ប៉ុន្តែអ្នកជំនាញសេដ្ឋកិច្ចបានមើលឃើញថា ទោះចិនបើកទ្វារប្រទេសឡើងវិញ ក៏នៅតែមិនអាចជួយដល់កំណើនសេដ្ឋកិច្ចក្នុងតំបន់នេះឱ្យបានខ្លាំងក្លាដែរ ពោលគឺកំណើនសេដ្ឋកិច្ចតំបន់នឹងកើនឡើងតែបន្តិចប៉ុណ្ណោះ ដោយសារតែឥទ្ធិពលវិបត្តិសាកល ដែលនឹងអូសបន្លាយពេញមួយឆ្នាំនេះទៀត ហើយចិនខ្លួនឯងក៏មិនទាន់បានងើបឡើងស្រួលបួល ពីបញ្ហានៅក្នុងស្រុករបស់ខ្លួនផង។ នេះបើតាមការចុះផ្សាយរបស់កាសែតថៃ បាងកកប៉ុស្តិ៍។
ការិយាល័យស្រាវជ្រាវម៉ាក្រូសេដ្ឋកិច្ចអាស៊ានបូក៣ ហៅកាត់ថា AMRO ដែលមានមូលដ្ឋាននៅសិង្ហបុរី បានចេញផ្សាយរបាយការណ៍របស់ខ្លួននៅក្នុងខែមករានេះ ឱ្យដឹងថា កំណើនសេដ្ឋកិច្ចរបស់តំបន់នេះនៅឆ្នាំ២០២២ គឺស្ថិតក្នុងរង្វង់ ៣,៣% ដែលធ្លាក់ចុះពីការព្យាករ ៣,៧% នោះគឺដោយសារតែកំណើនសេដ្ឋកិច្ចចុះខ្សោយនៅក្នុងប្រទេសចិន និងភាពទន់ខ្សោយដែលកំពុងបន្តកើតឡើងនៅប្រទេសជប៉ុន និងកូរ៉េខាងត្បូង។
ចំណែកនៅឆ្នាំ២០២៣នេះ កំណើននៅក្នុងតំបន់អាស៊ានបូក៣ត្រូវបានគេព្យាករថា នឹងឡើងដល់៤,៣%វិញ ខណៈសេដ្ឋកិច្ចរបស់ចិនត្រូវបានគេរំពឹងថា នឹងកើនឡើងខ្លាំងតាមរយៈការដកចេញនូវវិធានការសូន្យកូវីដ និងការបើកប្រទេសឡើងវិញ។
អត្ថបទគួរអាន
មែនទែនទៅទោះជាមានកំណើនដល់៤,៣% ក៏ពិតមែន តែវានៅតែជាកម្រិតទាបនៅឡើយ ក៏ដោយសារមិនត្រឹមតែសេដ្ឋកិច្ចធំៗក្នុងតំបន់នោះទេ សូម្បីសេដ្ឋកិច្ចធំៗក្រៅតំបន់ក៏បានជះឥទ្ធិពលមកលើតំបន់អាស៊ានបូក៣ដែរ។ ជាក់ស្តែង សកម្មភាពផលិតនៅសហរដ្ឋអាមេរិក និងអឺរ៉ុប បានបន្តចុះទន់ខ្សោយ ជាមួយគ្នានេះ តម្រូវការក្រៅប្រទេសមានទាប ក៏នឹងនាំឱ្យមានកំណើនសេដ្ឋកិច្ចទាបនៅជប៉ុន និងកូរ៉េខាងត្បូងដូចគ្នា។
លោក ហូ អ៊ីខរ(Hoe Ee Khor) ប្រធានសេដ្ឋវិទូនៅ AMRO បាននិយាយថា បរិយាកាសសាកលដែលកំពុងចុះខ្សោយ បានកាត់បន្ថយនូវចលករពាណិជ្ជកម្មនៅតាមតំបន់។ វាក៏បានប៉ះពាល់ដល់សកម្មភាពសេដ្ឋកិច្ច ដោយសារគោលនយោបាយរូបិយវត្ថុរឹតត្បិតនៅអាមេរិក និងតំបន់ចាយប្រាក់អឺរ៉ូ ដែលទំនងជានឹងកើតឡើងពេញមួយឆ្នាំ២០២៣នេះទៀត។
អ្នកជំនាញសេដ្ឋកិច្ចរូបនេះបន្តថា ជាមួយនឹងហានិភ័យការធ្លាក់ចុះសេដ្ឋកិច្ច ដែលកំពុងតែតាមលងបន្លាចអាមេរិក និងអឺរ៉ុបនោះ ការបើកឡើងវិញសេដ្ឋកិច្ចចិន មិនអាចធ្វើឱ្យស្ថានភាពប្រសើរឡើងវិញក្នុងពេលឆាប់ៗនេះទេ។ យ៉ាងណាមិញលោករំពឹងថា ការវិលត្រឡប់របស់ភ្ញៀវទេសចរចិន នឹងជួយជំរុញដល់កំណើន ពោលគឺសេដ្ឋកិច្ចកាន់តែខ្លាំងរបស់ចិន នឹងផ្តល់នូវការគាំទ្រសកម្មភាពតំបន់។
លោក ហូ អ៊ីខរ បន្ថែមថា ប្រសិនបើតម្លៃថាមពលសាកល និងស្បៀងអាហារ ធ្លាក់ចុះនោះ អតិផរណាត្រូវបានរំពឹងថា នឹងធ្លាក់ចុះផងដែរក្នុងរង្វង់ ៤,៥% ប៉ុណ្ណោះ ទាបជាងការព្យារកណ៍លើកមុនដែលមាន៦,៣%៕
