំបាច់នានាសម្រាប់អ្នកបង្កើតគោលនយោបាយ ក៏កំពុងរងផលប៉ះពាល់ដែរ។

លោក កាហ៊្សូអូ យូអេដា (Kazuo Ueda) ទេសាភិបាលធនាគារកណ្តាលជប៉ុនបានប្រាប់សន្និសីទសារព័ត៌មានកាលពីពេលថ្មីៗថា ការបិទទ្វារការិយាល័យសហព័ន្ធនៅអាម៉េរិក បានក្លាយជាបញ្ហាដ៏ធ្ងន់ធ្ងរមួយសម្រាប់សេដ្ឋកិច្ចពិភពលោក ហើយជប៉ុនសង្ឃឹមថា វានឹងត្រូវបានសម្របសម្រួល និងដោះស្រាយបានក្នុងពេលឆាប់ៗនេះ។

ក្រុមអ្នកជំនាញសេដ្ឋកិច្ចនេះបានចាត់ទុកការដំណើរការរដ្ឋាភិបាលអាម៉េរិក មិនមែនជារឿងធម្មតានោះទេ តែវាជាវិបត្តិសម្រាប់ពិភពលោក ព្រោះប្រព័ន្ធសេដ្ឋកិច្ច និងពាណិជ្ជកម្ម ជាពិសេសហិរញ្ញវត្ថុសុទ្ធតែមានទំនាក់ទំនងជាមួយសហរដ្ឋអាម៉េរិក៕

ដោយៈ សរ សុជាតិ