ក្រុមអ្នកជំនាញវិទ្យាសាស្រ្តនយោបាយបានសង្កេតឃើញថា សង្គ្រាមនៅមជ្ឈិមបូព៌ា បានពង្រឹងលើការបែងចែកជាប្លុកធំៗចំនួន២ រួមមាន ទី១ប្លុកលោកខាងលិចដឹកនាំដោយសហរដ្ឋអាម៉េរិក និង អឺរ៉ុប និងប្លុកទី២ មានអ៊ីរ៉ង់ រុស្ស៊ី ចិន ដែលបានរួមគ្នាជាយុទ្ធសាស្រ្តដើម្បីគេចចេញពីឥទ្ធិពលរបស់សហរដ្ឋអាម៉េរិក។
លោកបណ្ឌិត គិន ភា អ្នកជំនាញវិទ្យាសាស្រ្តនយោបាយ បានលើកឡើងថា វិបត្តិនៅមជ្ឈិមបូព៌ានាពេលនេះនឹងបង្ខំឱ្យបណ្ដាប្រទេសដទៃទៀតរួមទាំងកម្ពុជា ផងដែរ ត្រូវគិតគូរពីតុល្យភាពដោយមិនត្រូវពឹងផ្អែកលើប្លុកណាមួយជាដាច់ខាត។ សម្រាប់លោកបណ្ឌិត គិន ភា នៅក្នុងស្ថានភាពដែលសណ្ដាប់ធ្នាប់ពិភពលោកកំពុងមានការប្រែប្រួលយ៉ាងខ្លាំងនេះ គឺទាមទារឱ្យប្រទេសតូចៗដូចកម្ពុជា ប្រកាន់យកយុទ្ធសាស្រ្តម្ចាស់ការលើខ្លួនឯងតាមរយៈចំណុចគន្លឹះចំនួន៣ រួមមាន ត្រូវធ្វើការទូតពហុទិស និងមានភាពបទបែនខ្ពស់, ការពង្រឹងភាពធន់ផ្ទៃក្នុង និងការលើកកម្ពស់ច្បាប់អន្តរជាតិ។
ដោយឡែកលោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវបានចាត់ទុកសង្គ្រាមនៅមជ្ឈិមបូព៌ា គឺជាសញ្ញាចាប់ផ្ដើមនៃសង្រ្គាមលោកលើកទី៣។ សម្រាប់អ្នកជំនាញរូបនេះ សង្គ្រាមនេះនឹងក្លាយជាវិបត្តិដ៏មហន្តរាយ និងពិបាករកទីបញ្ចប់ដោយសារសាសនិកអ៊ិស្លាមមិនសប្បាយចិត្តចំពោះការវាយប្រហារមកលើប្រទេសអ៊ីរ៉ង់នោះទេ ខណៈសង្គ្រាមនេះបានបង្ហាញពីការបែងចែកភូមិសាស្រ្តនយោបាយ និងសេដ្ឋកិច្ច។ អ្នកជំនាញរូបនេះបានសង្កត់ធ្ងន់ថា ស្ថិតក្នុងស្ថានភាពនេះ ប្រទេសដែលស្ថិតក្នុងក្រុមណាមួយ ឬនៅអព្យាក្រឹតត្រូវគិតគូរពីផែនការរបស់ពួកគេឡើងវិញ បើពុំដូច្នោះទេ ប្រទេសទាំងនោះនឹងស្ថិតក្នុងប្លុកភូមិសាស្ត្រនយោបាយ ដែលងាយរងគ្រោះ។
គួររំលឹកថា តំបន់មជ្ឈិមបូព៌ា បានធ្លាក់ក្នុងស្ថានភាពអាសន្ន ក្រោយសហរដ្ឋអាម៉េរិក និងអ៊ីស្រាអែល បើកការវាយប្រហារទ្រង់ទ្រាយធំលើអ៊ីរ៉ង់កាលពីថ្ងៃសៅរ៍ ទី២៨ ខែកុម្ភៈ ឆ្នាំ២០២៦ កន្លងទៅនេះ។ ភ្លើងសង្រ្គាមនេះ មិនត្រឹមតែបំផ្លាញជីវិតមនុស្សនោះទេ ថែមទាំងបាន និងកំពុងហែកហួរសន្តិសុខ និងសេដ្ឋកិច្ចពិភពលោកឱ្យរាយប៉ាយ ដែលទាមទារឱ្យមានការប្រុងប្រយ័ត្នខ្ពស់បំផុត៕
អត្ថបទ៖ បូ ដូឡា
