តើវិស័យទេសចរណ៍កម្ពុជាអាចរងផលប៉ះពាល់ពីសង្រ្គាមរវាងអ៊ីស្រាអែល និងក្រុមហាម៉ាសដែរឬទេ?

លោក ហូ វណ្ឌី ទីប្រឹក្សាសមាគមទេសចរណ៍កម្ពុជា យល់ឃើញថា ការប្រយុទ្ធគ្នារវាងកងកម្លាំងរដ្ឋាភិបាលអ៊ីស្រាអែល និងក្រុមហាម៉ាស ប៉ាឡេស្ទីន កំពុងបង្កផលប៉ះពាល់ដល់សតិអារម្មណ៍របស់ប្រជាជននៃប្រទេសទាំងពីរ ក៏ដូចជាបណ្ដាប្រទេសដ៏ទៃទៀត ដែលមានប្រជាជនកំពុងក្លាយជាចំណាប់ខ្មាំង។ មែនទែនទៅបញ្ហានេះចង់ឬមិនចង់វានឹងជះឥទ្ធិពលអវិជ្ជមានដល់វិស័យទេសចរណ៍កម្ពុជា និងប្រទេសផ្សេងៗប្រសិនបើជម្លោះនេះបន្តអូសបន្លាយរយៈពេលយូរ។ ការអូសបន្លាយពេលយូរ គឺជាក្តីបារម្ភថ្មីរបស់ពិភពលោកនេះ ហើយវានឹងក្លាយជាសុបិន្តអាក្រក់សម្រាប់ទេសចរណ៍ពិភពលោកទាំងមូល។ យ៉ាងណាក៏ដោយអ្នកជំនាញរូបនេះយល់ឃើញថា ប្រសិនបើជម្លោះរវាងអ៊ីស្រាអែល និងក្រុមហាម៉ាស ប៉ាឡេស្ទីន បានបញ្ចប់នោះការវិវត្តនៃវិស័យទេសចរណ៍នឹងអាចប្រើពេលវេលាពី៦ខែ ទៅ១ឆ្នាំ ទើបអាចមានភាពប្រសើរឡើងវិញ។​

ពាក់ព័ន្ធនឹងបញ្ហានេះ ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានមានប្រសាសន៍ថា ការប្រយុទ្ធគ្នារវាងកងកម្លាំងរដ្ឋាភិបាល អ៊ីស្រាអែល និងក្រុមហាម៉ាស ប៉ាឡេស្ទីន អាចនឹងជះឥទ្ធិពលខ្លះដល់វិស័យទេសចរណ៍កម្ពុជា ព្រោះទេសចរអន្តរជាតិ តែងធ្វើដំណើរពីប្រទេសមួយទៅប្រទេសមួយ ហើយបញ្ហាអសន្តិសុខ ដែលកើតឡើងនៅប្រទេសណាមួយ គឺជាក្ដីកង្វល់របស់អ្នកទេសចរអន្តរជាតិ។ ទោះយ៉ាងណាឯកឧត្តមរំពឹងថា ភ្ញៀវទេសចរនឹងនៅតែធ្វើដំណើរមកលេងនៅកម្ពុជា ដែលជាគោលដៅទេសចរណ៍មានសុវត្ថិភាព និងផ្ដល់ភាពកក់ក្ដៅ។​

ក្រសួងទេសចរណ៍ រំពឹងថា នៅឆ្នាំ២០២៣នេះ កម្ពុជានឹងទទួលបានភ្ញៀវទេសចរអន្តរជាតិ ចន្លោះពី៤លានកន្លះ ទៅ៥លាននាក់ ខណៈការស្ដារវិស័យទេសចរណ៍ឱ្យវិលមករកប្រក្រតីភាពដូចមុនកើតជំងឺកូវីដ-១៩ អាចប្រើពេលដល់ឆ្នាំ២០២៦ ហើយចក្ខុវិស័យឆ្នាំ២០២៨ អាចនឹងទាក់ទាញភ្ញៀវទេសចរបរទេសបានប្រមាណ៨លាននាក់៕

អត្ថបទ ៖ បូ ដូឡា